Pane Tusi Itre Joxu
8 Ngöne la ijine cili, Solomona a hën asë jë la itre qatr ne Isaraela, ene la nöjei tane tribu, me nöjei tixe ne lapa e Isaraela. Hnei angatr hna itronyi me Solomona joxu e Ierusalema, matre xome la pua ne isisinyikeu i Iehova qa ngöne la Traone i Dravita e Ziona. 2 Itre trahmanyi ne Isaraela asë a tro ju koi Solomona joxu ngöne la ijine feet* ne la treu Ethanima,* ene la hna 7 ne treu ne la macatre. 3 Hnene la itre qatr ne Isaraela hna traqa, nge itre atre huuj a kapa jë la Pua. 4 Hnei angatre hna ajöne trongëne la Pua i Iehova, memine la itat ne icasikeu, me nöjei ewekë ka hmitrötr hna amë hnine lai itat. Itretre huuj me angetre Levi* la itre ka ajön. 5 Matre hnei Solomona joxu, memine la nöjei atre Isaraela hna hën koi nyidrë, hna traqa itronyi qëmekene la Pua. Tru catre hnei mamoe me kau hna huujën, matre thatreine kö e la etrun.
6 Thupene lai, itre atre huuj a amë ju la pua ne isisinyikeu i Iehova, ngöne la göhnë hna hnëkën fene la itre iape ne la lue kerubi, hnine la Gaa Nyipi Hmitrötr, lo hnahag e koië pune la uma ne hmi.
7 Itre kerubi a seluthe la lue iape i nyidro hune la göhnen ne la Pua, matre kösë itre kerubi a nyi titaxapo ne lai Pua, me itre tan. 8 Nge qeadridri catre la itre tan, matre goi mama fe la itre pun qa ngöne la Gaa Hmitrötr, qëmekene la Gaa Nyipi Hmitrötr. Ngo tha mama kö qa kuhu trön. Nge uti hë enehila, itre ej pala hi la. 9 Pëkö aliene lai Pua, ngo kolo hmekuje hi lo lue sine etë hna amë hnei Mose e Horeba, thupen lo Iehova a isisinyikeu me angetre Isaraela, lo angatr a tro qa Aigupito.
10 Matre ame ju hi la itre atre huuj a tro qa hnine la gaa hmitrötr, tiqa pi hi la uma ne hmi Iehova hnene la ketre iaw. 11 Nge thatreine hë la itre atre huuj troa huliwa hnene la iaw, ke kola tiqa la uma ne hmi i Iehova hnene la lolo i Iehova. 12 E cili, öni Solomona jë hi: “Iehova fe, öni nyipëti lo ka hape, tro nyipëti a lapa ngöne la gaa mit. 13 Hnenge hna acil la uma atraqatr nge ka mingöming, ketre göhnë ka hut nyine tro nyipëti a lapane uti hë epine palua.”
14 Thupene lai, hnene la joxu hna xei kowe la angetre Isaraela ka cil e cili,* nge nyidrëti a amanathithi angatre jë. 15 Öni Solomona: “Epi troa atrunyi Iehova Akötresi Isaraela, ke hnei nyidrëti hna sisinyi* koi Dravita kemeng, me eatrën hnene la ime i nyidrë. Öni nyidrëti lo, 16 ‘Qaane lo eni a thapa qa Aigupito la nöjeng Isaraela, tha hnenge kö hna iën la ketre traon ngöne la nöjei zi i angetre Isaraela, matre acile la ketre uma thatraqane la ëjeng. Ngo hnenge hna ië Dravita troa elemekene la nöjeng Isaraela.’ 17 Nge aja i Dravita kemeng, troa acile la uma thatraqane* la ëje i Iehova Akötresi Isaraela. 18 Ngo öni Iehova koi Dravita kemeng, ‘Eö a pi xupe la uma kowe la ëjeng, mekun ka loi lai. 19 Ngo tha eö kö, ngo nekö i eö* pe la ka troa xupe la uma kowe la ëjeng.’ 20 Nge hnei Iehova hna eatrëne la hnei nyidrëti hna sisiny, ke hnenge hna nyihna i Dravita kemeng, nge eni la ka lapane la therone i Isaraela, thenge lo aqane qaja i Iehova. Nge ase hë ni xupe la uma thatraqane la ëje i Iehova Akötresi Isaraela. 21 Nge ase hë ni hnëkë göhnene la Pua, lo ka qatrenge la lue sine etë ne isisinyikeu i Iehova me itre qaaqaa së, lo nyidrëti a thepe angatr qa Aigupito.”
22 Thupene lai, hnei Solomona hna cil qëmekene la ita ne huuj i Iehova, me qëmekene la icasikeu asë ne la nöje Isaraela, nge hnei Solomona hna xejë la lue ime i nyidrë, 23 nge öni nyidrë: “Iehova fe Akötresi Isaraela, pëkö haze ka tui nyipë e celë fen me e koho hnengödrai. Nyipëti a amamane la ihnimi nyipici i nyipë kowe la itre ka nyihlue i nyipë hnene la hni ka pexej, nge nyipëti a metrötrëne la isisinyikeu i nyipë me angatr. 24 Hnei nyipëti hna metrötrëne lo isisinyikeu i nyipë me Dravita hlue i nyipë, nge kemeng. Hnei nyipëti hna sisinyi hnene la ukeineqë i nyipë, nge enehila, ase hë nyipëti eatrën hnene la ime i nyipë. 25 Ngo enehila Iehova Akötresi Isaraela, epi tro nyipëti a aeatrëne lo hnei nyipëti hna sisinyi koi Dravita kemeng, lo öni nyipë: ‘Maine tro la itre nekö i ö a thupëne la aqane ujë i angatr, me drengethenge ni* ngöne la mele i angatr, tune hnyawa hi la aqane kuca i ö, haawe, tro pala hi a hetre matra i ö ka troa cile qëmekeng, me lapane la theron ne Isaraela.’ 26 Ngo enehila, Akötresi Isaraela, epi troa eatre la hnei nyipëti hna sisiny koi Dravita, hlue i nyipë nge kemeng.
27 “Ngo ame nyipë Akötresieti fe, hapeu, tro kö nyipëti a lapa ngöne la ihnadro? Ke eje hi, atraqatre ju hë la hnengödrai,* ngo tha ijije pala hi koi nyipë, matre the qaja pala ha la neköi uma celë hnenge hna xup! 28 Enehila Iehova fe Akötresing, epi drenge ju la thithing, me treijeng. Drenge ju la xëweng, memine la hnenge hna thithi fë koi nyipë, eni hlue i nyipë. 29 Epi troa fe la luemeke i nyipë e jidr me lai, nge epi tro nyipëti a goeëne la uma celë, lo öni nyipë, ‘E cili hi la ëjeng.’ Matre e traqa jë ni* thith me goeëne la uma celë, tro nyipëti a drenge la thithing. 30 Epi tro nyipëti a drenge la sipo ne la hlue i nyipë, me nöje i nyipë Isaraela, e traqa jë angatr thith koi nyipë me goeëne la uma celë. Nge epi tro nyipëti a dreng qa ngöne la hnalapa i nyipë e hnengödrai. Drenge ju, nge nue pi la itre ngazo.
31 “Nge e traqa jë nyizö ketre atr pine angeic ngazo koi ketre, nge troa upi angeic troa sisiny wanga eji* angeice jë, nge e tro angeic a traqa kowe la ita ne huuj i nyipë hnine la uma celë, pine la hnei angeic hna sisiny, 32 epi drenge ju qa hnengödrai, nge kuca jë la ketre ewekë, amekötine jë la itre hlue i nyipë. Nyithupene jë kowe la atr ka ngazo la ngazo i angeic, nge të jë koi angeic la ngazo i angeic; ngo jele mekötine* jë la atre ka meköt, nge nyithupene jë koi angeic thenge la meköti angeic.
33 “Nge maine tro la itre ithupëjia a ngaa angetre Isaraela, pine angatr kuca lapaane la ngazo koi nyipë, nge e tro angatr a bëeke koi nyipë, me atrune la ëje i nyipë, me thith me xëwe koi nyipë hnine la uma celë, 34 epi drenge ju qa hnengödrai, nge nue pi la ngazo ne la nöje i nyipë Isaraela, nge bëeke sai angatre jë kowe la nöj hnei nyipëti hna hmanën kowe la itre qaaqaa i angatr.
35 “Nge e traqa jë thinge la hnengödrai, nge pëkö mani pine angetre Isaraela kuca lapaane la ngazo koi nyipë, nge tro angatr a thithi me ujë kowe la uma celë, me atrune la ëje i nyipë, nge maine tro angatr a trije la itre ngazo i angatr, ke hnei nyipëti hna ahmahmanyi* angatr, 36 epi drenge ju qa hnengödrai, nge nue pi la ngazo ne la itre hlue i nyipë, me nöje i nyipë Isaraela. Ke tro nyipëti a köjane la nyipi gojenyi nyine tro angatr a trongën, me axulune la mani hune la zi i nyipë, lo nöj hnei nyipëti hna nyi edrön kowe la itre hlue i nyipë.
37 “Nge e traqa jë jiinë xen ngöne la nöj, maine ketre mec ka ixötrekeu, maine enyi ka aqaqacilëne la itre feja, maine xojene fao, me itre sipa ka sesë, me itre sipa ka xeni asë, nge e tro la itre ithupëjia a lapa xötreithe la ketre traon ne la nöje i nyipë, nge e traqa ju la ketre hulö, maine ketre mec, 38 nge maine tro la ketre atr a thith troa nue la ngazo i angeic, maine tro la nöje Isaraela lo nöje i nyipë a thithi sai angatr (ke atre kö angatr la akötr e kuhu hni angatr) nge e tro angatr a xejë la ime i angatr kowe la uma celë, 39 epi drenge ju hnei nyipë qa ngöne la hnalapa i nyipë e hnengödrai, nge epi nue pi la ngazo, nge kuca jë la ketre ewekë. Të jë kowe la nöjei atr thenge la isa aqane ujë i angatr, ke atre kö nyipë la hni ne la itre atr, (nyipëti hmekuje hi la ka atre la aliene la hni ne la itre atr.) 40 nge matre tro la itre hlue i nyipë a xoue nyipë, ngöne la angatr a mele ngöne la nöj hnei nyipëti hna hamën koi itre qaaqaa hun.
41 “Nge e tro la ketre trenyiwa memine la nöje i nyipë Isaraela a traqa qa gaa nany, ke angeic a drei mejene la ëje i nyipë, 42 (Ke tro ha drei mejene la ëje ka draië i nyipë, me ecatrene la iwanakoime i nyipë, me men ne la ime* i nyipë) nge e traqa jë angeic thith me ujë kowe la uma celë, 43 epi drenge ju qa ngöne la hnalapa i nyipëti e hnengödrai, nge kuca asë jë la hna sipon hnene lai trenyiwa. Qa ngöne lai, tro la nöjei nöj e cailo fen a atre la ëje* i nyipë, me xoue nyipë, tui Isaraela nöje i nyipë. Nge tro angatr a atre laka, ame la uma celë hnenge hna xup, hna ati ëje i nyipë.
44 “Nge e tro nyipëti a upe la nöje i nyipë troa isi me itre ithupëjia ngöne la itre xa götran, ngo e tro angatr a thithi koi nyipë Iehova, me goeëne hmekune la traon hnei nyipëti hna iën, memine la uma hnenge hna xup kowe la ëje i nyipë, 45 epi drenge ju qa hnengödrai la thithi angatr, me xëwe i angatr, nge xatua angatre jë.
46 “Nge e tro la itre atrene la nöje i nyipë a ngazo koi nyipë, (ke pëkö atr ka tha kuca la ngazo) nge e nyipëti a elëhni koi angatr, nge tro nyipëti a nue angatr kowe la itre ithupëjia me angatr, nge itre ithupëjia a othi angatr me xomi angatr kowe la nöje trenyiwa, gaa easenyi maine gaa nany, 47 ngo maine troa loi hmaca la mekuna i angatr ngöne la nöj hna othi angatr, nge e tro angatr a bëeke koi nyipë me xëwe koi nyipë ngöne la nöj hna othi angatr, me hape, ‘Hne huni hna ngazo,’ 48 nge e tro angatr, ngöne la nöj hna xomi angatre kow, a bëeke koi nyipë ngöne la nöjei götrane la mele i angatr, cememine la hni ka pexej, nge e tro angatr a thith, me goeëne hmekune la nöj hnei nyipëti hna hamën kowe la itre qaaqaa i angatr, me traon hnei nyipëti hna iën, me uma hnenge hna xup kowe la ëje i nyipë, 49 pane drenge ju qa ngöne la hnalapa i nyipë e hnengödrai. Drenge ju la thithi angatr, me xëwe i angatr, nge xatua angatre jë. 50 Nue pi la nöjei ngazo hna kuca koi nyipë hnene la nöje i nyipë. Nu asë pi la nöjei ngazo hnei angatr hna kuca koi nyipë. Nge tro nyipëti a aciane la utipin thene la itre ithupëjia me angatr, matre troa utipine la nöje i nyipë. 51 (Nöje i nyipëti lai, nge ewekë* i nyipëti lai. Itre hnei nyipëti hna thapa qa Aigupito, qa hnine la ihu eë ne ahmu fao.)* 52 Epi tro la luemeke i nyipë a goeëne la xëwe ne la hlue i nyipë, me xëwe ne la nöje i nyipë Isaraela. Nge epi tro nyipëti a dreng, e nöjei ijin la angatr a hë* nyipë. 53 Iehova fe, Joxu Ka Sisitria, hnei nyipëti hna aisa angatr me itre xa nöj e cailo fen, matre tro angatr a ewekë* i nyipë, tune lo aqane qaja i nyipë jëne Mose hlue i nyipë, lo nyipëti a thapa la itre qaaqaa hun qa Aigupito.”
54 Thupene la Solomona a ase thith, me xëwe koi Iehova, nyidrëti a mejë jë qëmekene la ita ne huuj, ke hnei nyidrëti hna sa iwatingöneca me xejë la lue ime i nyidrë. 55 Hnei Solomona hna cil, me amanathithine la itre atre Isaraela ka icasikeu, me suene ka hape: 56 “Epi troa atrunyi Iehova, atre hamë tingeting* koi Isaraela nöje i nyidrë, tune lo aqane qaja i nyidrë. Ame la nöjei ewekë hnei nyidrëti hna sisiny jëne Mose hlue i nyidrë, pëkö ca ka tria. 57 Nge epi tro Iehova Akötresi së a ce me easë, tune lo aqane kuca i nyidrë me itre qaaqaa së. Nge epi tha tro kö nyidrëti a nue së, me triji së. 58 Epi tro nyidrëti a ahmalane la itre hni së koi nyidrë, matre tro sa kuca asë la hnei nyidrëti hna ajan, me trongëne la itre hnei nyidrëti hna amekötin, me wathebon, me isenyin, tune lo hnei nyidrë hna amekötin koi itre qaaqaa së. 59 Nge epi tro Iehova Akötresi së, a mekune pala hi, e lai me jidr, la xëwenge koi nyidrë. Nge epi tro Iehova a jelemeköti ni, me nöje i nyidrë Isaraela, thenge la ka nyipiewekë kowe la drai, 60 matre tro la nöjei nöj e celë fen a atre laka, Iehova la nyipi Akötresie, nge pëkö ketre! 61 Haawe, epi tro la itre hni i nyipunie a pexej* koi Iehova Akötresi së, tun enehila. Catre pi trongëne la itre wathebo, me itre hnei nyidrëti hna amekötin.”
62 Nge ala nyimu catre la itre huuj hna huujën hnene la joxu, memine la angetre Isaraela asë qëmekei Iehova. 63 Hnei Solomona hna huujëne koi Iehova la itre huuj ne tingeting. Nyidrëti a huujëne jë la 22 000 lao kau, me 120 000 lao mamoe. Celë hi aqane feetën angetre Isaraela memine la joxu, la ijine afenesine la uma ne hmi i Iehova. 64 Ngöne la ijine cili, hnene la joxu hna ahmitrötrëne la nyipine la götrane gaa pë ihakun, qëmekene la uma ne hmi i Iehova, ke e cili hi la nyidrë a tro fë huuj ne dreuth asë, me itre huuj ne wene feja, me itre giris ne la itre huuj ne tingeting. Eje hi, tha ijije kö la ita ne huuj kopa ka cil qëmeke i Iehova, ke tru hnei huuj ne dreuth asë, me itre huuj ne wene feja, me itre giris ne la itre huuj ne tingeting. 65 Ngöne la ijine cili, hnei Solomona hna ce feet memine la nöje Isaraela asë, memine la itre ka ala nyimu, nge ka traqa qa gaa nanyi e Lebohamath,* me qa ngöne la hneopegejë ne Aigupito. Angatr a feete jë qëmeke i Iehova Akötresi së, koi 7 lao drai, me 7 hmaca kö, matre traqa koi 14 lao drai. 66 Ngöne la drai thupen,* hnei Solomona hna upe la nöj troa isa ije. Matre angatr a amanathithine jë la joxu, me isa bëeke koi hnalapan cememine la madrin qa kuhu hni, ke ase hë Iehova hamëne la itre loi koi Dravita hlue i nyidrë, me Isaraela nöje i nyidrë.