Esodro

29 “Hane hi la nyine tro eö a kuca göi troa ahmitrötrë angatr, matre tro angatr a itre atre huuje koi ni: xome jë la ca fekene kau, me lue mamoe trahmany ka pë ethan, 2 me falawa ka pë levenen, me itre falawa ka pë levenen hna ithuenyikön hnei oel nge kösë korona, me itre areto ka pë levenen hna fi hnei oel. Nge tro eö a kuca memine la farin ne engene qitr. 3 Nge tro eö a qatreng itre ej ngöne la ketre treng, me ce traqa fë koi ni memine la kau, me lue mamoe trahmanyi hnine la trengen.

4 “Tro eö a traqa sai Arona me itre nekö i angeic, ngöne la hnë lö ne la itat ne icasikeu. Nge tro eö a sië angatre hnei tim. 5 Thupene lai, tro eö a xome la itre iheetr, me heetrë Arona hnene la iheetre ka qea, memine la iheetre ka pë imen ne la iefoda, memine la iefoda, memine la nyine he imano, nge tro eö a othe la otren hna el ne la iefoda ngöne la gö i angeic. 6 Nge tro eö a petrë angeic hnene la nyine atu he, me amë hune la nyine atu he, la hatrene ka hmitrötr.* 7 Nge xome jë la oel ne iën, nge nenge pi hune la he i angeic, nge ië angeice jë.

8 “Thupene lai, hëne jë la itre nekö i angeic, nge heetrë angatre jë hnene la itre iheetr ka qea. 9 Othe jë la itre otren ngöne la itre gö i angatr, nge kuca tune ju fe koi Arona, nge amë ju la itre nyine petrëne la he i angatr. Nge thatraqai angatre hë la huliwa ne atre huuj, thenge la wathebo ka epine palua. Celë hi aqane tro eö a acili Arona me itre nekö i angeic, ngöne la hnëqa ne atre huuj.*

10 “Nge tro eö a tro fë la kau qëmekene la itat ne icasikeu, nge tro Arona me itre nekö i angeic, a atë la itre iwanakoime i angatr hune la he ne lai kau. 11 Nge tro eö a humuthe la kau qëmeke i Iehova, ngöne la hnë lö ne la itat ne icasikeu. 12 Nge tro eö a hnea la lue he ne wanakoime i eö ngöne la madra, me nyiath ngöne la itre jiane la ita ne huuj, me neng asë la madra ka lapa pe fene la ita ne huuj. 13 Nge xom asë jë la giris ka atuthe la trenge xel, memine la giris ne idre, me lue wene thulumat memine la girisin lue ej, nge dreuthe jë matre troa so la haj hune la ita ne huuj. 14 Ngo ame la ijöne kau, memine la ikupein ej, me agetrinen ej, tro eö a dreuth e tröne la lapa. Celë hi huuj ne ngazo.*

15 Nge tro eö a xome la ketre mamoe trahmany, nge tro Arona me itre nekö i angeic a atë la itre wanakoime i angatr, hune la he ne la mamoe trahmany. 16 Nge tro eö a humuthe la mamoe trahmany, me xome la madra, me thathane ngöne la nöjei götran ne la ita ne huuj. 17 Thupathupa pi la itre götrane la mamoe trahmany, nge wasine jë la trenge xele i nyën, me itre wacan, nge ce amë ju itre ej memine la he. 18 Nge tro eö a dreuthe asë la mamoe trahmany, me huhajin ej hune la ita ne huuj, ke huuj ne dreuth asë koi Iehova, nge ka pui lolo,* huuje lai nyine dreuth koi Iehova.

19 “Nge tro eö a xome la ketre mamoe trahmany, nge tro Arona me itre nekö i angeic a atë la itre wanakoime i angatr, hune la he ne la mamoe trahmany. 20 Nge tro eö a humuthe la ketre mamoe trahmany, me xome la madran, me nyiath ngöne la pune hnangenyë maca i Arona, memine la pune hnangenyë maca ne la itre nekö i angeic. Troa kuca tune fe kowe la hene wanakoime ka tru götrane maca i angatr, me hene wanakoca ka tru götrane maca i angatr. Nge tro eö a thathane la nöjei götran ne la ita ne huuj. 21 Nge xome jë la sine la madra, qa ngöne la ita ne huuj, me sine la oel ne iën, nge thathane pi hui Arona memine la iheetre i angeic, ketre tune fe kowe la itre nekö i angeic, me itre iheetre i angatr. Matre tro angeic memine la itre iheetre i angeic, me itre nekö i angeic me itre iheetre i angatr a hmitrötr.

22 “Nge tro eö a xome la girisine lai mamoe trahmany, memine la punen ej ka giris, memine la giris ka heetrëne la trenge xel, memine la giris ka heetrëne la idre, memine la lue wene thulumat me girisine lue ej, memine la inaea maca, ke mamoe trahmanyi lai hna huujën nyine acile la itre atre huuj. 23 Nge xome jë qa ngöne la trengene falawa ka pë levenen qëmeke i Iehova, la ketre falawa ka raon, me ca falawa hna ithuenyikön hnei oel nge kösë korona, me ca areto. 24 Nge tro eö a amë asë la itre ewekë cili hune la lue iwanakoime i Arona, me iwanakoimene la itre nekö i angeic, nge tro eö a nango jum, nyine huuj ne jumejum* qëmeke i Iehova. 25 Nge tro eö a xom qa ngöne la itre wanakoime i angatr, nge tro eö a dreuth hune la ita ne huuj, hune la huuj ne dreuth asë, nyine pui lolo koi Iehova. Ketre huuj nyine dreuth koi Iehova.

26 “Nge tro eö a xome la imano ne la mamoe trahmany hna huujën, nyine acile la itre atre huuj, lo hna huujën thatraqai Arona, nge jumejume jë, nyine huuj ne jumejume qëmeke i Iehova, nge tro ej a edrö i eö. 27 Tro eö a ahmitrötrëne la imano ne lai öni hna xom nyine huuj ne jumejum, memine la inaea hna ahmitrötrën, lo hna jumejum nge hna xome qa ngöne la mamoe trahmany hna huujën nyine acile la itre atre huuj, lo hna huujën thatraqai Arona me itre nekö i angeic. 28 Nge thatraqai Arona me itre nekö i angeic la itre öni cili, celë hi wathebo ka cile hut kowe la angetre Isaraela, ke edrö lai hna ahmitrötrën. Nge edrö lai hna ahmitrötrën nyine tro la angetre Isaraela a hamën. Edrö i angatr hna ahmitrötrën thatraqai Iehova, lo hna xom qa ngöne la itre huuj ne tingetinge i angatr.

29 Nge ame la itre iheetr hna ahmitrötrën thatraqai Arona, ke tro pë hë a hetrën hnene la itre nekö i angeic, ngöne la kola ië angatr, me acili angatr ngöne la hnëqa ne atre huuj. 30 Nge qaathene la itre nekö i Arona, tro la atre huuj ka troa nyihna i angeic, a heetrëne la itre iheetr koi 7 lao drai, ngöne la angeic a lö ngöne la itat ne icasikeu, me kuca la huliwa ngöne la gaa hmitrötr.

31 “Qa i eö troa xome la mamoe trahmany nyine acile la itre atre huuj, me atrone la mitr ngöne la gaa hmitrötr. 32 Nge tro Arona me itre nekö i angeic a öni la ijöne la mamoe trahmany, me xeni la falawa qa ngöne la trengen, ngöne la qëhnelö ne la itat ne icasikeu. 33 Tro angatr a xeni la itre ewekë hna huujën thatraqane la itre ngazo* i angatr, matre troa acili angatr ngöne la hnëqa ne atre huuj,* me ahmitrötrë angatr. Ngo hmitrötre tro la ketre atr a xen e tha hna aijijë* angeice kö, ke itre ewekë lai ka hmitrötr. 34 Nge maine hetre munëne la huuj nyine acile la itre atre huuj, me falawa ka lapa pe e hmakany, qa i eö troa dreuthetrij. Tha tro kö a xen, ke itre ewekë lai ka hmitrötr.

35 “Qa i eö troa kuca tun koi Arona me itre nekö i angeic, thenge la hnenge hna amekötin. Nge 7 lao drai ne tro eö a acilë angatr ngöne la hnëqa ne atre huuj.* 36 Nge ame e nöjei drai, tro eö a huujëne la kau trahmany thatraqane la ngazo, matre senge la itre ngazo. Nge ame la ita ne huuj, tro eö a ahmitrötrën, ngöne la kola huujëne la itre huuj thatraqane la ngazo. Nge qa i eö troa fii la ita ne huuj hnei oel, matre ahmitrötrën ej. 37 Nge ame ngöne la 7 lao drai, tro eö a ahmitrötrëne la ita ne huuj, ngöne la eö a huujëne la itre huuj nyine nue* la itre ngazo. Nge tro eö a ahmitrötrën ej, matre tro ej a nyi ita ne huuj ka nyipi hmitrötr. Nge ame la nöjei atr ka troa ketr la ita ne huuj, troa pane ahmitrötrë angatr.

38 “Hane hi la nyine tro eö a huujën hune la ita ne huuj: e nöjei drai, tro pala hi a huujëne la lue mamoe­ trahmany ka ca macatre. 39 E hmakany, tro eö a huujëne la ca neköi mamoe trahmany, nge e kola lö la jö,* tro eö a huujëne la ketre. 40 Ame kowe la pane neköi nani trahmany, troa traqa fë la ca omera* ne farin ka lolo, hna ce lomën memine la sine* la ca hin ne oel elaio hna tranetran. Nge troa traqa fë la sine* la ca hin ne waina nyine fii huuj. 41 Nge ame la kola lö la jö, tro eö a huujëne la hnaaluene neköi mamoe trahmany, memine lo huuj ne wene feja, me waina nyine fii huuj tune lo hna tro fë e hmakany. Nge tro eö a huujëne lai nyine pui loi, ketre huuj nyine dreuth koi Iehova. 42 Celë hi huuj hna troa tro fë lapan hnene la nöjei xötr atr, ngöne la qëhnelö ne la itat ne icasikeu qëmeke i Iehova, lo hnenge hna troa mama koi epun, me ithanata me eö.

43 “Nge tro ni a mama koi angetre Isaraela e cili, nge troa ahmitrötrëne ej hnene la lolong. 44 Nge tro ni a ahmitrötrëne la itat ne icasikeu, memine la ita ne huuj. Nge tro ni a ahmitrötrë Arona me itre nekö i angeic, matre tro angatr a itre atre huuje koi ni. 45 Tro ni a lapa* nyipine la nöje Isaraela, nge tro ni a Akötresi angatr. 46 Eje hi, tro angatr a atre laka, Iehova ni, Akötresi angatr, atre thepe angatr qa Aigupito, matre tro ni a lapa nyipi angatr. Iehova ni, Akötresi angatr.