Malaki

1 Maca:

Hane hi la hna qaja hnei Iehova koi Isaraela, jëne Malaki:*

2 “Hnenge hna hnimi epun,” öni Iehova.

Ngo öni epuni pe: “Hnei nyipë hna hnimi hun tune kaa?”

Matre öni Iehova: “Hapeu, tha lue trejine kö Esau me Iakobo? Ame pe, hnenge kö hna hnimi Iakobo, 3 me methinë Esau. Hnenge hna lep apatren la itre wetre i angeic, me nue la edrö i angeic kowe la itre kuli wael* ne hnapapa.”

4 “Ngacama öni Edroma: ‘Maine nyipici laka, hna lep apatrenyi hun, ngo tro hmaca kö huni a bëek me xupe la itre tra etë,’ ngo hane hi la hna qaja hnei Iehova joxu ne la itre trongene isi e hnengödrai: ‘Tro hmaca angatr a xup, ngo tro ni a thëtrij, nge troa hë angatr, “zi ne la itre atr ka ngazo,” me “nöje hna ejin hnei Iehova epine palua.” 5 Tro epuni a öhne lai hnene la luemeke i epun, me hape: “Epi troa mama cil la edraië i Iehova ngöne la nöje Isaraela asë.”’”

6 Hane hi la hnei Iehova joxu ne la itre trongene isi e hnengödrai, hna hnyingëne koi epun itretre huuj ka methinëne la ëjeng: “‘Ame la nekön, ke ka metrötrëne la kem, nge ame la hlu, ke ka metrötrëne la maseta. Haawe, maine ketre keme ni, nga ekaa metrötre i epuni koi ni? Nge maine ketre maseta* ni, nga ekaa la xoue* i epuni koi ni?’

“‘Ngo öni epuni pe: “Hne huni hna methinëne tune kaa la ëje i nyipë?”’

7 “‘Ngöne la epuni a tro fë xeni* ka ngazo hune la ita ne huujeng.’

“‘Nge öni epun: “Hne huni hna adronyi nyipë tune kaa?”’

“‘Ngöne la epuni a qaja ka hape: “Nyine methinëne la laulau i Iehova.” 8 Nge ame la epuni a tro fë öni ka timek, öni epun: “Pëkö lai.” Nge ame la epuni a tro fë öni ka pej maine ka wezipo, öni epun: “Pëkö lai.”’”

Pane tro fë jë lai kowe la gavena i ö. Tro jë kö nyidrëti lai a madrin me kepe eö?” öni Iehova joxu ne la itre trongene isi e hnengödrai.

9 “Ngo enehila, pane sipone* jë koi Akötresie troa kepe epun. Maine tro epuni a tro fë la itre huuje cili, tro jë kö nyidrëti a kapa la ketre e epun?” öni Iehova joxu ne la itre trongene isi e hnengödrai.

10 “Nge drei thei epuni la ka pi thinge la itre qëhnelö*? Ke goi tha ajane fe epun troa amelene la ita ne huujeng, e tha hna pane nyithupei epuni kö. Tha madrine kö ni koi epun,” öni Iehova joxu ne la itre trongene isi e hnengödrai, “nge tha madrine kö ni kowe la itre huuj hnei epun hna traqa fë.”

11 “Ke qaan la hna fetra hnei jö uti hë la hna lö hnei jö,* tro ha hlemu la ëjeng ngöne la itre nöj. Ngöne la nöjei götran, tro ha huhajine la itre huuj, nge tro ha tro fë huuj matre atrune la ëjeng, eje hi, itre huuj ka pë engazon; ke tro ha hlemu la ëjeng ngöne la nöjei nöj,” öni Iehova joxu ne la itre trongene isi e hnengödrai.

12 “Ngo epuni pe a adron ej* la epuni a hape: ‘Pui ngazo hë la laulau i Iehova, nge ame la itre wene sinöe me itre xen qa ngön ej, ke hna methinën.’ 13 Nge öni epun hmaca jë hi: ‘Tha ka za kö la huliwa cili!’ Nge epuni a methinën ej me thipi ihneqë,” öni Iehova joxu ne la itre trongene isi e hnengödrai. “Nge epuni a traqa fë la itre öni hna atrekënö, me ka pej, nge ka wezipo. Hane hi la itre huuj hnei epuni hna tro fë! Matre tro ni a kapa tune kaa la hnei epuni hna traqa fë?” öni Iehova.

14 “Hnëjine hë la atre iaö ka sisiny me tro fë koi Iehova la ketre öni ka hetre engazon,* ngo hetre öni* ka loi i angeice pe.” Ke eni la Joxu ka sisitria, öni Iehova joxu ne la itre trongene isi e hnengödrai, “nge tro la itre nöj a xou me metrötrën la ëjeng.”