Numera
16 Ame hnei Kora nekö i Izara, lo nekö i Kohatha, nekö i Levi, hna ce xöl me Dathana me Abirama lue nekö i Eliaba, ka ce xöle me Ona nekö i Peleth. Angatr la itre matra i Reubena. 2 Hnei angatr hna cil koi Mose memine la 250 lao atre Isaraela, ene la itre tan la nöj, me itre ka nyihatrene la icasikeu, me itre atr ka hlemu. 3 Ame hnei angatre hna ce uti koi Mose me Arona, me hape: “Hmanono hë huni koi epon! Ka hmitrötr asë hi la icasikeu, nge ce Iehova me angatr. Ngo hnauëne kö la epon a nyi joxu kowe la icasikeu i Iehova?”
4 Ame hë la Mose a drenge lai, kei qe ipië ju hi angeic. 5 Matre öni Mose koi Kora me itre sine xöle i angeic: “Ame elany hmakany, tro Iehova a amamane la sipu atre i nyidrë, drei la ka hmitrötr, nge drei la ka ijij troa easenyi nyidrë; ame la hnei nyidrëti hna troa iën, angeice hi la ka ijij troa easenyi nyidrë. 6 Ngo ame eö Kora me itre sine xöle i ö, traqa fë pi epun la itre trepene eë. 7 Nge ame elany, tro epuni a amelene itre ej, me dreu ka pui loi qëmekei Iehova; ame la atr hnei Iehova hna troa iën, ke angeice hi la ka hmitrötr. Tru pala ha la hnei epuni hna huliwa menu itre nekö i Levi!”
8 Matre öni Mose jë hi koi Kora: “Pane drenge ju, itre nekö i Levi. 9 Hapeu, tha ijije kö koi epuni Ia hna kuca hnene la Akötresi Isaraela, lo nyidrëti a aisa epun memine la nöj, me aijijë epuni troa easenyi nyidrë matre huliwa ngöne la uma maano i Iehova, me huliwa kowe la nöj? 10 Lo nyidrëti a aijijë eö me itre trejine me eö, itre nekö i Levi, troa easenyi nyidrë? Nge epuni pena a thele troa thapa la hnëqa ne atre huuj? 11 Celë hi matre, eö me itre sine xöle i ö a icasikeu, ke epuni a cil koi Iehova. Ngo ame pena Arona, drei angeic matre tro epuni a qeje angeic?”
12 E thupen, hnei Mose hna iup troa thei Dathana me Abirama, lue nekö i Eliaba, ngo öni nyidro: “Xele nyio! 13 Hapeu, tha ijije kö troa xomi hun qa ngöne la nöj ka neni gala la melek me miel, matre humuthi hun ngöne la hnapapa? Nge eö hmaca pena a pi musinë hun? 14 Qaja jë pe ka hape, ekaa ha lo nöj gaa neni gala la melek me miel, me itre hlapa, me hnënge vin nyine tro huni a kepe edrön? Hapeu, tro kö eö a atimekëne la nöjei atre ce? Waea, xele fe nyio ma hane tro!”
15 Ame hna elë catre la hni i Mose, nge öni angeic koi Iehova ka hape: “The xei kö troa goeëne la itre huuj ne wene feja i angatr, pëkö ca boliko hnenge hna thapa thei angatr, nge tha hnenge fe kö hna akötrën la ketre e angatr.”
16 E thupen, öni Mose koi Kora ka hape: “Elany, traqa pi qëmekei Iehova, me itre sine xöle i ö, me Arona. 17 Tro epuni a isa traqa fë trepene eë, me dreu sinöe ka pui loi e koho hun, me tro fë la 250 lao trepene eë qëmekei Iehova; tro fe eö me Arona a isa traqa fë trepene eë.” 18 Ame hnei angatr hna isa xomi trepene eë, me amelen itre ej, me dreu ka pui loi, me cil qëmekene la itat ne icasikeu ce me Mose me Arona. 19 Ame hë la Kora a ase acasine la itre sine xöle i angeic ngöne la hnë lö ne la itat ne icasikeu, mama pi hi la lolo i Iehova kowe la icasikeu asë.
20 Nge öni Iehova jë hi koi Mose me Arona: 21 “Iananyi pi me angatre la, matre tro ni a aca tro humuthi angatr asë.” 22 Ngo hnei nyidro hna kei qe ipië, me hape: “Akötresieti fe, Akötresie ka hamë mel kowe la nöjei atr asë, tro kö nyipëti a apatren asë la nöj pine la tria ne la ala cas?”
23 Matre sa jë hi Iehova koi Mose ka hape: 24 “Hape jë kowe la nöj: ‘Ananyine pi la itre itate i Kora, me Dathana, me Abirama!’”
25 Ame hnei Mose hna mejë me tro koi Dathana me Abirama, nge ce angeic me itre qatre ne Isaraela. 26 Öni angeice kowe la nöj: “Ananyine pi la itat ne la itre atr ce ka ngazo, nge the ketre kö la itre ewekë i angatr, wanga meci pi epun pine la ngazo i angatr.” 27 Ame hnei angatr hna canga ananyine la itre itate i Kora, me Dathana, me Abirama; hnei Dathana me Abirama hna tro kuhu qëhnelö me cil ngöne la hnë lö ne la itre itate i nyidro, me itre ifënekö i nyidro, me itre nekö i nyidro trahmany, me itre nekö i nyidro ka co.
28 Nge öni Mose jë hi: “Tro epuni a atre hnene la hatrene celë laka, Iehova la ka upi ni troa kuca la itre huliwa ce, ngo tha qaathenge* kö: 29 Maine tro la itre atr ce a mec tune la aqane meci ne la nöjei atr asë, nge maine ceitune hi la pun koi angatr me kowe la nöjei atr asë, kolo lai a hape, tha hna upi ni kö hnei Iehova. 30 Ngo maine tro Iehova a kuca la ewekë ka ketre pengön koi angatr, me fe angangane la ihnadro troa ulumi angatr me nöjei ewekë i angatr asë, nge e tro angatr a uti koi Hua* nge mele pala kö, haawe, tro hë epuni a atre e cili laka, tha hnei angatre kö hna metrötrë Iehova.”
31 Mose pala kö a ewekë, nge nganga pi hi la ihnadro fei angatr. 32 Hna nganga la ihnadro troa ulumi angatr, me itre fami i angatr, me nöjei atr ka ce me Kora, me itre ewekë i angatr. 33 Hnei angatr me nöjei atr ka ce me angatr, hna uti koi Hua* nge ka mele pala kö. Ame hna thinge hmaca ju la ihnadro hui angatr, nge patre pi hi angatr qa ngöne la nöj. 34 Matre ame hë la angetre Isaraela ka cile xötreithi angatr a dreng la kola isueny, angatr a kötre pi me hape: “Tro fe a hane ulumi së hnene la ihnadro!” 35 Ame hna xulu pi la eë qaathei Iehova, me dreuth apatrene la 250 lao trahmanyi ka dreu sinöe ka pui loi.
36 Matre öni Iehova jë hi koi Mose: 37 “Upi Eleazara jë nekö i Arona atre huuj, troa xome la itre trepene eë qa ngöne la eë, ke ka hmitrötr. Nge upi angeic jë fe troa thaeen la eë* e gaa nany. 38 Nge ame lo itre trepene eë ne la itre trahmanyi hna humuth pine angatre kuca la ngazo, ke tro ha kuci dröne fao memin matre heetrëne la ita ne huuj, ke hna tro fë koi Iehova la itre trepene cili, matre ka hmitrötre hë. Tro itre ej a ketre hatren kowe la angetre Isaraela.” 39 Ame hnei Eleazara atre huuj, hna xome la itre trepene eë kopa hna tro fë hnene lo itre trahmanyi hna dreuth apatren, me lepelep hnei hama matre heetrëne la ita ne huuj, 40 tune lo hnei Iehova hna upi angeic jëne Mose. Tro lai a amekunëne la angetre Isaraela laka, ame la itre atre ka tha ijij,* ene la itre atr ka tha sine la itre matra i Arona, tha tro kö angatr a easenyi troa dreu sinöe ka pui loi qëmekei Iehova, nge tha tro kö la ketre atr a tui Kora me itre sine xöle i angeic.
41 Ngöne ju kö la drai thupen, hnene la nöje Isaraela hna eetr* koi Mose me Arona. Öni angatr: “Epone hi la ka humuth la nöje i Iehova!” 42 Ame hë la nöje Isaraela a ce uti koi Mose me Arona, hnei angatr hna xei kowe la itate ne icasikeu. Öhne ju hi angatr la iaw a heetrën ej, nge mama pi hi la lolo i Iehova.
43 Ame hnei Mose me Arona hna tro kowe la hnë lö ne la itat ne icasikeu, 44 nge öni Iehova koi Mose: 45 “Pane ezi pi epon qaathene la nöj, matre tro ni a aca tro apatrenyi angatr.” Ame hnei nyidroti hna kei qe ipië. 46 Nge öni Mose jë hi koi Arona ka hape: “Xome ju la trepene eë, nge ami eë ju qa ngöne la ita ne huuj, amë ju fe la sinöe ka pui loi, nge canga tro jë kowe la nöj. Kuca jë la huuj ne ialoinekeun thatraqai angatr, ke elëhni catre Iehova, kolo ha nyiqaane lepe la nöj hnene la mec ka ixötrekeu!” 47 Matre hnei Arona hna canga xome la trepene eë, tune lo hna upi angeic hnei Mose, me nyenyape fë nyipine la nöj, ke eje hi, kolo ha lepe la nöj hnene la mec ka ixötrekeu. Angeic a amë ju la sinöe ka pui loi hune la trepene eë, me nyiqaane kuca la huuj ne ialoinekeun thatraqane la nöj. 48 Nge angeic a cil nyipine la itre ka mec me itre ka mel, ame hna patre pi la mec ka ixötrekeu. 49 Matre traqa koi 14 700 la itre ka mec hnene la mec ka ixötrekeu, nge hetre itre xane kö ka mec hnei Kora. 50 Ame hë la Arona a bëeke hmaca koi Mose, ngöne la hnë lö ne la itat ne icasikeu, ke patre hë lo mec ka ixötrekeu.