Hnaaluene Tus Kowe La Angetre Korinito
10 Ajane catre ni tro nyipunieti a trongëne la hnenge hna qaja koi nyipunie. Ame la eni a ithanata koi nyipunie, eni hi lai a nyitipu Keriso, atre ipië me menyik. Ngo itre xan thei nyipunie a mekune ka hape, ka kucakuca ni e ce eni me nyipunie, ngo e patre hë ni, tha cile kö ni troa hamë ithanata ka catr koi nyipunie ngöne la tusing. 2 Ngo eni pe a ajane laka, e traqa jë ni, saze hë la mekuna ne la itretre mekune ka hape, eahuni a tro thenge la ngönetrei. Qa ngöne lai, tha tro kö a catre la ihajinge koi angatr. 3 Ke ngacama eahuni a mel ngöne la ngönetrei, ngo tha eahuni kö a isi thenge la ngönetrei. 4 Nge ame la itre jia ne isi së, tre tha qaathei atre kö, ngo ka mene pe qaathei Akötresie matre atreine së akeine la itre itra etë atraqatr. 5 Ke easë a lepetrije la nöjei mekun, me nöjei ewekë asë ka draië, nge ka cil kowe la atrehmekune qaathei Akötresie. Nge easë a xomacone la nöjei mekun asë troa drengethenge Keriso. 6 Nge e pexeje hë la aqane idrengethenge i nyipunie, ka hnëkë fe hë huni troa amekötine la itre ka tha idrei.
7 Nyipunieti a amekötine la itre ewekë thenge la ka mama. Haawe, maine ka xecie hnyawa koi ketre ka hape, atre i Keriso angeic, loi e tro hmaca fe angeic a mekune ka hape: Tui angeic, itre atr i Keriso fe hun. 8 Hnene la Joxu hna aijijë huni troa mus, ene la troa acatrene la lapaune i nyipunie, ngo tha göi tro kö a ahacenyi nyipunie. Nge maine nyipici laka, eni a nango mama fë la mus hne huni hna kapa, ame pe, tha hmahma kö ni. 9 Ngo tha ajange kö tro nyipunieti a mekune ka hape, eni a thele troa axouenyi nyipunie jëne la itre tusing. 10 Ke öni itre xane ka hape: “Ka catr nge ka men la itre tusi angeic, ngo ka meij angeic, nge ka pujehnine e troa ithanata.” 11 Haawe, loi e tro la itre ka qaja lai a atre laka,* ame la hne huni hna cinyihane ngöne la itre tus, celë hi hne huni hna troa kuca e traqa pi hun. 12 Nge xele huni troa ce e hun, me aceitunë huni me itre ka sipu selën. Ke angatr a waipengö i angatr thenge la ka loi koi angatr, matre mama pi hi ka hape, itre hmo angatr.
13 Ngo ame eahun, tha tro kö huni a sasaithi tulu göi aqane troa selë hun, ngo tro huni a iselë thenge la itre ewekë hnei Akötresie hna ahnithe* koi hun. Nge nyipunieti fe hi la itre xan. 14 Nyipici, tha eahuni kö a sasaithe la hna ahnithe koi hun e tro huni a traqa koi nyipunie, kösë tha hna ahnithi nyipunieti kö koi hun. Ke eahuni lo itre ka traqa pa koi nyipunie troa tro fë la maca ka loi göi Keriso. 15 Ame la eahuni a sipu selë hun, tha eahuni kö a sasaithe la hna ahnithe koi hun, ke tha eahuni kö a selë hun pine la hna kuca hnei ketre. Ngo eahuni pe a ajane troa kökötre pala hi la lapaune i nyipunie, matre tro fe a kökötre la huliwa hun ngöne la itre götrane hna ahnithe koi hun. 16 Qa ngöne lai, tro hë huni a cainöjëne la maca ka loi ngöne la itre nöj xötreithi nyipunie, matre tha tro kö huni a sipu selë hun pine la götran hna hnëkëne hë, me hna ahnithe koi ketre. 17 “Ngo ame la atre selën, loi e tro angeic a iselë pi Iehova.”* 18 Ke ame la atre hna kapa, tre tha kolo kö lo atre ka sipu selë angeice kö, ngo kolo pe lo hna qaja aloin hnei Iehova.*