Zakaria
4 Hnene lo angela ka ithanata me eni hna bëeke hmaca, me ahlë ni tune la kola ahlëne la atr ka meköl. 2 Hnei angeic hna hnyingë ni ka hape: “Nemene la hnei ö hna öhn?”
Öninge jë hi: “Eni a öhne la ketre ita ne laame gool, nge hetre kap e koho hun. Hetrenyi la 7 lao laam hune la ita ne laam, eje hi 7 lao laam, nge hetreny hun itre ej la 7 lao tuio. 3 Nge ezine la ita ne laam, hetrenyi la lue ioliv, cas ngöne la götrane maca ne la kap, nge ketre ngöne la götrane mi.”
4 Matre hnenge hna hnyingëne kowe la angela ka ithanata me eni ka hape: “Joxung, nemene la aliene la itre ewekë cili?” 5 Önine la angela ka ithanata me eni ka hape: “Thatre kö eö la hna nyihatren hnene la itre ewekë cili?”
Öning: “Waea, joxung.”
6 Öni angeice jë hi koi ni: “Hane hi la hnei Iehova hna qaja koi Zerubabela: ‘“Tha tro kö a eatrëne lai hnene la itre trongene isi me itre trengecatre i atr, ngo hnene la uang,” öni Iehova joxu ne la itre trongene isi e hnengödrai. 7 Drei lae eö, wetr ka tru? Qëmekei Zerubabela, tro eö a tune la ketre nöj gaa paapa.* Nge tro angeic a traqa fë la etë tixenuë e koho hun, nyipine la itre ka isuenyi ka hape: “Ka mingöming! Ka mingöming!”’”
8 Nge hnei Iehova hmaca hna ithanata koi ni. Öni nyidrë: 9 “Lue ime i Zerubabela la ka ami trepene la uma celë, nge lue ime i angeic hmaca kö la ka troa afenesin. Nge tro hë epuni a atre ka hape, Iehova joxu ne la itre trongene isi e hnengödrai la ka upi ni koi epun. 10 Ke drei la ka wangacon la ijine kola nyiqane eköthe hmidran* la huliwa? Eje hi, tro hë angatr a madrin me öhne la tulu ne acile* ngöne la ime i Zerubabela. Nge ame pena lo 7 lao alamek, ke itre alameke i Iehova ka nyapëne la fen.”
11 Thupene lai, hnenge hna hnyingë angeic ka hape: “Nemene la hna nyihatren hnene la lue ioliv ngöne la götrane maca me götrane mi ne la ita ne laam?” 12 Hnenge hmaca hna hnyingë angeic ka hape: “Nge nemene la itre picin* ne oliv ka anenine la oel gool qa ngöne la lue tuio gool?”
13 Öni angeice jë hi koi ni: “Thatre kö eö la hna nyihatren hnene la itre ewekë cili?”
Öning: “Waea, joxung.”
14 Öni angeic: “Kolo lue hna iën* ka cil ezine la Joxu ne la fene hnengödrai asë.”