Deuteronomi

18 Ame la itre atre huuj, ene la tribu ne Levi asë, tha tro kö a hetre edrö me zi i angatr e Isaraela. Tro angatr a öni la itre huuj ne eë koi Iehova, ke edrö i angatr la itre huuje cili. 2 Tha tro kö a hetre edrö i angatr thene la itre trejin me angatr, ke Iehova hi la edrö i angatr, tune lo hnei nyidrëti hna qaja koi angatr.

3 “Hane hi la itre ewekë nyine tro la nöj a hamëne kowe la itre atre huuj: Tro la atr ka huujëne la ketre kau maine mamoe, a hamëne kowe la atre huuj la inaean, memine la itre itrasitr, me trengenan. 4 Tro fe eö a hamë angeic la itre pane wen* ne la itre wene feja i ö, me waina i ö ka hnyipixe, me oele i ö, memine la itre pen hna pane xöj ne la itre öni ka co i ö. 5 Ke hnei Iehova Akötresi ö hna ië Levi me itre nekö i angeic qa ngöne la itre tribu asë, matre tro pala hi angatr a huliwa ngöne la ëje i Iehova.

6 “Ngo maine tro la ketre atre Levi a tro qa ngöne la ketre traon e Israraela, lo hnei angeic hna lapan, nge angeic a mekun troa tro kowe la götran hnei Iehova hna iën,* 7 ijiji angeice hi troa huliwa ngöne la götrane cili ngöne la ëje i Iehova Akötresi angeic, tune la itre trejin me angeic, lo angetre Levi ka cil e cili qëmekei Iehova. 8 Tro pala hi angeic a kapa la xen ka ihmeku memine la itre trejin me angeic, ngacama hetre hnei angeice hë hna kapa qa ngöne la hna salemëne la itre ewekë ne la itre qaaqaa i angeic.

9 “E traqa ha eö ngöne la nöj hnei Iehova Akötresi ö hna troa hamë eö, tha tro kö eö a xome la thiina ka sis ne la itre nöje cili. 10 Nge tha tro kö a hetrenyi thei ö la atr ka dreuth la nekö i angeic trahmany maine jajiny, nge ka kuci haze, me kuci iöni, me thele hatren, nge ka trene iöni, 11 me ieji, me ka tro troa wange la itre mediom, me itre ka qajaqaja la drai elany, me itre ka ithanata me itre ka mec. 12 Ke methi Iehova la atre kuca la itre ewekë cili. Nge pine laka, hnene la itre nöje cili hna kuca la itre ewekë ka sis, matre Iehova Akötresi ö a helë angatr qëmekei ö. 13 Ngo qa i ö pe troa mele nyipici* qëmekei Iehova Akötresi ö.

14 “Ame la itre nöj hnei ö hna thapa, ke hnei angatr hna majemine drenge la itre ka kuci haze, me itre ka kuci iöni, ngo tha tro kö Iehova Akötresi ö a nue eö troa kuca tun. 15 Tro Iehova Akötresi ö a axulun thatraqai ö la ketre perofeta ka tung, qaathene la itre trejin me eö. Nge qa i ö troa drei angeic. 16 Ke celë hi lo sipo i ö koi Iehova Akötresi ö e Horeba, ngöne lo drai ne kola icasikeu la nöj, lo öni ö ka hape: ‘Xele hë ni ma dreng la nine Iehova Akötresing, me goeëne la eë atraqatr, wanga meci pi ni.’ 17 Matre öni Iehova jë hi koi ni: ‘Ka meköti hi la hnei angatr hna qaja. 18 Matre tro hë ni a axulune la ketre perofeta ka tui ö qaathene la itre trejin me angatr. Nge tro ni a amë la itre trengewekëng ngöne la që i angeic, matre tro angeic a qaja koi angatr la nöjei ewekë hnenge hna ahnithe koi angeic. 19 Ngo ame pë hë la atr ka xele ma drenge la itre trengewekë hnei angeic hna qaja ngöne la ëjeng, ke tro hë ni a hnyingë pengöne la atre cili.

20 “‘Maine tro la ketre perofeta a pi tru me qaja menun la ketre trengewekë ngöne la ëjeng, ngo tha hnenge kö hna upi angeic, nge maine angeic a perofetan ngöne la ëje ne la itre xaa haze, ke tro ha humuthe la perofeta cili. 21 Ngo maine jë, eö a hnying ka hape: “Tro sa atre tune kaa laka, tha hnei Iehova kö hna qaja la trengewekë cili?” 22 Maine tro la perofeta a ewekë ngöne la ëje i Iehova, nge tria kö la hnei angeic hna qaja, nge tha eatre kö, kolo lai a hape, tha qaathei Iehova kö la trengewekë celë. Hnene lai perofeta hna pi tru. Tha tro kö eö a xoue angeic.’