Ioela
1 Hnei Iehova hna ithanata koi Ioela,* nekö i Pethuela. Öni nyidrë:
2 “Drenge ju, epun itre qatr,
Nge hnangenyëne ju, epuni asë itre atrene la nöj.*
Hapeu, hna hane kö traqa la ewekë celë ngöne la hneijine i epun
Maine ngöne la hneijin ne la itre xötrapane i epun?
3 Qaja jë kowe la itre nekö i epuni trahmany,
Nge tro angatr a qaja kowe la itre nekö i angatr,
Nge tro la itre nekö i angatr a qaja kowe la itre xötr e thupen.
4 Ame la hna nue pe hnene la sipa ka xeni menu, ke hna xen hnene la sipa ka hetre iapen;
Nge ame la hna nue pe hnene la sipa ka hetre iapen, ke hna xen hnene la sipa ka pë iapen;
Nge ame la hna nue pe hnene la sipa ka pë iapen, ke hna xen hnene la sipa ka xeni asë.
5 Hlë jë epun, itre ka iji lapaa, nge treije jë!
Epuni asë, itre ka iji waina, latresi jë,
Ke ase hë thapa qa ngöne la që i epuni la waina ka menyik.
6 Ke hna traqa ngöne la nöjeng, la ketre nöj ka catr nge hna thatreine e.
Inyö ne liona la itre inyö i angeic, nge ineqë ne liona la ineqë i angeic.
7 Hnei angeic hna xeni apën la ivineng, me nue pë hë la iwaan ne la iwacuang,
Hnei angeic hna ule la ikupein ne la lue isinöe me trij ezin,
Matre wië pë hë la itre wapicin.
8 Latresi jë tune la ketre nekö jajinyi ka heetrë ibëek ka tru thenyin
Nge ka treije pine la föi* angeic.
9 Patre hë qa hnine la uma ne hmi i Iehova, la itre huuj ne wene feja memine la waina nyine fii huuj;
Kola hnëmec la itretre huuj, lo itre ka huliwa i Iehova.
10 Hna angazone la hlapa, kola hleuhleu la dro;
Ke hna xeni asë la itre wene feja, nge pëhë waina me oel.
11 Lapa goe ju pe hi la itre ka eëny, nge kola treije la itre ka traa vin,
Pine la qitre me bali;
Ke luzi hë la hna eëny.
12 Fitre hë la ivin,
Qaqacile hë la iwacua.
Meci hë la igrenad, me pama, me ipom,
Qaqacile hë la nöjei sinöe ne la hlapa;
Eje hi, ame ngöne la nöj, hna nyihnane pë hë la madrin hnei hmahma.
13 Epun, itre atre huuj, heetrëne* jë la ibëek ka tru thenyin, nge hnëmeci jë;*
Epun, itre ka huliwa ngöne la ita ne huuj, latresi jë.
Epun, itre ka huliwa kowe la Akötresing, lö jë nge heetrëne ju la ibëek ka tru thenyin ngöne la jidr ka pexej;
Ke pë hmaca kö ka traqa fë huuj ne wene feja me waina nyine fii huuj, ngöne la uma ne hmi ne la Akötresi epun.
14 Iupi jë troa tha xen, nge ihë jë troa icasikeu.
Acasine jë la itre qatr memine la itre atrene la nöj asë,
Ngöne la uma ne hmi i Iehova Akötresi epun, nge sipo ixatua jë koi Iehova.
15 Hane petre hi la ketre drai ka troa jol!
Ke calemi hë la drai i Iehova,
Nge tro ej a traqa kösë drai ne apatren qaathene la ka Tru Trenge Men!
16 Hapeu, tha hna thapa kö la xen qëmeke së,
Memine la hnyima me madrine qa hnine la uma ne hmi ne la Akötresi së?
17 Qaqacile hë la itre itine feja* fene la itre pel i angatr.
Pëhë aliene la itre hnë ami xen.
Ase hë thëtrije la itre hnahag hnë ami xen, ke fitre hë la qitr.
18 Kolo fe a ihonyi la hnënge öni!
Tro menu hë la ume kau, ke pëhë a i angatr!
Nge kola xomi akötre la hnënge mamoe hnene la ngazo ne la nöj.
19 Iehova fe, nyipëti la hnenge hna troa hën;
Ke ase hë manithe la a ne la itre öni ngöne la itre hna axö öni,
Nge hnene la ukahlokine hna dreuthetrije la itre sinöe ngöne la hlapa.
20 Kolo fe a thele ixatua thei nyipë hnene la itre öni wael,
Ke qaqacile hë la itre jë ne tim
Nge ase hë manithetrij la itre hna axö öni.”