Ieremia
37 Hnei Zedekia joxu nekö i Iosea hna nyihna i Konia* nekö i Iehoiakima, ke hnei Nebukaneza* joxu ne Babulona hna acili angeic troa joxu ngöne la nöje Iudra. 2 Ngo xele kö angeic, me itre ka huliwa i angeic, me itre atrene la nöj, ma drenge la itre trengewekë hnei Iehova hna qaja jëne Ieremia perofeta.
3 Ame pe, hnei Zedekia joxu hna upi Iukala nekö i Selemia, me Zefania nekö i Maseia atre huuj, troa qaja koi Ieremia perofeta ka hape: “Pane thithi sai huni jë koi Iehova Akötresi së, matre troa kepe hun.” 4 Ngöne la ijine cili, Ieremia a trongëne la jë i angeic nyipine la nöj, ke tha ase pala kö akalabusi angeic. 5 Ngo hnene la trongene isi i Farao hna tro qa Aigupito. Matre ame hë la kola drenge lai hnene la angetre Kaledaia ka cile xötreithi Ierusalema, angatr a tro hmaca pi qa Ierusalema. 6 Ame hnei Iehova hna ewekë koi Ieremia perofeta me hape: 7 “Hane hi la hna qaja hnei Iehova Akötresi Isaraela: ‘Hane hi la hnei epuni hna troa qaja kowe la joxu ne Iudra ka upi epuni troa hnyingë ni ka hape: “Drenge ju la! Tro la trongene isi i Farao ka traqa troa xatua epun, a bëeke hmaca kowe la nöje i angatr e Aigupito. 8 Nge tro hë la angetre Kaledaia a bëeke hmaca troa lepe la traone ce. Tro angatr a thapa me dreuthetrij ej.” 9 Hane hi la hna qaja hnei Iehova: “The sipu iaö epuni kö me hape: ‘Tro la angetre Kaledaia a mejë qaathe së,’ ke tha tro jë kö angatre lai a mejë. 10 Ngacama tro ju hë epuni a ngaane la trongene isi i angetre Kaledaia, nge maine tro pe hi a lapa la itre ka eatr, ngo tro la itre atre cili a mejë hmaca me tro qa ngöne la itre itate i angatr, me dreuthetrije la traone celë.”’”
11 Matre ame hë la kola trotriji Ierusalema hnene la trongene isi i angetre Kaledaia, pine la trongene isi Farao, 12 hnei Ieremia hna thele troa tro qa Ierusalema kowe la nöje Beniamina, matre kapa la edrö i angeic ngöne la nöje i angeic. 13 Ngo ame ju hi la Ieremia perofeta a traqa kowe la qëhnelö i Beniamina, ke hna xolouthi angeic hnene la tan ne la itretre thup. Iria la ëje i nyidrë, lo nekö i Selemia, nekö i Hanania. Öni nyidrë koi angeic: “Atre kötr! Eö a mekun troa tro koi angetre Kaledaia!” 14 Sa jë hi Ieremia ka hape: “Waea, tha eni kö a tro koi angetre Kaledaia!” Ngo tha drei angeice kö hnei Iria. Hnei nyidrë hna othi Ieremia me tro sai angeic kowe la itre nekö i joxu. 15 Ame hna elëhni hnene la itre nekö i joxu, nge angatr a lepi Ieremia ju, me akalabusi* angeic ngöne la uma i Ionathana sekreter, lo hnei angatre hna nyi kalabusin. 16 Hna umë* Ieremia hnine la ketre hnahag ka ipië, nge hnei angeic hna lapa e cili koi nyimu drai.
17 Ame ngöne la ketre drai, hnei Zedekia joxu hna iup troa thei angeic, matre porotrike juetrë me angeic ngöne la uma i nyidrë. Öni nyidrë: “Hapeu, hetre hnei Iehova kö hna qaja koi ö?” Nge sa jë hi Ieremia, ka hape: “Öö!” Öni angeice hmaca jë hi: “Tro ha nue nyipë kowe la ime ne la joxu ne Babulona!”
18 Nge öni Ieremia hmaca jë hi koi Zedekia joxu: “Hnauëne la kola akalabusi ni? Nemene la ewekë ka ngazo hnenge hna kuca koi nyipë, me itre ka huliwa i nyipë, me kowe la nöje ce? 19 Ekaa pë hë lo itre perofeta i epun ka perofetan ka hape, ‘tha tro kö la joxu ne Babulona a lepi epun, memine la nöje ce’? 20 Haawe, pane drei ni ju joxu! Epi kapa hnei nyipëti la sipong. The upi ni hmaca kö kowe la uma i Ionathana sekreter, wanga tro ni a mec e cili.” 21 Ame hnei Zedekia joxu hna iup troa akalabusi Ieremia ngöne la kur ne la Itre Ka Thup. Nge e nöjei drai, hna thue falawa i Ieremia qa ngöne la gojenyine la itre ka sa falawa, uti hë la kola pë falawa ngöne la traon. Nge angeic a lapa ju ngöne la kur ne la Itre Ka Thup.