Iosua
8 Ame hnei Iehova hna qaja koi Iosua ka hape: “The xou kö, nge the hmengöhmengöne kö. Ce tro jë memine la itre soc asë troa lepe la traon ne Ai. Nge goeën! Ase hë ni nue koi ö la joxu ne Ai, memine la nöj me traone i angeic, me zi i angeic. 2 Tro eö a kuca kowe la traon ne Ai me kowe la joxu i angeic, tune lo hnei ö hna kuca koi Ieriko memine la joxu i angeic. Ngo enehila, ijiji epuni hë troa xome la itre trengamo, me itre si i angatr. Upe jë la itre xaa soc troa zae tröne la traon, matre trathethi angatr.”
3 Ame hnei Iosua me itre soc asë hna elë a tro Ai troa lepe la traon. Hnei Iosua hna iëne la 30 000 lao soc ka catr, me upi angatr e jidr. 4 Nge öni angeice jë hi: “Pane dreng, tro epuni a zae tröne la traon. The lapa ananyine kö la traon, nge hnëkë jë. 5 Tro ni memine la itre xaa soc a easenyine la traon. Nge, e tro la itre ithupëjia a uti koi hun, ke tro huni a kötr tun e cili lo. 6 Tro hë angatr a weje huzu hun, nge tro huni a xom ananyi angatre qa lai. E cili, tro angatr a qaja ka hape: ‘Angatre mina a kötre së.’ Nge nyipici hi, tro huni a kötre angatr. 7 Ngo ijine tro hi epuni lai a mejë qa ngöne la hnei epuni hna zae, matre thapa la traon, ke tro Iehova Akötresi epun a nue ej koi epun. 8 Ame hë la epuni a ase thapa la traon, tro hë epuni a manith ej. Tro epuni a kuca tune lo hnei Iehova hna amekötin koi epun. Celë hi la hnenge hna amekötin.”
9 Ame hnei Iosua hna upi angatr, nge hnei angatre hna tro uti hë la hnë zae. Hnei angatre hna zae nyipin e Ai me Bethela, ngöne la götrane kuë ne Ai. Ngo ame kö Iosua, hnei angeic hna pane mano lai heji cili memine la itre xaa soc.
10 Ame hnei Iosua hna canga ilë, me acasine la itre soce i angeic. Nge hnei angeic me itre qatr ne Isaraela, hna tro sai angatr a tro Ai. 11 Ame hnene la itre soc asë ka ce me angeic, hna elë me cil qëmekene la traon. Hnei angatre hna acile la lapa i angatr ngöne la götrane kolopi e Ai. Nge hetre hnathup nyipi angatr memine la traon. 12 Ngo ngöne la ijine cili, hnei Iosua hna upe la 5 000 lao soc troa zae nyipine Bethela me Ai, ngöne la götrane kuë ne la traon. 13 Matre hnene la trongene isi hna acile la lapa ka tru i angatr, ngöne la götrane kolopi ne la traon. Nge ame kö la itre xaa soc, ke hnei angatre hna cil ngöne la götrane kuë ne la traon. Ngöne la jidri cili, hnei Iosua hna tro nyipine la hnathup.
14 Matre ame ju hi la kola öhne lai hnene la joxu ne Ai, hnei angeic me itre trahmanyi ne la traon hna canga tro e sine hmakany, troa isi memine la angetre Isaraela. Hnene la lue trongene isi hna itronyi ngöne la ketre götrane gaa draië ne la hnathup. Ngo thatre pe la joxu ne Ai laka, hetre soce ka zae tröne la traon. 15 Ame ju hi la kola uti koi angatr hnene la itre trahmanyi ne Ai, hnei Iosua me angetre Isaraela asë hna ce kötre kowe la gojenyi ka tro kowe la hnapapa. 16 Matre hna hëne fe la itre trahmanyi ka lapa pe hnine la traon ne Ai, troa weje huzune la angetre Isaraela. Ame hnei angatre hna weje huzu Iosua, uti hnyawa la angatr a nanyi qa ngöne la traon. 17 Pë hnyawa ha ca trahmanyi e Ai me e Bethela; hnei angatr asë hi hna tro troa weje huzune la angetre Isaraela, matre hna fe angangan pe hi la qëhnelö ne la traon.
18 Ame hnei Iehova hna qaja koi Iosua ka hape: “Köjane pi la traon ne Ai memine la jo hnei ö hna ea, ke tro hë ni a nue la traone koi ö.” Matre hnei Iosua hna köjane la traon memine la jo ka eje ngöne la iwanakoime i angeic. 19 Nge ame ju hi la angeic a saathe la ime i angeic, hnene la itre soc ka zae, hna mejë me canga nyinyap troa thapa la traon, me manith ej.
20 Matre ame hë la itre trahmanyi ne Ai a xei, öhne ju hi angatr la kola elë draië la so ne eë qa ngöne la traon, matre thatre ju hi angatr troa kötre ië. Thupene lai, hnene la itre soce i Iosua ka kötre kowe la hnapapa hna ujë hmaca kowe la itre ka weji angatr. 21 Ke eje hi, ame lo Iosua memine la angetre Isaraela a öhne laka, ase hë lepe la traon hnene la itre soc ka zae, nge kola elë draië la so ne eë qa ngöne la traon, hnei angatre hna bëeke hmaca troa lepe la itre trahmanyi ne Ai. 22 Nge hnene la itre xaa soc qa Isaraela, hna tro qa ngöne la traon troa ixelë me angatr. Matre pë hmaca kö jë ne kötr ne la angetre Ai, ke kola cile xötreithi angatr hnene la angetre Isaraela. Hnene la angetre Isaraela hna humuthi angatr asë; pëkö ala cas ka mel, nge göi thatreine fe la ketre troa kötr. 23 Ngo mele pe kö la joxu ne Ai, matre hna tro sai angeic koi Iosua.
24 Hnene la angetre Isaraela hna humuth asë la angetre Ai ka weje huzu angatr uti hë la hnapapa, matre pëkö ca ka mele pe. Thupene lai, hnei angatr asë hna bëek a tro Ai, me lepe la traon hnei taua. 25 Traqa koi 12 000 lao atr hna humuth ngöne la drai cili, itre trahmany me föe, memine la nöjei atr ka lapa e cili. 26 Tha hnei Iosua pi kö hna sa la ime i angeic ka ea la jo, uti hë la kola apatren asë la itre atrene Ai. 27 Matre hnene la angetre Isaraela hna xome la itre öni me itre ewekë hnei angatre hna öhn ngöne la traone cili, tune lo hnei Iehova hna amekötin koi Iosua.
28 Thupene lai, hnei Iosua hna manithe la traon e Ai, matre itra etë pe hi; tha saze kö la traon uti hë la drai ce. 29 Nge hnei Iosua hna athipe la ngönetrei ka mec ne la joxu ne Ai hune la ketre sinöe uti hë e hej. Ame ju hi la kola lö la jö, hnei angeic hna upe troa autine la ngönetrei ne la joxu. Thupene lai, hna trije la ngönetrei i nyidrë ngöne la qëhnelö ne la traon, me juetrën hnei itra etë. Nge uti hë enehila, itre eje pala hi e cili.
30 Thupene lai, hnei Iosua hna acile la ketre ita ne huuj hune la wetre Ebala, thatraqai Iehova Akötresi Isaraela. 31 Hnei angeic hna xupe la ita ne huuj, tune lo hnei Mose hlue i Iehova hna amekötin kowe la angetre Isaraela, nge tune lo hna cinyianyin ngöne la itusi Wathebo i Mose, lo kola hape: “Maine tro eö a kuca la ita ne huuj hnei etë, tha tro kö eö a huliwane la etë hna thupathupa hnene la ketre jia ne huliwa fao.” Matre hnei angatre pë hë hna huujën e cili, la itre huuj ne dreuth asë* koi Iehova, me itre huuj ne tingeting.*
32 Thupene lai, hnei Iosua hna fejane hmaca e cili hune la itre etë, lo wathebo hnei Mose hna cinyianyin qëmekene la angetre Isaraela. 33 Ame asë hi la nöje Isaraela, me itre qatr, me itre tan ne la nöj, me itre ka iameköti, ke angatr a cil ngöne la lue götrane la Pua, qëmekene la itre atre huuj ne Levi ka xututhe* la pua ne isisinyikeu i Iehova. E cili fe la itre trenyiwa ka lapa thei angatr, me itre nekö i angetre Isaraela. Hetre ketre sin ka cil hmekune la wetre Garezim, me ketre sin ka cil hmekune la wetre Ebala, (tune lo hnei Mose hlue i Iehova hna amekötin ekö) matre troa amanathithine la nöje Isaraela. 34 Ase jë hi lai, hnei Iosua hna e catrën asë la trenge Wathebo, ene la itre manathith me itre hnëjin, thenge hnyawa hi lo hna cinyianyin ngöne la itusi Wathebo. 35 Ame asë hi la itre hnei Mose hna amekötin, ke pëkö ca hnaewekë hnei Iosua hna tha e qëmekene la icasikeu ne Isaraela. Nge e cili fe la itre föe, me ha nekönatr, memine la itre trenyiwa ka lapa* thene la angetre Isaraela.