Ieremia
51 Hane hi la hna qaja hnei Iehova:
“Tro ni a amejëne la enyi ka iapatreny
Tro ej a lepi Babulona me angetre Leb-Kamai.*
2 Tro ni a upe la itre ka lepelepe qitr* a tro Babulona,
Tro angatr a lepelep ej me kuca matre troa pë aliene la nöj;
Ngöne la drai ne akötr, tro angatr a lepi angeic qa ngöne la nöjei götran.
3 Epi tha tro kö a huji pehna* hnene la atre xomi tane pehna.
Nge epi tha tro kö a cil hnene la atre heetrë iheetre ne isi.
The utipine kö la itre nekö trahmany thei angeic.
Lep apatren asë pi la trongene isi i angeic.
4 Tro angatr a kei me mec ngöne la nöje i angetre Kaledaia,
Ke hna jaqa angatr ngöne la itre gojenyi ne Babulona.
5 Pine laka, tha hna hane kö nuetriji Isaraela me Iudra hnei Iehova Akötresie, joxu ne la itre trongene isi e hnengödrai, matre tha lue sine föe kö nyidro.
Nge tiqa ha la nöje i angetre Kaledaia hnei ngazo qëmeken la Atr Ka Hmitrötr e Isaraela.
6 Kötre pi qa Babulona,
Nge tro pi, matre mele pi epun.
The aluzine kö la mele i epun pine la ngazo i angeic.
Ke traqa ha la ijine tro Iehova a të koi angeic.
Nyidrëti a nyithupen thenge la itre huliwa i angeic.
7 Hnei Babulona hna tune la vere gool ngöne la ime i Iehova;
Hnei angeic hna tra imene la fen asë.
Hnene la itre nöj hna iji la waina i angeic;
Celë hi matre, hmo hë la itre nöj.
8 Ngo hnei Babulona hna aca tro kei me patr.
Haawe, treije pi angeice jë!
Tro jë a xomi pomad kowe la akötre i angeic; maine jë, tro hë angeic a loi hmaca.”
9 “Hne huni hna thele troa aloine la meci Babulona, ngo pëkö nyin.
Nue angeice pi, nge isa tro jë së kowe la itre nöje së.
Ke traqa ha e hnengödrai la itre ngazo i angeic;
Goi traqa fe hë itre ej ngöne la itre iaw.
10 Hnei Iehova hna kuca la ka meköt koi së.
Trohemi matre qaja trongëne jë së e Ziona la itre huliwa i Iehova Akötresi së.”
11 “Xöle jë la itre ane pehna i epun, nge cilaxome jë la itre petre ka raon.*
Ase hë Iehova ukune la itre joxu ne Madai,
Ke aja i nyidrë troa apatrenyi Babulona.
Tro Iehova a të, tro nyidrëti a isi pine la uma ne hmi i nyidrë.
12 Acile jë la ketre hatren nyine iacasinekeun,* matre lepe la itre ihag ne Babulona.
Nyixane jë la itre ka thup, nge upi angatre jë troa cilë göhnë.
Upe jë la itre xan troa zae treqene la ithupëjia.
Ke Iehova la ka hnëkën la aqane troa isi,
Nge tro kö nyidrëti a eatrën lo hnei nyidrëti hna qaja göne la angetre Babulona.”
13 “Föe ka lapa hune la itre tim ka nyimutre,
Nge ka trenamo,
Traqa ha la pun koi ö, nge ase hë lo ijin* eö a kepe mani.
14 Hnei Iehova joxu ne la itre trongene isi e hnengödrai hna sisiny ngöne la mele i nyidrë ka hape:
‘Tro ni a atiqanyi ö hnei atr tune la iume sipa,
Nge tro angatr a sue madrin, ke ase hë ngaa eö.’
15 Nyidrëti hi la Ka Xupe la fen hnene la trengecatre i nyidrë,Nyidrëti hi la ka acile hutine la ihnadro ka ham hnene la inamacan i nyidrëMe seluthe la hnengödrai hnene la atreine i nyidrë.
16 Ame la nyidrëti a ithanata,
Kola enienije la itre tim e hnengödrai,
Nge nyidrëti a aelëne la itre iaw* qa ngöne la itre cane la fene hnengödrai.
Nyidrëti a ce upe la samek me mani,*
Nyidrëti a upe pi la eny qa ngöne la itre hnë ami ewekë i nyidrë.
17 Itre atr asë a huliwa menu me pë atrehmekun.
Tro asë hi la itre ka dreu fao a hmahma pine la idrola hnei angatr hna kuca;
Ke trengathoi la idrola fao* i angatr,
Nge tha ka mele kö.*
18 Ka pë aliene* lai, nge itre huliwa lai nyine hnyima fë.
Ngöne la ijine troa ameköti angatr, tro hë angatr a patr.
19 Isa pengöne kö la edrö i Iakobo memine la itre ewekë cili,
Ke nyidrëti la ka xup asë,
Uti fe hë la sine tö ne la edrö i nyidrë.
Iehova joxu ne la itre trongene isi e hnengödrai la ëje i nyidrë.”
20 “Eö la ketre hama koi ni, ketre jia ne isi,
Ke jëne eö, tro ni a thë la itre nöj.
Jëne eö, tro ni a apatrene la itre baselaia.
21 Jëne eö, tro ni a lepe la hos me atre tith.
Jëne eö, tro ni a anyilanyilane la ikariota memine la atre xomiujin.
22 Jëne eö, tro ni a lepe la trahmanyi me föe.
Jëne eö, tro ni a lepe la qatr me nekönatr.
Jëne eö, tro ni a lepe la nekö trahmanyi me nekö jajiny.
23 Jëne eö, tro ni a lepe la atre thup me itre si i angeic.
Jëne eö, tro ni a lepe la atre eëny me itre kau i angeic.
Jëne eö, tro ni a lepe la itre gavena me itre he ne nöj.
24 Eje hi, tro ni a nyipi të koi Babulona me angetre Kaledaia
Pine la nöjei ngazo hnei angatr hna kuca e Ziona qëmekei epun,” öni Iehova.
25 “Tro ni a lepi ö wetre ka iapatreny,” öni Iehova,
“Eö atre angazone la ihnadro asë.
Tro ni a saathe la imeng matre lepi ö me ukapië eö fene la git
Nge tro ni a kuca matre tro eö a tune la wetr hna dreuth.”
26 “Nge goi tha tro kö a hlem thei ö la ketre etë nyine he ne kona, maine ketre etë nyine trepen,
Ke tro hë eö a ketre götran hna nuetrije paluan,” öni Iehova.
27 “Acile jë la ketre hatren nyine iacasinekeun* ngöne la nöj.
Ufi trutru jë nyipine la itre nöj.
Acasine* jë la itre nöj matre troa lepi Babulona.
Hëne jë la itre baselaia ne Ararata, me Mina, me Asekenaza matre troa isi me angeic.
Acile jë la ketre tane soc matre cile koi angeic.
Aelën atrune jë la itre hos tune la iume sipa ka co.
28 Acasine* jë la itre nöj matre lepi angeic,
Lo itre joxu ne Madai, me itre gavena, me itre he ne nöj
Memine la nöjei nöj hnei angeic hna musi kow.
29 Tro ha hmengöhmengön me enienije la ihnadro,
Ke tro ha eatr la itre mekuna i Iehova göi Babulona:
Tro ha xouene la ka traqa koi Babulona, ke tro ej a pë atren.
30 Hnene la itre soc ne Babulona hna trotrije la isi.
Angatr a lapa hnine la itre traone i angatr hna eköhagen.
Pëhë trengecatre i angatr.
Kösë itre föe hë angatr.
Ase hë manithe la itre uma hnine la traon.
Nge ase hë hutra la itre agö ne acatrei qëhnelö.
31 Kola ixelë la lue atre nyenyap,
Nge kola ixelë la lue atre tro fë maca,
Matre thuemacane la joxu ne Babulona laka, ase hë thapa la traone i angeic qa ngöne la nöjei götran,
32 Nge ase hë thapa la itre gaa tëtë hnene la ithupëjia,
Nge ase hë dreuthetrije la itre he hna kuca hnei rozo,
Nge itre soc a meci hnei xou.”
33 Ke hane hi la hna qaja hnei Iehova joxu ne la itre trongene isi e hnengödrai, Akötresi Isaraela:
“Ceitu la nekö jajinyi ne Babulona memine la hnë lepelepe qitr.
Traqa ha la ijine troa wejeweje angeic.
Easenyi hë troa menuë angeic.”
34 “Hnei Nebukaneza* joxu ne Babulona hna öni hatrë ni;
Hnei nyidrëti hna amenu ni.
Hnei nyidrëti hna nue ni hmaca tune la kola atë la trengen ka pë alien.
Hnei nyidrëti hna ulumi ni tune la un atraqatr;
Hnei nyidrëti hna nyialien la hni i nyidrë hnene la itre ewekëng ka lolo.
Hnei nyidrëti hna helë* ni hnei tim qa ngöne la götran hnenge hna lapa.
35 ‘Epi troa të koi Babulona pine la akötr hnei angeic hna kuca koi ni, me kowe la ngönetreing!,’ önine la jajinyi ne Ziona.
‘Nge epi troa të koi angetre Kaledaia pine la madrang hna anenin!,’ öni Ierusalema.”
36 Qa ngöne lai, hane hi la hna qaja hnei Iehova:
“Tro ni a isigöli ö ngöne la hnakootr,
Me të la ngazo hna kuca koi ö.
Tro ni a aqaqacilën la hnagejë me itre qeqe ne tim ne Babulona.
37 Nge tro hnyawa ha Babulona a tune la itra etë,
Me hnë meköl ne la itre kuli wael,
Ketre götran hna xouen, nge hna troa qejin me sisin,
Pë hmaca kö atr ka troa lapa e cili.
38 Tro angatr asë a ce ho tune la itre liona.
Tro angatr a ho tune la itre neköi liona.”
39 “E cia ha la aja e kuhu hni i angatr, tro hë ni a hnëkë xen me tra ime i angatr,
Matre tro angatr a madrin;
Nge tro hë angatr a meköle thatre,
Nge tha tro hmaca kö angatr a hlë,” öni Iehova.
40 “Tro ni a uti sai angatr kowe la hnë humu öni tune la itre neköi mamoe,
Me itre mamoe trahmanyi me itre nani trahmany.”
41 “Goeëne la aqane akeinyi Sesaka,*
Me aqane xomi angeic, lo Emingömingön ne la fen asë!
Goeë Babulona, sisi hë angeic kowe la itre nöj!
42 Elë hë la hnagejë koi Babulona.
Nge hna heti angeic hnene la itre hoke ne gejë ka nyimutre.
43 Tro ha xouene la ka traqa kowe la itre traone i angeic, ke kösë nöje ka qaqacil, me hnapapa.
Tha tro hmaca kö a lapan ej, nge pë hmaca kö ka troa cili thenge.
44 Tro pena ni a ujë koi Bel e Babulona:
Tro ni a hul la enufa hnei angeic hna ulum.
Tha tro hmaca kö la itre nöj a elë koi angeic,
Nge tro ha kei la ihag ne Babulona.
45 Nöjenge fe, tro pi qa lai!
Maine epuni a pi mel, kötr ananyine pi la trengehni i Iehova!
46 The nue kö la maca hna troa qaja ngöne la nöj, troa agenyin me xouenyi epun.
Thupene la ca macatre, tro epuni a drenge la ketre maca,
Nge ngöne la macatre thupen, tro ha traqa la ketre:
Tro ha drei mejen la aqane iakötrë ngöne la nöj, me itre joxu a isi.
47 Haawe, dreng! Tro ha traqa la drai ne
Tro ni a apatrene la itre idrola ne Babulona.
Tro ha thaipiëne la nöje i angeic asë,
Nge tro asë hi la itre hna humuth a kei ngöne la traon.
48 Tro la hnengödrai, me ihnadro, me itre alien ej
A sue madrin e kei hë Babulona,
Ke tro la itre ka iapatreny a traqa koi angeic qa kolopi,” öni Iehova.
49 “Eje hi laka, hnei Babulona hna akein la itre hna humuth e Isaraela
Ngo e Babulona mina fe lo hna akein la itre hna humuth e cailo fen.
50 Ame epun itre hna trian hnene la taua, tro jë nge the cile kö!
Ngöne la götran gaa nanyi hnei epuni hna lapan, meku Iehova kö,
Nge the thëthëhmi Ierusalema kö.”
51 “Hna thaipië hun, ke drenge hi hun la kola ihnyimasai.
Hmahma ha la itre iqëmeke hun,
Ke hnene la itre trenyiwa hna lepe la itre götran gaa hmitrötr ne la uma i Iehova.”
52 “Haawe, dreng!” öni Iehova,
“Tro ha traqa la drai ne tro ni a apatren la itre idrola i angeic hna tratraun,
Nge ngöne la nöje i angeic asë, tro la itre ka eatr a thë.”
53 “Ngacama tro ju hë Babulona a elë hnengödrai,
Me acatrene la itre ihag atraqatr i angeic,
Ngo tro kö ni a upe koi angeic la itre atre iapatreny,” öni Iehova.
54 “Dreng! Kola itreijeny qa Babulona,
Nge kola mexem la akötr atraqatr qa ngöne la nöje i angetre Kaledaia,
55 Ke Iehova a lep apatrenyi Babulona,
Tro nyidrëti a lep ahumunyi angeic,
Nge tro ha ulili la itre hoke ne gejë i angatr tune la itre gejë atraqatr.
Tro ha drenge la nine i angatr.
56 Ke tro la atre iapatrenyi a traqa e Babulona;
Tro ha oth la itre soc i angeic,
Tro ha hutra la itre tane pehna i angatr,
Ke eje hi, Iehova la Akötresieti ka nyithupen.*
Tro kö nyidrëti a të thenge la isa huliwa së.
57 Tro ni a tra imene la itre nekö i joxu i angeic, me itre ka inamacan,
Itre gavena, me itre he ne nöj, me itre soc i angeic,
Nge tro hë angatr a meköle thatre,
Nge tha tro hmaca kö angatr a hlë,” önine la Joxu hna hën ka hape, Iehova joxu ne la itre trongene isi e hnengödrai.
58 Hane hi la hna qaja hnei Iehova joxu ne la itre trongene isi e hnengödrai:
“Ngacama ka isaisa la ihag ne Babulona, ngo tro ha thëtrij,
Nge ngacama ka draië la itre qëhnelön, ngo tro ha dreuthetrij.
Tro la itre atr a aluzi trengecatr;
Tro la itre nöj a huliwa mec, ngo angatre pe hi lai a ipicone la eë.”
59 Hane hi la hna amekötin hnei Ieremia perofeta koi Seraia nekö i Neria, nekö i Maseia, lo Seraia a ce tro me Zedekia joxu ne Iudra a tro Babulona, ngöne la hna 4 ne macatre ne mus i angeic. (Seraia lo tan ne la itre ka thupë hnalapa.) 60 Hnei Ieremia hna cinyanyin ngöne la ca itus la nöjei akötr ka troa traqa koi Babulona, memine la nöjei hna amekötin göi Babulona. 61 Ketre, öni Ieremia koi Seraia: “E traqa ha eö e Babulona, e catrëne jë la nöjei trengewekë celë. 62 Nge hape jë: ‘Iehova fe, ase hë nyipë amekötin troa lep apatren la nöje ce, itre atr me itre öni, nge tha tro hmaca kö a lapan ej uti hë epine palua.’ 63 Nge e ase jë eö e la itusi celë, hnöthe ju kowe la ketre etë, nge kuiëne pi ngöne la hneopegejë Euferate. 64 Thupene lai, qaja ju ka hape: ‘Celë hi aqane troa hujalö Babulona, nge tha tro hmaca kö angeic a mejë, pine la akötr hnenge hna troa axulun koi angeic; nge tro hë angatr a kucakuca.’”
Celë hi aqane nyipune la itre trengewekë i Ieremia.