Isaia
7 Ngöne la ijine i Ahaza Joxu ne Iudra, nekö i Iotham, nekö i Uzia, hnei Rezina joxu ne Suria, me Peka joxu ne Isaraela, nekö i Remalia, hna elë troa isi me Ierusalema, ngo tha hune ju kö angatr.* 2 Ame hna thuemacane la hnalapa i Dravita ka hape: “Hnene la angetre Suria hna ce xöl me angetre Eferaima.”
Ame hna enienij la hni i Ahaza memine la nöj, tune la aqane enienij la itre sinöe hna ufe hnei eny ngöne la hnaxulu.
3 Nge hnei Iehova hna qaja koi Isaia ka hape: “Eni a sipo eö, pane tro jë me Sear-Iasub* nekö i ö troa ixelë me Ahaza ngöne la pune la jë i tim ne la kesao e koho, ezine la gojenyi ka tru nge ka tro kowe la hlapa ne la atre wasi maano. 4 Nge tro eö a qaja koi angeic ka hape: “The hnehengazo kö. The xou kö nge the kucakuca kö, pine la idreuthine la elëhni i Rezina, memine la nöje Suria, memine la nekö i Remalia, ke ceitu i angatr memine la itre wene sinöe ka haj. 5 Eje hi, hnene la nöje Suria me Eferaima, memine la nekö i Remalia hna tra thethi ö me qaja ka hape: 6 “Ce elë jë së e Iudra matre thëtrij* me thapa* la nöj, nge tro sa acile la nekö i Tabeela troa joxu.”
7 “‘Hane hi la hna qaja hnei Iehova Joxu Ka Sisitria ka hape:
“Tha tro kö lai a traqa,
Tha tro kö lai a eatr.
8 Ke Damaseko la kapital ne Suria,
Nge Rezina la tan e Damaseko.
Ame hë la kola traqa koi 65 lao macatre, tro ha apatrenyi Eferaima
Nge tha tro hmaca kö ej a ketre nöj.
9 Nge Samaria la hen ne Eferaima,
Nge nekö i Remalia la tan e Samaria.
Maine tha ka catre kö la lapaune i epun,
Tha tro kö epuni lai a cile hut.”’”
10 Nge öni Iehova hmaca jë koi Ahaza ka hape: 11 “Sipone jë koi Iehova Akötresi ö la ketre hatren. Sipone jë la ketre hatren ka jui tune la Hua,* maine ka draië tune la hnengödrai.” 12 Ngo hnei Ahaza hna sa ka hape: “Pëkö hnenge hna troa sipon, nge tha tro kö ni a tupathi Iehova.”
13 Ame hnei Isaia hna qaja ka hape: “Itre matra i Dravita fe, pane drenge ju! Hnei epuni hna wangacon la aqane xomihni ne la itre atr. Hapeu, tro fe epuni a wangacon la aqane xomihni i Akötresie? 14 Qa ngöne lai, tro Iehova a amamane koi epun la ketre hatren. Goeën! Tro ha upune la jajiny, me hnahone la nekö trahmany, nge tro ha ati ëje i nyën, Emanuela.* 15 Nge tro hë nyën a xeni batra me iji miel, qëmekene tro nyën a atreine xelene la ngazo me iëne la loi. 16 Nge qëmekene tro la nekönatr a atreine thipetrije la ngazo me iën la loi, tro ha nuetrij la lue joxu ne la lue nöj hnei ö hna xouen. 17 Tro Iehova a axulune koi ö, me kowe la nöje i ö, memine la lapa ne la keme i ö, la itre drai ne akötr, lo hna tha hane kö öhn ngöne la ijin kola trotriji Iudra hnei Eferaima, ke tro hë nyidrëti a hëne la joxu ne Asuria.
18 “Ame ngöne la ijine cili, tro Iehova a hëne* la itre neng qa ngöne la itre jë i tim ne la hneopegejë Nil e Aigupito, memine la hnënge bi qa ngöne la nöje Asuria. 19 Nge tro hë itre ej a traqa me të hune la itre hnathup,* me ngöne la itre gaa kaqa ne la itre git, me hune la itre sinöe asë ka ithiny, me hune la itre trepene ime i öni.
20 “Ame ngöne la ijine cili, tro Iehova a upe qa ngöne la Hneopegejë* la joxu ne Asuria tune la ketre nyine iciny, nge tro nyidrëti a cin apane la he, me itre pene waca, nge tro fe a cine la ienaj.
21 “Ngöne la drai cili, tro pe hi a mel la ca neköi kau föe, me lue neköi mamoe. 22 Nge pine laka, troa tiqa hnei melek, tro hë sa xeni batra. Nge ame pe hi la itre ka lapa pe ngöne la nöj, tro pë hë angatr a xeni batra me iji miel.
23 “Ngöne la drai cili, tro ha cia la itre sinöe ka ithiny me itre hnitr ngöne la nöjei hlapa ka 1 000 lao vin, lo hna salemën ekö koi 1 000 lao pies sileva. 24 Tro ha traqa fë e cili la itre pehna me itre ane pehna, ke tro ha haöthe la nöj hnene la itre sinöe ka ithiny me hnënge hnitr. 25 Nge ame la itre wetr hna qeuthe hë ekö, tha tro hmaca kö eö a easenyin, pine la itre sinöe ka ithiny me hnitr. Nge tro itre ej a tune la ketre hlapa hna xen hnene la itre kau, me tro waja hnene la itre mamoe.