Zakaria
11 “Lebanona fe, fe pi la itre qëhnelö i ö,
Matre tro la eë a dreuthe la itre sinöe arasi i ö.
2 Göti fe, sue catre jë, ke kei hë la sinöe arasi!
Ase hë apatrene la itre sinöe ka tru!
Itre alona ne Basana fe, sue jë,
Ke hna apatrene la hnaxulu!
3 Dreng! Kola treije la itre ka thupë mamoe
Ke hna apatrene la lolo i angatr.
Dreng! Kola ho la itre neköi liona,
Ke hna apatrene la itre hnitr ka cia ezine la hneopegejë Ioridrano.
4 “Hane hi la hna qaja hnei Iehova Akötresing: ‘Thupëne ju la itre mamoe nyine humuth. 5 Ame la itre ka itön la itre mamoe, angatr a humuth itre ej, ngo tha hna upezö angatre kö. Nge önine la itre ka salemëne itre ej ka hape: “Epi troa atrunyi Iehova, ke tro hë ni a trenamo!” Pëkö ca utipin ne la itre ka thupë mamoe kowe itre ej.
6 “‘Ke tha tro hmaca kö ni a utipine la itre atrene la nöj,’ öni Iehova. ‘Celë hi matre tro ni a nue angatr troa itö imusinë nge troa musinë angatr hnei joxu; tro angatr a lepe la nöj, nge pëkö ala cas hnenge hna troa amelen qa ngöne la mus i angatr.’”
7 Ame hnenge hna nyiqaane thupëne hnyawa la itre mamoe hna troa humuth, nyine loi koi epun itre mamoe ka akötr! Matre hnenge hna xome la lue sine sinöe. Hnenge hna ati ëjene la ketre, Lolo, nge ketre, Cas. Nge hnenge hna nyiqaane thupëne la hnënge mamoe. 8 Nge ngöne hi la ca treu, hnenge hna upetrije la köni atre thupë mamoe, ke thatreine hë ni xomihni angatr, nge angatr a methinë ni. 9 Nge öning: “Tha tro hmaca kö ni a thupë epun. Epi tro la ka wezipo a mec, nge epi tro la ka troa mec a patr! Nge ame la itre ka lapa pe, ke loi e tro angatr a itö iöni.” 10 Ame hnenge hna xome la sine sinöe hna hape, Lolo, me thupathupa; celë hi aqane apëne ni la isisinyikeung memine la nöj. 11 Hna nyipun ej ngöne la drai cili, nge hnene la itre mamoe ka akötr nge ka goeë ni hna trotrohnine laka, ketre maca lai qaathei Iehova.
12 Matre öninge jë hi: “E ka loi hi koi epun, nyithupenge jë, maine pena xome ju kö.” Ame hnei angatre hna nyithupeng* la 30 lao pies sileva.
13 Nge öni Iehova koi ni: “Ame koi angatr, ke celë hi la thupeng! Nga kuiëne pi la trenge manie cili ka tru ngöne la hnë ami mani.” Ame hnenge hna xome la 30 lao pies sileva me kuiëne ngöne la hnë ami manie ne la uma ne hmi i Iehova.
14 Thupene lai, hnenge hna thupathupa la hnaaluene sine sinöeng hna hape, Cas. E cili, hnenge hna thë la imelekeu i Iudra me Isaraela.
15 Matre öni Iehova koi ni: “Xome jë enehila, la itre jia ne huliwa ne la atre thupë mamoe ka pë hnënyöngön. 16 Ke tro ni a aijijëne la ketre atr troa thupëne la nöj. Ngo tha tro kö angeic a thupëne la itre mamoe ka troa mec, me thele la itre neköi mamoe, me ameune la itre ka eatr, me thuane la itre ka cile pala kö. Tro pe angeic a öni la ijön ne la itre mamoe ka giris, me theatrije la ihnatrapaca ne la itre mamoe.
17 Ekölöhini la atre thupë mamoeng ka pë hnënyöngön, ka nuetrije la hnënge mamoe!
Tro la taua a lepe la ime i angeic me alameke maca i angeic.