Hosea
11 “Ame lo nekönatr petre kö Isaraela, hnenge hna hnimi nyën,
Nge hnenge hna hëne la neköng qaa Aigupito.
2 Hnei angatre* pala hi hna hëne la angetre Isaraela,
Ngo hnene pala hi la angetre Isaraela hna kötre angatr.
Hnene la nöj hna tro fë huuj kowe la itre hatrene i Baala
Me tro fë huuj kowe la itre idrola hna tratraun.
3 Ngo eni pe lo ka ini Eferaima troa tro, me xepi angatr;
Ngo tha wangatrehmekune kö angatr laka, eni hi lo ka aloinyi angatr.
4 Hnenge pala hi hna ee angatr jëne la itre eno i atr,* lo itre eno ne ihnim;
Ame koi angatr, ceitunge lo memine la ka huletrije la ehnef qa ngöne la nyinawa i angatr,
Nge hnenge hna isa thua i angatr cememine la menyik.
5 Tha tro hmaca kö angatr a tro Aigupito, ngo tro pë hë Asuria a joxu i angatr,
Ke xele angatr ma bëeke koi ni.
6 Tro hë la taua a emoemo matre lepe la itre traone i angatr
Me thëtrije la itre agö ne la itre qanahag i angatr, me apatrenyi angatr pine angatr mekun troa iakötrë.
7 Ase hë la nöjeng mekun troa mele thoi koi ni.
Ngacama hnei angatre* hna hëne la nöj kowe la loi,* ngo pëkö ca ka mejë.
8 Eferaima fe, hnauëne pena la tro ni a nuetriji ö?
Isaraela fe, hnauëne pena la tro ni a nue eö kowe la itre ithupëjia?
Hnauëne pena la tro ni a ujë koi ö, tune lo aqane kucang koi Adema?
Hnauëne pena la tro ni a ujë koi ö, tune lo aqane kucang koi Zeboim?
Waea, tha tro kö ni a kuca tun;
Traqa ha* la utipin e kuhu hning.
9 Tha tro kö ni a nu asë la trenge hning.
Tha tro hmaca kö ni a lep apatrenyi Eferaima,
Ke Akötresieti ni, ngo tha ketre atre kö,
Eni la Ka Hmitrötr nyipi eö;
Nge tha tro kö ni a amamane la elëhninge koi ö.
10 Tro angatr a xötrethenge Iehova, nge tro nyidrëti a ho kösë liona;
Ame la nyidrëti a troa ho, ke tro la itre nekö i nyidrë trahmanyi a traqa qa kuë, me hmengöhmengön.
11 Tro angatr a hmengöhmengön tune la waco la angatr a tro qa Aigupito,
Tune la ketre piny ngöne la angatr a tro qa Asuria;
Nge tro ni a alapa angatr ngöne la itre uma i angatr,” öni Iehova.
12 “Hnei Eferaima hna kanothi ni hnei trengathoi,
Nge Isaraela hnei iaö.
Ngo Iudra pala kö a ce tro* me Akötresie,
Nge angeic a mele nyipici kowe la Ka Nyipi Hmitrötr.”