Salamo
Salamo i Asafa.
50 Kola ewekë hnei Iehova,* Akötresie ne la itre Akötresie;
Nyidrëti a hën asë la fen
Qaane la hna fetra uti hë la hna lö hnei jö.*
2 Akötresieti a hudrum qa Ziona, lo traon ne la emingömingön ka pexej.
3 Tro la Akötresi së a traqa nge tha tro kö nyidrëti a lapa thaup.
Hetre eë ka catrehnin qëmekei nyidrë,
Nge kola wene xötreithi nyidrë.
4 Nyidrëti a icasikeune la itre hnengödrai me ihnadro,
Matre amekötine la nöje i nyidrë me hape:
5 “Acasine jë koi ni la itre hlueng,
Lo itre ka isisinyikeu me eni jëne la ketre huuj.”
6 Itre hnengödrai a atrune la emeköti nyidrë,
Ke Akötresieti hi la Atre Iameköti. (Sela)
7 “Nöjenge fe, drenge ju, ke tro ni a ithanata;
Isaraela fe, tro ni a utisai ö.
Akötresieti ni, eni la Akötresi ö.
8 Tha eni kö a wesitrë eö pine la itre huuje i ö,
Me itre huuje ne dreuth asë hnei ö hna tro fë lapaane koi ni.
9 Tha nyipiewekë kö koi ni troa xome la kau qa ngöne la hnalapa i ö,
Memine la itre nani trahmanyi qa ngöne la hna axö öni ö.
10 Ke itre ewekëng asë hi la nöjei öni wael ngöne la hnaxulu,
Memine la itre öni hune la 1 000 lao wetr.
11 Atre hi ni la nöjei waco hune la itre wetr;
Itre ewekëng asë hi la itre öni ngöne la itre hlapa.
12 Maine tro ni a pi xen, ke tha tro kö ni a qaja koi ö,
Ke ewekënge la ihnadro me nöjei ewekë hun ej.
13 Tro kö ni a öni la ijöne la itre kau
Me iji la madra ne la itre nani trahmany?
14 Tro fë jë pe koi Akötresie la hni ne ole i ö nyine huuj,
Nge eatrëne jë la hnei ö hna sisinyi kowe la Ka Draië Catr;
15 Hë ni jë ngöne la eö a akötr.
Tro hë ni a amele eö, nge tro pë hë eö a atrunyi ni.”
16 Ngo tro Akötresie a qaja kowe la atr ka ngazo ka hape:
“Drei la ka upi ö troa e gufan la itre hnenge hna amekötin
Me qaja la isisinyikeung?
18 Ame la eö a öhne la atrekënö, eö a kapa la hnei angeic hna kuca,*
Nge eö a nyi sineene la itre ka nyixetë.
19 Eö a tro fë la ngazo hnene la që i ö,
Nge eö a hnöthe la iaö ngöne la thineme i ö.
20 Eö a lapa me xöjetrije la trejine me eö;
Eö a qaja amamane* la itre tria ne la nekön ne la sipu thine i ö.
21 Ame lo eö a kuca la itre ewekë cili, ke pëkö mejeng,
Matre hnei eö hna mekun ka hape, ceitui nyiso hi.
Ngo ame hë enehila, tro hë ni a haji ö,
Me amamane la hnenge hna lapa fë göi ö.
22 Pane lapa mekune ju la, epun itretre thëthëhmi Akötresie,
Wanga tro ni a tha zezenyi epun, nge pëkö ka atreine amele epun.
23 Ame la atre tro fë la ole i angeic nyine huuj, ke angeic a atrunyi ni,
Nge ame la atre isine troa kuca la loi,
Ke tro hë ni a amamane koi angeic la iamele* i Akötresie.”