Daniela

1 Ame ngöne la hnaakönine macatre ne mus i Iehoiakima joxu ne Iudra, hnei Nebukaneza joxu ne Babulona hna traqa troa thapa la traon ne Ierusalema. 2 Hnei Iehova pë hë hna nue Iehoiakima joxu ne Iudra koi angeic, me itre ewekë qa ngöne la uma ne hmi ne la nyipi Akötresie. Matre hnei Nebukaneza joxu hna xome la itre ewekë cili a tro Sinara,* lo uma hmitrötr ne la haze i angeic, me amë itre ej ngöne la hnë ami trengamo ne la haze i angeic.

3 Thupene lai, hnei Nebukaneza hna upi Asepenaza, tane ka tru ne la hnalapa i nyidrë, troa traqa sai angetre Isaraela,* ene lo itre ka fetra qa ngöne la fami i joxu, maine itre nekön ne la itre atr ka tru ne Iudra. 4 Kolo itre nekö trahmanyi* ka pë ethan, nge ka mingöming, ka inamacan, me lai he, nge ka atreine waiewekë, nge ka ijij troa huliwa ngöne la hnanyijoxu. Nge tro pë hë Asepenaza a ini angatr troa cinyanyin me ithanatan la qene Kaledaia. 5 Nge ketre, hnene la joxu hna iup troa hamë angatr e nöjei drai la itre nyipi xen, me waina qa ngöne la laulau i nyidrë. Tro angatr a ini* koi köni macatre, nge thupene lai, tro hë angatr a huliwa koi joxu.

6 Thei angatre la itre xaa nekö trahmany qa ngöne la tribu* ne Iudra: ene Daniela,* me Hanania,* me Misaela,* me Azaria.* 7 Ame hnene la tane ka tru ne la hnalapa i joxu hna hamë ëje i angatr*: Beletisaza koi Daniela, Saderaka koi Hanania, Mesaka koi Misaela, nge Abedenego koi Azaria.

8 Ngo hnei Daniela pe hna axeciën e kuhu hni i angeic laka, tha tro kö a apuingazonyi* angeic hnene la itre xeni ka lolo, me waina qa ngöne la laulau i joxu. Ame hnei angeic hna sipon kowe la tane ka tru ne la hnalapa i joxu, matre tha tro kö angeic a xen la itre xeni cili, wanga puingazo jë angeic. 9 Matre hnene la nyipi Akötresie hna kuca matre tro la tane ka tru ne la hnalapa i joxu, a hnimi* Daniela me kuca hnyawa angeic. 10 Ngo önine jë hi lai tan koi Daniela ka hape: “Eni a xoue joxu, ke nyidrëti la ka iën la nyine tro epuni a xeni me ij. Tro pë hë nyidrëti a ue elany, e öhne hë nyidrë laka, kucakuca catr epun hune la itre xaa nekö* trahmany ka ce xötr me epun? Pi epun, tro hë nyidrëti a upezö ni.” 11 Ame hnei Daniela hna ithanata kowe la atre thup hna acil hnene la tane ka tru ne la hnalapa i joxu, lo hna ahnithi Daniela kow, me Hanania, me Misaela, me Azaria. Öni angeic: 12 “Eni a sipo nyipë, pane tupathe ju koi 10 lao drai, troa thue a i eahuni legim me tim. 13 Nge thupene la itre drai cili, tro pë hë nyipëti a goeëne la itre iqëmeke hun, memine la itre iqëmeke ne la itre nekö* trahmany ka xen la itre xeni ka lolo qa ngöne la laulau i joxu. Nge e cili, qanyi nyipëti kö wang me iëne la nyine troa kuca.”

14 Ame hnei nyidrëti hna kapa la sipo i angatr, me tupathe koi 10 lao drai. 15 Matre thupene la itre drai cili, lolo hmaca ju kö la itre iqëmeke i angatr, nge egöcatre* ju kö angatr hune la itre xaa nekö* trahmany ka xeni la itre a i joxu. 16 Matre hnene pë hë la atre thup hna xome hmaca la itre xeni ka lolo me waina, me nyihnan hnei legim. 17 Nge hnene la nyipi Akötresie hna hamën kowe la itre nekö* trahmanyi cili la inamacan, me atrehmekun, me atreine thelewekë göne la nöjei hna cinyianyin;* nge hna aijijë Daniela troa trotrohnine la itre hna meköle goeën me itre pu.

18 Ame ju hi la kola traqa kowe la ijin hna sa hnei Nebukaneza joxu, troa lö fë la itre nekö trahmany, hnene la tane ka tru ne la hnalapa i joxu hna lö sai angatr koi nyidrë. 19 Nge hnei joxu hna porotrike me angatr, nge pëkö ala cas ka hane tui Daniela, me Hanania, me Misaela, me Azaria; matre hna xomi angatre pë hë troa huliwa i joxu. 20 Nge e tro la joxu a hnying koi angatr göne la nöjei pengöne jol, ke sisitria hmaca kö la aqane inamacan me lai he i angatr, hune la itretre huuj ka kuci iöni, me itre ka ithanata me itre u, ngöne la baselaia i nyidrë. 21 Nge hnei Daniela hna lapa e cili uti hë la pane macatre ne mus i Koreso joxu.