Ieremia
20 Ngo hnei Pasur nekö i Imer, atre huuj nge tane la itre ka thupën la uma ne hmi i Iehova, hna drenge la Ieremia a perofetane la itre ewekë cili. 2 Ame hnei Pasur hna xe Ieremia perofeta, me othi angeic ngöne la inehe ne iaxösisi,* ka ej ngöne la qëhnelö ka he hun ne Beniamina, lo ka tro kowe la uma ne hmi i Iehova. 3 Ngo ame hë la drai thupen, hnei Pasur hna sei Ieremia qa ngöne la inehe ne iaxösisi. Matre öni Ieremia jë hi:
“Tha hnei Iehova kö hna hë eö ka hape, Pasur, ngo Xou Xötreith. 4 Ke hane hi la hna qaja hnei Iehova: ‘Tro ni a kuca matre tro eö me itre sinee i ö a xou pine la itre ewekë ka traqa koi ö; tro la itre ithupëjia me angatr a humuthi angatr hnei taua qëmekei ö. Tro ni a nue la angetre Iudra asë kowe la joxu ne Babulona; tro angeic kötre sai angatr a tro Babulona, me humuthi angatr hnei taua. 5 Eje hi, tro ni a hamën kowe la itre ithupëjia, la itre trengamo ne la traone ce, me itre ewekë ne ej, me itre ewekë ka sisitria, me itre trengamo ne la itre joxu ne Iudra. Nge tro angatr a atrekënö la itre ewekë cili, me thapa, me xom asë a tro Babulona. 6 Ngo ame pena eö Pasur, me itre atrene la hnalapa i ö, ke tro ha kötre sai epun. Tro hë eö a tro Babulona me meci e cili. Nge e cili hi la hna troa kelemi ö me itre sinee i ö, pine eö perofetane la itre trengathoi.’”
7 Iehova fe, hnei nyipëti hna iaö ni, nge tha öhne kö ni.
Hnei nyipëti hna amamane la ecatre i nyipë, nge hune kö nyipë.
Ngöne la drai ka pexej, kolo pala hi a qenahmo ni;
Angatr asë hi a hnyimasai ni.
8 Ke e tro ni a ithanata, tro pala hi ni a sue me hape,
“Iakötrë me iapatreny!”
Pine la trengewekë i Iehova, meci hë ni hna lapaa qaqan me qenexetihen.
9 Celë hi matre öning: “Tha tro hmaca kö ni a qeje nyidrë,
Nge tha tro hmaca kö ni a ithanata ngöne la ëje i nyidrë.”
Ngazo pe, kösë eë e kuhu hning la trengewekë i nyidrë. Ceitun ej me eë ka mel ngöne la itre juneng,
Nge thatreine hë ni troa xomihnin;
Thatreine hë ni troa lapa thaup.
10 Eje hi, tru catre la itre trenge ithanata ka iakötrë hnenge hna dreng;
Hna kanothi ni hnene la xou.
“Qejeqeje angeice jë, öi, qejeqeje angeice jë!”
Ame asë hi la itre ka qeje tingeting koi ni, aja i angatre pe tro ni a kei:
“Maine tro angeic elanyi a tria,
Ka eatre hë angeice lai, ke tro sa të koi angeic.”
11 Ngo ce Iehova kö me eni tune la soc hna xouen.
Celë hi matre, tro ha kei la itre ka axösisi ni. Tha tro kö angatr a hun.
Tro ha tru la hmahma i angatr, ke tha tro kö a eatr lo aja i angatr.
Tro ha epine palua la hmahma i angatr; tha tro jë kö a thëthëhmin ej.
12 Ngo ame kö nyipë, Iehova joxu ne la itre trongene isi e hnengödrai, nyipëti a waipengöne la atr ka meköt;
Öhne hi nyipëti la hni me itre mekun ka sihngödr.*
Aijijë ni jë troa goeën la nyipëti a të la ngazo i angatr,
Ke hnenge hna nue koi nyipë troa kootrë ni.
13 Nyima jë koi Iehova! Atrunyi Iehova jë!
Ke hnei nyidrëti hna amelene la itre ka pë ewekë qa ngöne la ime ne la itre ka iakötrë.
14 Epi troa hnëjine la drai ne hnaho ni!
Epi tha tro kö a manathithi la drai ne hnaho ni hnei nenë!
15 Epi troa hnëjine la atre amadrinë kaka hnene la maca celë:
“Traqa ha la nekönatr, nekö trahmany!”
16 Epi tro la atr cili a tune la itre traon hnei Iehova hna apatren, nge tha hna mekune* hmaca kö.
Epi tro angeic a drenge la kola isueny e hmakany, me ufi trutru e midi.
17 Hnauëne laka, tha hna ameci ni kö e kuhu hni i nenë,
Matre tro eahlo a nyi huang
Me lapa fë upune uti hë mec?
18 Nyine u lo eni a hulia qa kuhu hni i nenë
Matre troa goeëne la akötr me hleuhleu,
Me nyipune la meleng ngöne la hmahma?