Numera

18 Nge öni Iehova jë hi koi Arona ka hape: “Eö, me itre nekö i ö, memine fe la itre lapa i ö, epun la ka troa thu, e hetre ngazo hna kuca kowe la uma ne hmi, eö me itre nekö i ö, epun la ka troa thu, e hetre ngazo hna kuca kowe la hnëqa i epun ne atre huuj. 2 Nge ketre, easenyine jë la itre trejine me eö ne la tribu ne Levi, tribu ne la itre qaaqaa i ö, matre tro angatr a ce tro me eö, me huliwa koi ö me itre nekö i ö, qëmekene la itat ne Anyipicin. 3 Nge tro angatr a eatrëne la itre hnëqa i angatr koi ö, me kowe la itat. Ngo tha tro kö angatr a easenyine la itre jia ne huliwa ne la götrane gaa hmitrötr me easenyine la ita ne huuj, wanga meci pi la ketre e angatr maine ketre thei epun. 4 Nge tro angatr a ce tro me eö, matre troa kuca la hnëqa i angatr thatraqane la itat ne icasikeu memine la huliwa ne la itat, nge tha tro kö la ketre atr ka tha ijij* a easenyi epun. 5 Tro epuni a eatrën la hnëqa i epun thatraqane la götrane gaa hmitrötr, me kowe la ita ne huuj, matre tha tro hmaca kö a wesitr kowe la angetre Isaraela. 6 Nge hnenge hna xome lo itre trejine me epun, ene la angetre Levi nyipine la angetre Isaraela, matre nyi ahnahna koi epun. Hna hamë angatr koi Iehova, matre troa eatrëne la huliwa ne la itat ne icasikeu. 7 Hnëqa i ö me itre nekö i ö troa eatrëne la itre huliwa ne atre huuj göne la ita ne huuj, me itre ewekë ka ej trön la imaano ne thewe hnahag; celë hi huliwa i epun. Hnenge hna nyi ahnahna koi epun la hnëqa ne atre huuj, nge tro ha humuth la atre easenyine la uma ne hmi, ngo ka tha ijije pe.”

8 Öni Iehova hmaca jë hi koi Arona ka hape: “Eni a ahnithe koi ö la itre ahnahna hna traqa fë koi ni. Hnenge hna hamën koi ö me itre nekö i ö nyine edrö ka cile hut, la sine la itre ewekë ka hmitrötr hna traqa fë hnene la angetre Isaraela. 9 Nge qa ngöne la itre ewekë ka nyipi hmitrötr hna tro fë nyine huuj ne eë, hane hi la itre ewekë thatraqai ö: nöjei huuje i angatr, ene la itre huuj ne wene feja, me itre huuj ne ngazo, me itre huuj ne ialoinekeun hnei angatr hna traqa fë koi ni. Celë hi ewekë ka nyipi hmitrötr thatraqai ö me itre nekö i ö. 10 Qa i ö troa xeni lai ngöne la götrane gaa nyipi hmitrötr, nge tro fe la nöjei trahmanyi asë a hane xeni itre ej. Nge tro ha hmitrötr la ewekë cili thatraqai ö. 11 Hane hi la itre xaa ewekë thatraqai ö: itre ahnahna hna traqa fë hnene la angetre Isaraela, memine la nöjei huuj ne jumejum i angatr. Ase hë ni hamën itre ej koi ö me itre nekö i ö trahmanyi me jajiny, nyine edrö ka cile hut. Ame asë hi la itre atr hna ahmitrötrëne ngöne la hnalapa i ö, ke ijiji angatre fe hi troa xen.

12 “Nge ame la nöjei oel ka sisitria, memine la waina ka hnyipixe, me itre wene feja, ene la itre pane wene hna traqa fë hnene la angetre Isaraela koi Iehova, eni a hamën asë koi ö. 13 Ame la nöjei pane wen hnei angatre hna traqa fë koi Iehova qa ngöne la nöje i angatr, ke thatraqai ö. Nge ame asë hi la itre hna ahmitrötrëne ngöne la hnalapa i ö, ke ijiji angatre fe hi troa xen.

14 “Ame la nöjei ewekë hna amë* thatraqane la huliwa ka hmitrötr e Isaraela, ke thatraqai ö.

15 “Ame asë hi la itre pane neköne atr maine öni hna traqa fë koi Iehova, ke thatraqai ö. Ngo nyipiewekë fe tro eö a itöne hmaca la itre pane neköne la itre atr; tro fe eö a hane itöne hmaca la itre pane neköne la itre öni ka pui ngazo. 16 Nge ame hë la kola ca treu i angatr a tro draië, qa i ö troa itöne hmaca itre ej thenge la thupen hna athip, ene 5 sekele* sileva, lo tulu ne sekel ne la götrane gaa hmitrötr,* ene 20 gera.* 17 Ngo ame la pane neköne la kau, memine la pane neköne la mamoe, maine la pane neköne la nani, tha tro kö eö a itöne hmaca, ke ka hmitrötr itre ej. Ngo tro pe eö a thathane la ita ne huuj hnene la madra ne itre ej, me huhajine* la igirisin, nyine huuj ne eë ka pui loi koi Iehova. 18 Thatraqai ö la ijöne itre ej, tune la imano ne la huuj ne jumejum, memine la inaea maca. Itre ewekë i ö lai. 19 Nge ame asë hi la itre ahnahna ka hmitrötr hna traqa fë hnene la angetre Isaraela thatraqai Iehova, hnenge lo hna hamën asë nyine edrö ka cile hut koi ö, me itre nekö i ö trahmanyi me jajiny. Celë hi isisinyikeu ne sotr,* isisinyikeu ka cile hut qëmekei Iehova, thatraqai ö me itre matra i ö.”

20 Öni Iehova hmaca jë hi koi Arona: “Pëkö edrö i ö ngöne la nöje i angatr, nge tha tro kö a hamëne koi ö la ketre götrane la nöje i angatr, ke eni hi la zi i ö, me edrö i ö nyipine la angetre Isaraela.

21 Nge ame la itre nekö i Levi, hnenge hna hamën nyine edrö i angatr la hna 10 ne la angetre Isaraela, nyine thupene la huliwa hnei angatr hna kuca ngöne la itat ne icasikeu. 22 Nge tha tro hmaca kö la angetre Isaraela a easenyine la itat ne icasikeu, wanga troa hetre ngazo i angatr, nge wanga meci pi angatr. 23 Nge ame la angetre Levi, qa i angatr troa kuca la huliwa ne la itat ne icasikeu, nge angatre hi la ka troa thu, e hetre ngazo ne la nöj. Celë hi wathebo ka cile hut ngöne la nöjei xötr asë, tha tro kö angatr a kepe edrö thene la angetre Isaraela. 24 Ke hnenge hna hamëne nyine edröne la angetre Levi, la hna 10 ne la itre ahnahna hna traqa fë hnene la angetre Isaraela koi Iehova. Celë hi matre qaja jë ni koi angatr ka hape: ‘Pëkö edrö i angatr thene la angetre Isaraela.’”

25 Nge öni Iehova koi Mose ka hape: 26 “Qaja jë kowe la angetre Levi ka hape: ‘Eni a hamën nyine edrö i epun la hna 10 qaathene la angetre Isaraela, nge tro fe epuni a hamëne nyine ahnahna koi Iehova la hna 10 ne la hna 10 cili. 27 Nge tro hë Akötresieti a goeëne lai kösë ahnahna qaathei epun, nge kösë ahnahna hna xome qa ngöne la hna lepe qitre i epun, maine hna xome qa ngöne la hna weje wene vine i epun, maine hna kuci oele i epun. 28 Celë hi matre tro fe epuni a hamë ahnahna koi Iehova, qa ngöne la hna 10 ne la itre ewekë hnei epuni hna kapa qaathene la angetre Isaraela; qa ngöne la hna 10 cili, tro epuni a hamë Arona atre huuj, la ahnahna koi Iehova. 29 Nge qa ngöne la nöjei ewekë ka sisitria hna troa hamën nyine ahnahna ka hmitrötr koi epun, qa i epuni fe troa hamëne la nöjei pengöne ahnahna koi Iehova.’

30 “Nge qaja jë kowe la angetre Levi ka hape: ‘Thupene la hnei epun angetre Levi, hna ase hamëne la ka sisitria ne la itre ewekë cili, tro pë hë a xome ceitune la munën, me itre wenen la hnë lepe qitre i epun, me hnë weje wene vin, me hnë kuci oele i epun. 31 Nge ijiji epun me fami* i epun troa xen la itre ewekë cili ngöne la nöjei götran asë, ke thupei epuni lai qa ngöne la huliwa hnei epuni hna kuca göne la itat ne icasikeu. 32 Maine tro pala hi epuni a hamën la ka sisitria ne la itre ewekë cili, tha tro kö a hetre ngazo i epun; tha tro kö epuni a apuingazone la itre ewekë ka hmitrötr ne la angetre Isaraela, wanga meci pi epun.’”