Hnaaluene Tus i Samuela

15 Thupene la itre ewekë celë, Abasaloma a iupi jë troa ca ikatr, me xomi hos, me upe la 50 lao trahmany troa nyinyap qëmeke i angeic. 2 Nge ka majemine ihlë Abasaloma, me cil ngöne la gojenyi ne tro kowe la qëhnelö ne la traon. Nge ame la ketre atr a tro troa tro fë la jole i angeic koi joxu, Abasaloma a canga hëne lai atr me hape: “Atre kaa eö?” Nge ej a qaja jë la ketre tribu e Isaraela. 3 Thupene lai, Abasaloma a qaja koi angeic ka hape: “Meköti hi la sipo i eö, ngazo pe, pëkö atr hnei joxu hna acil troa drei eö.” 4 Thupene lai, Abasaloma a qaja jë ka hape: “Ekölö, maine eni ju la atre iameköti e Isaraela! Tro hë la nöjei atr ka pi sei jol, a hane traqa koi ni, nge tro ni a isin matre eatre pi la meköt.”

5 Nge ame la ketre atr a tro koi angeic, me thili qëmeke i angeic, Abasaloma a canga li im troa sewe angeic, me dremi angeic. 6 Celë hi aqane ujë i Abasaloma kowe la nöjei atre Isaraela, itre ka traqa troa wai joxu goi troa sei jol. Aqane kuca i Abasaloma hi lai, matre thapa la hni ne la angetre Isaraela.

7 Haawe, thupene la 4 lao macatre,* Abasaloma a sipone jë kowe la joxu ka hape: “Pane nue ni pi troa tro Heberona, matre eatrëne la hnenge hna sisinyi koi Iehova. 8 Ke ame lo eni e Gesuri e Suria, hnenge hna sisinyi me hape, ‘E tro Iehova a aijijë ni troa bëek a tro Ierusalema, tro hë ni a tro fë huuj koi* Iehova.’” 9 Ame hnei joxu hna qaja koi angeic ka hape: “Ce tro jë memine la tingeting.” Nge Abasaloma a tro ju a tro Heberona.

10 Ame hnei Abasaloma hna upe la itre espio ngöne la nöjei tribu ne Isaraela, me hape: “E drenge hë epuni la mejene trutru, tro hë epuni a suene ka hape, ‘Joxu hë Abasaloma e Heberona!’” 11 Nge Abasaloma a tro ju me 200 lao atr qa Ierusalema, itre atr hnei angeic hna hëne troa sine la tronge i angeic, ngo thatre pe angatr la mekuna i angeic. 12 Matre ame ju hi la Abasaloma a tro fë huuj, angeic a upi ketre jë troa tro Gilo, me traqa sai Ahitofela qa Gilo, lo atresi i Dravita. Nge kolo pala hi a kökötre la icilekeu, me elë la etrune la itre sinexöle i Abasaloma.

13 Thupene lai, hnene la ketre atr hna traqa troa thuemacanyi Dravita ka hape: “Ce xöle hë angetre Isaraela me Abasaloma.” 14 Ame hnei Dravita hna qaja koi itre ka huliwa koi nyidrë e Ierusalema ka hape: “Öi, mejë jë nge kötre jë së, wanga pëkö ala casi hna troa nuamelen hnei Abasaloma! Tro sa canga enij, wanga lepi së jë. Tro Abasaloma a asesëkötrë së me humuth hnei taua la itre atrene la traon.” 15 Önine jë hi la itre ka huliwa koi nyidrë ka hape: “Joxu fe, qanyi nyipëti kö amekötin, ngo ka itreqe hun.” 16 Qa ngöne lai, hnene la joxu hna tro ju me itre sinee i nyidrë asë, ngo lapa ju pe kö la itre xa föe i nyidrë, ala 10 la ka troa thupëne la hnalapa i joxu. 17 Ame hë la joxu me itre sinatronge i nyidrë a trotrije la traon, angatr a pane cile ju e Beth-Meraka.

18 Nge Dravita a waipengöne hnyawa ju la itre* ka ce tro me nyidrë,* me angetre Kerethi, me Pelethi, me 600 lao atre Gatha ka xötrethenge Itai, lo angeic a trotrij e Gatha. 19 Matre hnei joxu hna qaja koi Itai, atre Gatha ka hape: “Tro eö a ce tro fë nemen me eahun? Bëeke jë, nge lapa ju memine la joxu hna hnyipi acil, ke trenyiwa eö, nge ase hë eö trotrije la zi eö. 20 Ka hnyipi traqa hi eö, matre thatreine kö ni sipo eö troa xötrethenge ni, nge thatre pe ni ka hape, tro ni a tro ië. Bëeke jë, nge xometrongëne jë fe la itre atre i eö, nge epi tro Iehova a amamane la ihnimi nyipici i nyidrëti koi eö!” 21 Ngo sa jë hi Itai ka hape: “Qëmeke i Iehova Akötresie ka mel, me qëmeke i nyipë joxung, ame la jë i nyipë, ke jënge fe, göi mec maine mel!” 22 Matre Dravita a qaja jë koi Itai ka hape: “Jë fe, sasaithe jë la hnathup.” Nge Itai atre Gatha a sasaithe ju la hnathup, me itre atre i angeic, me fami i angatr.

23 Ame la itre atre i Dravita a sasaithe la Hnathup ne Kederon, me xome la gojenyi ne tro kowe la hnapapa, hnene la itre atr ka mel e Ierusalema hna itreijeny, nge joxu a cil ngöne la hnë lö ne lai hnathup. 24 Nge Zadoka fe e cili, me angetre Levi asë ka xututhe trongëne la pua ne isisinyikeu ne la nyipi Akötresie. Angatr a pane amë ju la pua ne la nyipi Akötresie, nge ame hë la itre atre i Dravita a ase sasaithe la hnathup, traqa pi fe hi Abiathara. 25 Ngo öni joxu koi Zadoka ka hape: “Bëeke fë jë la pua ne la nyipi Akötresie hnine la traon, ke maine Iehova a kepe ni, tro kö nyidrëti a abëekë ni, me aijijë ni troa öhne hmaca la Pua, me itat ka heetrën ej. 26 Ngo e hape jë nyidrëti koi ni, ‘tha madrine hmaca kö ni koi ö,’ nga tro hë nyidrëti a kuca koi ni la hnei nyidrëti hna mekun.” 27 Nge önine hmaca la joxu koi Zadoka atre huuj ka hape: “Atre qeje pu* eö, eje hi? Nga tro hë eö me Abiathara a bëeke kowe la traon, nge xometrongëne jë la lue nekö i epon, Ahimaza nekö i eö, me Ionathana nekö i Abiathara, nge bëeke jë memine la tingeting. 28 Ngo ame ni, tro ni a pane hmitr ngöne la hnapapa, ezine la gaa tëtë ne la Hneopegejë Ioridrano, uti hë la tro epuni a iupi fë maca koi ni.” 29 Zadoka me Abiathara a bëeke fë jë la Pua ne la nyipi Akötresie a tro Ierusalema, nge angatr a lapa ju e cili.

30 Ame hë la Dravita a elëne la Wetr Elaio,* nyidrë a treije trootro, nge hna atuthe la he i nyidrë, nge nyidrë a tro pë ibutr. Matre hnene la itre sinatronge i nyidrë hna hane atu he, me treije trootro. 31 Nge hna thuemacanyi Dravita ka hape: “Ahitofela la ketre sinexöle i Abasaloma.” Matre öni Dravita: “Iehova fe, kuca jë matre jelehmone pi la itre eamo i Ahitofela!”

32 Nge ame hë la Dravita a traqa hune la wetr, ngöne lo hna majemine thil koi Akötresie, traqa ju hi nyidrë a öhnyi Husai atre Areki, a kola itreqe me iheetr ka zezeny, me ialamek ka si dro. 33 Dravita a qaja ju ka hape: “Maine tro eö a ce sasaithe me eni, ke tha tro kö eö lai a xatua ni. 34 Ngo maine tro eö a bëeke kowe la traon, tro eö lai a xatua ni. Qaja ju koi Abasaloma ka hape: ‘Eni la hlue i nyipë joxu. Hnenge lo hna huliwa kowe la keme i nyipë, ngo enehila, hlue i nyipëti hë ni,’ qa ngöne lai, tro hë eö a atreine cil kowe la eamo i Ahitofela. 35 Nge ce eö memine la lue atre huuj, Zadoka me Abiathara e Ierusalema. Tro hë eö a qaja koi nyidro la hnei eö hna dreng hnine la hnalapa i joxu. 36 Nge tro fe eö a öhne la lue nekö i nyidro, Ahimaza nekö i Zadoka, me Ionathana nekö i Abiathara. Ce nyidroti fe me eö, matre tro eö a upi nyidro troa thuemacanyi ni la nöjei ewekë hnei eö hna dreng.” 37 Ame hnei Husai, sinee* i Dravita, hna lö e Ierusalema. Nge ce lö ju hi angeic me Abasaloma.