Deuteronomi
33 Nge hane hi la manathith hnei Mose, atre ne la nyipi Akötresie, hna ahnithe kowe la angetre Isaraela qëmekene tro angeic a mec. 2 Öni angeic:
“Traqa ha Iehova qa Sinai,
Nge hnei nyidrëti hna melemel hui angatr qa Seira.
Hna hudrume la lolo i nyidrë qa hune la itre wetr e Parana,
Ce nyidrë me itre milio lao ange ka hmitrötr,
Nge itre atr ka catre i nyidrë ngöne la götrane maca i nyidrë.
3 Tru la ihnimi nyidrë kowe la nöje i nyidrë;
Akötresieti fe, ngöne la ime i nyipë la itre atr ka hmitrötr thei angatr.
Angatre lo a lapa fene la lue ca i nyipë;
Angatre lo a drenge la itre trengewekë i nyipë.
4 (Hnei Mose hna ahnithe koi së la wathebo,
Ene la ewekë ne la itre matra i Iakobo.)
5 Nge joxu hë nyidrë e Iesuruna,*
Lo kola icasikeu hnene la itre tane la nöj,
Memine la nöjei tribu ne Isaraela.
6 Epi tro Reubena a mel, nge tha tro kö angeic a mec,
Nge epi tha tro kö a ala xalaithe la itre atre i angeic.”
7 Nge hane hi la manathith hna qaja koi Iudra:
“Iehova fe, pane drenge ju la aqane ewekë i Iudra,
Nge bëeke sai angeice jë kowe la nöje i angeic.
Hnene la lue ime i angeic hna isigöline la itre ewekë i angeic,
Xatua angeice jë troa cil kowe la itre ithupëjia.”
8 Hnei angeic hna qeje Levi ka hape:
Hnei ö hna isi me angeic ngöne la itre tim ne Meriba,
9 Lo atre qeje kem me thin ka hape: ‘Tha hnenge kö hna nyipiewekë nyidro.’
Tha wangatrehmekune kö angeic la itre trejin me angeic,
Nge goi tha wangatrune fe angeic la itre sipu nekö i angeic.
Ke hnei angeic hna thupëne la trengewekë i nyipë,
Nge hnei angeic hna metrötrëne la isisinyikeu i nyipë.
10 Epi tro angeic a ini Iakobo la itre hna amekötin hnei nyipë
Memine la Wathebo i nyipë koi Isaraela.
Epi tro angeic a dreu ka pui loi koi nyipë
Me tro fë huuj ka pexej hune la ita ne huuje i nyipë.
11 Iehova fe, epi amanathithine la trengecatre i angeic,
Nge amamane jë laka, nyipëti a kapa la huliwa ne la lue ime i angeic.
Axeciene pi la lue ca* ne la itre ka cile koi angeic,
Matre tha tro hmaca kö a cil la itre ka methinë angeic.”
12 Hnei angeic hna qeje Beniamina ka hape:
“Epi tro la hnimina i Iehova a mele tingeting thei nyidrë;
Ke nyidrëti a thupë angeic e nöjei drai,
Tro hë angeic a lapa nyipine la lue iape i nyidrë.”
13 Hnei angeic hna qeje Iosefa ka hape:
“Epi tro Iehova a amanathithine la nöje i angeic
Epi tro angeic a kapa la itre ewekë ka lolo qa hnengödrai,
Ene la wene lepany, me itre tim qa ngöne la itre an,
14 Me itre ewekë ka lolo hna acian hnei jö
Me itre ewekë ka lolo hna acian e nöjei treu,
15 Me itre ewekë ka nyipi lolo ne la itre wetr ka hekö*
Me itre ewekë ka lolo ne la itre sasala ka epine palua,
16 Me itre ewekë ka lolo ne la ihnadro me itre alien ej,
Memine la manathith ne la Atre lapa ngöne la isinöe ka ithiny.
Epi tro itre ej a të hune la he i Iosefa,
Hune la he ne la atr hna ananyine qaathene la itre trejin me angeic.
17 Ceitu la lolo i angeic me kau hna pane hnahon,
Nge ceitu la lue jiane i angeic me jiane kau wael.
Jëne lue ej, tro angeic a thine trongëne la itre nöj
Itre nöj asë, uti hë la itre cane la fene hnengödrai.
Itre milie angatre qa Eferaima,
Nge itre thauzan* angatre qa Manase.”
18 Hnei angeic hna qeje Zebulona ka hape:
“Zebulona fe, madrine jë ngöne la itre tronge i ö,
Nge Isakara fe, madrine jë ngöne la itre itate i ö.
19 Tro nyidroti a hëne la itre nöj kowe la wetr.
E cili, tro angatr a huujëne la itre huuj ne meköt.
Ke tro angatr a sine la itre trengamo qa kuhu hnagejë
Me itre mo hna juetrëne ngöne la ngöni.”
20 Hnei angeic hna qeje Gada ka hape:
“Manathithi la atre ahuëne la itre ifego i Gada.
Angeic a meköl e cili tune la liona,
Ka hnëkë troa heje thaitrëne* la im, uti fe hë la inenatr.
21 Tro angeic a iën thatraqai angeic la pane götran,
Ke e cili la hna amë la edrö ne la atre acili wathebo.
Tro ha icasikeu la itre tane la nöj.
Tro hë angeic a eatrëne la meköt i Iehova,
Me itre hnei nyidrëti hna amekötin koi Isaraela.”
22 Hnei angeic hna qeje Dana ka hape:
“Neköi liona lae Dana.
Tro angeic a sesë qa Basana.”
23 Hnei angeic hna qeje Nafatali ka hape:
“Meji hë Nafatali hnene la thiina ka loi i Iehova
Nge tiqa ha angeic hnei manathithi qaathei nyidrë.
Thapa pi la götrane kuë me kolojë.”
24 Hnei angeic hna qeje Asera ka hape:
“Nyimu nekö i Asera trahmany hna hamën hnei Akötresie.
Epi tro la itre trejin me angeic a wangatrunyi angeic,
Nge epi tro angeic a hnea la lue waca i angeic ngöne la oel.
25 Fao me kopa la itre thingene qëhnelö i ö,
Nge tro hë eö a lapa tingeting e nöjei drai ne mele eö.
26 Pëkö atr ka tune la nyipi Akötresie i Iesuruna,
Ka xatua eö qa hnengödrai
Nge ka të hune la itre iaw tune la joxu.
27 Qaan ekö, Akötresieti la hnë kötre zae,
Tro nyidrëti a xatua eö me thupë eö uti hë epine palua.
Tro nyidrëti a helëne la ithupëjia qëmekei ö,
Nge tro nyidrëti a hape: ‘Apatrenyi angatre jë!’
28 Tro Isaraela a mele tingeting,
Nge tro ha thupëne la qeqe ne tim i Iakobo
Ngöne la nöj gaa hetre wene feja me waina ka hnyipixe,
Ketre nöj laka, kola ut la wene lepanyi qa hnengödrai.
29 Isaraela fe, madrine catr eö!
Ke drei la ka tui ö,
Ketre nöj hna amelen hnei Iehova,
Lo petre i ö ka thupë eö
Me taua i ö ka catr?
Tro la itre ithupëjia a ewathi ö,
Ngo tro eö a waja la ju i angatr.”*