Deuteronomi

10 “Ame ngöne la ijin cili, öni Iehova koi ni: ‘Sa pi la lue sine etë tune lo hnapan, nge elë jë koi ni hune la wetr. Tro fe eö a cane la neköi pua* sinöe. 2 Tro pë hë ni a cinyianyin hune la lue sine etë cili, lo itre trengewekë hna cinyianyin ngöne lo lue sine etë hnapan, lo hnei ö hna thëtrij. Nge qa i ö troa qatreng itre ej hnine la pua.’ 3 Ame hnenge hna cane la ketre pua hnei sinöe akasia, me sa la lue sine etë tune lo hnapan, nge hnenge hna elë fë hune la wetr. 4 Matre hnei Iehova hna cinyianyin hune la lue sine etë, la itre trengewekë hna cinyianyine hë, ene lo 10 lao Wathebo,* lo hnei Iehova hna qaja koi epun hune la wetr, nyipine la eë, ngöne lo epuni a icasikeu; thupene lai, hnei nyidrëti hna hamë ni la lue sine etë. 5 Ame hnenge hna uti qa hune la wetr. Nge tune la hna upi ni hnei Iehova, hnenge hna amë la lue sine etë hnine la pua, lo hnenge hna can. Nge lue eje pala hi e kuhu hnine la pua.

6 “Thupene lai, hnene la angetre Isaraela hna tro qa Berotha Bene-Iakana a tro Mosera. E cili hi la hna mec hnei Arona, nge hna kelemi angeic. Eleazara nekö i angeic pena ha la ka nyihnai angeic troa atre huuj. 7 Qa cili, hnei angatr hna tro Gudagoda, nge qa Gudagoda hnei angatr hna tro Iotebath, ketre nöj gaa hetre tim.

8 “Ngöne la ijine cili, hnei Iehova hna ketre amë la tribu i Levi, matre tro angatr a xututhe la pua ne isisinyikeu i Iehova, me cil qëmekei Iehova matre nyihlue i nyidrë, me amanathithin ngöne la ëje i nyidrë. Celë hi hnei angatr hna kuca uti hë enehila. 9 Celë hi matre pëkö edrö i Levi thene la itre trejin me angeic. Iehova hi la edrö i angeic, tune lo hnei Iehova Akötresi ö hna qaja koi angeic. 10 Ngo ame kö ni, hnenge hna lapa hune la wetr koi 40 lao drai me 40 lao jidr, tun e cili lo. Nge hnei Iehova hmaca hna drei ni ngöne la ijine cili. Ase hë Iehova axeciën ka hape, tha tro kö a apatrenyi ö. 11 Thupene lai, öni Iehova koi ni: ‘Tro jë! Eatrongëne jë la nöj, matre tro angatr a thapa la nöj hnenge hna sisiny troa hamën kowe la itre qaaqaa i angatr.’

12 “Ame enehila Isaraela fe, nemene la hnei Iehova Akötresi ö hna ajan tro eö a kuca? Casi hi: ene la troa xoue* Iehova Akötresi ö, me trongëne la itre jë i nyidrë, me hnimi nyidrë, me nyihlue i Iehova Akötresi ö hnene la hni i ö ka pexej, me mele i ö ka pexej, 13 me trongëne la itre hna amekötin, me itre wathebo i Iehova hnenge hna hamë eö enehila, matre nyine loi koi ö. 14 Pane drenge ju: Ame la hnengödrai, ene la hnengödrai ne la itre hnengödrai,* memine la ihnadro, memin asë la nöjei ewekë ka eje hune la ihnadro, ke itre ewekë i Iehova Akötresi ö lai. 15 Ngo hnei Iehova hi hna mama kowe la itre qaaqaa i ö, me amamane la ihnimi nyidrë koi angatr hmekuje hi; eö hi la matra i angatr, hnei nyidrëti hna iën qa ngöne la itre xaa nöj. Nge ewekë i nyidrëti hë eö enehila. 16 Haawe, qa i ö troa ahmitrötrëne* la hni i ö, nge loi ju hë hna catre he.* 17 Ke ame Iehova Akötresi ö, nyidrëti hi la Akötresie ne la itre akötresie, me Joxu ne la itre joxu, nge Akötresie ka draië me ka trene men, nge hna xouen, nge tha ka ië hna hnime kö, nge tha ka iameköti kö göi thupen. 18 Nyidrëti a isigöline la nekön hna mecitrij hnei kem, memine la sine föe. Nyidrëti a hnime la trenyiwa me thua i angeic, me heetrë angeic. 19 Ketre tui ö fe, qa i ö troa hnime la trenyiwa, ke ketre trenyiwa eö ekö e Aigupito.

20 “Iehova Akötresi ö la nyine tro eö a xouen, nyidrëti hmekuje hi la nyine tro eö a nyihluen, nyidrëti hi la nyine tro eö a qale kow, nge tro hi ö a sisiny ngöne la ëje i nyidrë. 21 Nyidrëti hi la nyine tro eö a atrun. Nyidrëti hi la Akötresi ö, atre kuca la nöjei ewekë ka tru nge hna hain, lo hnei ö hna sipu öhn hnene la luemeke i ö. 22 Ame lo itre qaaqaa i ö a ut qa Aigupito, ke ala 70 hi angatr, ngo ame hë enehila, hnei Iehova Akötresi ö hna kuca matre ala nyimu jë eö, tune la itre wëtresij ne hnengödrai.