Ieremia
30 Hnei Iehova hna ithanata koi Ieremia, me hape: 2 “Hane hi la hna qaja hnei Iehova, Akötresi Isaraela: ‘Cinyianyine jë ngöne la ketre itus la itre hnenge hna qaja koi ö. 3 Ke “dreng!” öni Iehova, “tro ha traqa la drai ne tro ni a acasine la nöjeng, lo angetre Isaraela me Iudra hna akalabusin,” öni Iehova. “Eje hi, tro ni a bëeke sai angatr kowe la nöj hnenge hna hamën kowe la itre qaaqaa i angatr, nge tro hmaca ha angatr a lapan ej.”’”
4 Celë hi la hnei Iehova hna qaja koi Isaraela me Iudra.
5 Hane hi la hna qaja hnei Iehova:
“Hne huni hna dreng la kola sue hnei xou;
Kola ixoueny, ngo pëkö tingeting.
6 Pane thele jë ka hape: Ijije kö troa hnaho la trahmany?
Nga hnauëne hö la eni a öhne la itre trahmanyi ka catr a ji la hni* i angatr
Tune la föe ka hnaho?
Nge hnauëne la kola wië qatresi la nöjei iqëmek?
7 Ekölöhini! Ketre drai ka jol* la drai celë.
Pëkö drai ka tune lai,
Ketre ijin akötre lai koi Iakobo.
Ngo tro kö a amele angeic.”
8 “Ngöne la drai cili,” öni Iehova joxu ne la itre trongene isi e hnengödrai, “tro ni a hutra la nyine isilekeun hna atë hune la nyinawa i angatr, me axeciëne la itre otretre i angatr. Tha tro hmaca kö la itre trenyiwa a thahluë angatr. 9 Tro hë angatr a nyihlue i Iehova Akötresi angatr, me Dravita, la joxu hnenge hna troa hamën koi angatr.”
10 “Ngo ame kö eö, Iakobo hlueng, the xou kö,” öni Iehova,
“Nge Isaraela fe, the hmengöhmengöne kö.
Ke tro ni a amele eö qa ngöne la nöj gaa nanyi hnei ö hna lapan
Nge tro ni a amelene la itre matra i ö qa ngöne la nöj hna akalabusi angatr.
Tro hmaca Iakobo a bëek, nge tro angeic a mele ka loi me lapa tingeting,
Ke pëkö ka troa axouenyi angeic.”
11 “Ke ce eni me eö,” öni Iehova, “matre amele eö.
Tro ni a lep apatren asë la itre nöj hnenge hna aisaije epuni kow;
Ngo ame kö eö, tha tro kö ni a lep apatrenyi ö.
Tro ni a haji* ö thenge la meköt,
Ngo lapa atre ju laka, tro pala hi ni a të koi ö.”
12 Hane hi la hna qaja hnei Iehova:
“Pëkö nyin la meci ö.
Tha tro kö a meu la eatre i ö.
13 Pëkö ka troa nyixölë eö,
Nge pëkö nyin la meci ö.
Thatreine kö troa aloine la meci ö.
14 Ase hë thëthëhmi ö hnene lo itre hanyi ö.
Tha angatre hmaca kö a thele troa iöhnyi me eö.
Pine laka, tru catre la ngazo i ö nge nyimutre la itre tria i ö,
Matre hnenge hna lepi ö tune la aqane kuca ne la ithupëjia,
Nge hnenge hna të koi ö tune la aqane kuca ne la ka iakötrë.
15 Hnauëne la eö a hokötre pine la meci ö?
Pëkö nyin la akötre i ö!
Pine laka, tru catre la ngazo i ö nge nyimutre la itre tria i ö
Matre hnenge hna kuca lai koi ö.
16 Ngo tro ha öni hatrën asë la itre ka öni hatrë eö,
Nge tro fe a kötre fë la nöjei ithupëjia me eö.
Tro ha lep angazone la itre ka lep angazo eö,
Nge tro ni a nue troa atrekënön la itre ka atrekënö eö.”
17 “Tro kö ni a aloine la meci ö, me ameune la itre eatre i ö,” öni Iehova,
“Ngacama hnei angatre ju hë hna xome ceitu eö me föe hna up, me hë eö: ‘Ziona, lo tha hna nyipiewekën.’”
18 Hane hi la hna qaja hnei Iehova:
“Tro ni a bëeke kowe la itre itat i Iakobo, me acasin la itre hna akalabusin,
Nge tro ni a utipine la itre uma i angeic.
Tro ha xupe hmaca la traon hune la sasala i angeic,
Nge tro ha acile hmaca la ita ne thup hna eköhagen ngöne lo göhnen ej ekö.
19 Tro ha xulu qa cili la itre nyima ne ole me ihnyima.
Tro ni a kuca matre tro angatr a mana, nge tha tro kö a co la etru i angatr;
Tro ni a kuca matre ala nyimu* jë angatr,
Nge tha tro kö angatr a ala xalaith.
20 Tro la itre nekö i Iakobo a mele ka loi tun ekö,
Nge tro ha acile hutine la lapa i angeic qëmekeng.
Tro ni a të kowe lo itre ka qanangazo angeic.
21 Qaathei angeice kö la atr ka tru ka troa musi hui angeic,
Nge qaathene la itre matra i angeic la atr ka troa joxu i angeic.
Tro ni a hë angeic, nge tro angeic a tro koi ni.”
“Ke maine ju, drei la ka troa tupath* troa easenyi ni?” öni Iehova.
22 “Tro hë epuni a nöjeng, nge tro hë ni a Akötresi epun.”
23 Dreng! Tro ha hnahna catr la wenge eny qaathei Iehova,
Tro ha traqa la wene hune la he ne la itre atr ka ngazo.
24 Tha tro kö a puje la elëhni atraqatre i Iehova
E tha pane hnëkëne kö nyidrë me eatrën la itre mekuna* i nyidrë.
Ngöne la itre drai ne la pun, tro hë epuni lai a trotrohnine hnyawa.