Zakaria
9 Maca:
“Kola cil kowe la nöje i Haderaka hnene la trenge ewekë i Iehova,
Nge Damaseko la hnene ej hna troa lep.*
Eje hi, Iehova a goeëne la itre atr
Memine la nöjei tribu ne Isaraela.
2 Ej a cil koi Hamath, ka lapa ezin,
Me cil koi Turo me Sidona, lue ka pi nyi ka inamacan.
3 Hnei Turo hna xupe la ketre ita ne thup ka catr.*
Hnei angeic hna xawane la sileva kösë so ne dro,
Memine la gool kösë trëtr ne gojeny.
4 Dreng! Tro Iehova a thapa la itre ewekë i angeic.
Tro nyidrë a lep apatrene la trongene isi i angeic, me trij e kuhu hnagejë,*
Nge tro ha dreuthetrije la traone cili.
5 Tro Asekelona a öhne lai me xou.
Tro Gaza a hnehengazo,
Ketre tui Ekerona, ke tro ha thaipiëne lo hnei angeic hna mejiune kow.
Tro ha apatrene la ketre joxu e Gaza,
Nge tro ha pë atren e Asekelona.
6 Tro la nekö ne gojenyi a lapa e Asedoda,
Nge tro hë ni a apatrene la pi tru ne la atre Filisiti.
7 Tro ni a xometrije qa ngöne la që ne la atre Filisiti, la itre ewekë hna apuingazon hnei madra,
Me qa ngöne la itre inyö i angeic, la itre ewekë hna sisin,
Nge tro pë hë la itre ka mele pe thei angatr a nyi edrö ne la Akötresi së.
Tro angeic a tune la ketre tan* e Iudra,
Nge tro Ekerona a tune la atre Iebusi.
8 Tro ni a lapa qëmekene la umang tune la ketre atre thup,
Matre pëkö ka troa lö me tro qa lai.
Tha tro hmaca kö a cili thenge hnene la tane huliwa,*
Ke öhne hë ni lai* hnene la sipu luemekeng.
9 Madrine jë eö, nekö jajinyi ne Ziona!
Sue madrine jë, nekö jajinyi ne Ierusalema!
Goeën! Kola traqa koi ö hnene la joxu i ö.
Ka meköti nyidrë nge ka iamele.*
Ka ipië nyidrë nge nyidrëti a tithe la boliko,
Ketre neköi boliko, lo neköne la boliko föe.
10 Tro ni a apatrene la itre ikariota qa Eferaima
Memine la itre hos qa Ierusalema.
Tro ha patre la itre tane pehna ne isi.
Eje hi, tro angeic a cainöjëne la tingeting kowe la itre nöj.
Tro hë angeic a mus qa ngöne la ketre hnagejë kowe la ketre,
Me qa ngöne la Hneopegejë* uti hë la cane la fene hnengödrai.
11 Ngo ame eö, föe, jëne la madra ne isisinyikeu i ö,
Tro ni a amelene la itre hnei ö hna akalabusin qa hnine la hnaop ka pë timin.
12 Bëeke jë kowe la hnapo, epun itre hna akalabusin ka catre mejiun!
Eni a qaja koi ö enehila:
‘Föe fe, tro ni a alua amanathithi ö.
13 Ke tro hë ni a huli* Iudra tune la tane pehna
Nge tro hë ni a ati Eferaima hune la tane pehna.*
Tro ni a kuca matre tro la itre nekö i ö, Ziona fe
A icilekeu memine la itre nekö i ö, Geres fe,
Nge tro ni a kuca matre tro eö a tune la taua ne la atre isi.’
14 Tro ha öhnyi Iehova hui angatr,
Nge tro la ane pehna i nyidrë a sesë tune la samek.
Tro Iehova Joxu Ka Sisitria a ufi trutru,
Nge tro nyidrëti a traqa memine la itre wene, me enyi ne kolojë.
15 Tro Iehova joxu ne la itre trongene isi e hnengödrai, a isigöli angatr,
Nge tro angatr a ngaane la trehle ne la itre ithupëjia.
Tro angatr a ij me nyi mej kösë hna iji waina.
Tro ha atiqanyi angatr tune la ketre kap,
Tune la itre kona ne la ita ne huuj.
16 Ngöne la drai cili, tro Iehova Akötresi angatr a amele angatr,
Ke hnënge mamoe i nyidrëti angatr, me nöje i nyidrë.
Ke tro angatr a melemel ngöne la ihnadro i nyidrë, tune la itre etë ka melemel hune la korona.
17 Atraqatre la lolo i nyidrë!
Nge the qaja pala ha la aqane mingöminge nyidrë!
Tro la itre wene feja a aegöcatrene la itre nekö trahmany,
Nge tro la waina ka hnyipixe a aegöcatrene la itre nyipi jajiny.”