Hnaaluene Tus i Aqane Lapa Itre Joxu

8 Traqa koi 20 lao macatre ne xupe Solomona la uma ne hmi i Iehova, me hnalapa i joxu. 2 Nge nyidrëti a xupe hmaca ju fe la itre traon hna hamë nyidrë hnei Hirama. Nge hnei Solomona hna alapan e cili la itre xa angetre Isaraela.* 3 Hnei Solomona fe hna tro troa thapa la traon ne Hamathe-zoba. 4 Nge nyidrëti a acatrene* jë la traon ne Tademora ngöne la hnapapa, memine la nöjei traon nyine ami ewekë hnei nyidrëti hna xup e Hamath. 5 Nyidrëti a acatrene ju fe la traon ne Bethe-horona e koho, me Bethe-horona e kuhu, hnene la itre ihag, me itre qëhnelö me itre agö, 6 memine la traon ne Baalath me nöjei traon nyine ami ewekë i Solomona, me nöjei traon ne ami ikatr, me itre traon ne la itre ka ti ikatr. Nge hnei nyidrëti fe hna xupe la nöjei aja i nyidrë e Ierusalema, me Lebanona, me ngöne la nöjei nöj ka lapa fene la musi nyidrë.

7 Ngo mele pala kö e cili la itre atre Heth, me Amora, me Perizi, me Hivi, me Iebusi, itre ka tha sine la nöje Isaraela. 8 Kolo itre matra ne la itre atr ka lapa ngöne la nöj, lo itre matra ne la itre atr hnei angetre Isaraela hna thatreine lep apatren, matre hnei Solomona hna folosa angatr. Nge kolo pala hi a folosa angatr uti hë enehila. 9 Ngo pëkö ca atre Isaraela hnei Solomona hna folosan kowe la huliwa i nyidrë, ke angatr la itre sooce i nyidrë, me itre tane la itre kapiten, me itre tane la itre ka ti ikatr me ti hos. 10 Nge ala 250 la itre hene la itre tane huliwa i Solomona joxu. Angatre la itre hna acil troa thupëne la itre ka huliwa.

11 Nge hnei Solomona hna xome la nekö i Farao jajiny qa ngöne la Traone i Dravita, troa lapa hnine la uma hnei nyidrëti hna xupe koi eahlo. Ke öni nyidrë: “Maine nyipici laka, eahlo la föeng, ngo tha loi kö e tro eahlo a lapa hnine la uma i Dravita joxu ne Isaraela, ke ame la itre götran hna amë la Pua i Iehova, ke itre götrane gaa hmitrötr.”

12 E thupen, hnei Solomona hna tro fë huuje koi Iehova, hune la ita ne huuj i Iehova, lo hnei nyidrëti hna xup qëmekene la poretiko. 13 Nyidrëti a metrötrëne hnyawa la program e nöjei drai, me huuj thenge la hna amekötin hnei Mose kowe la Sabath, me itre treu ka hnyipixe, memine lo köni feet ne la macatre, ene la Feet Ne La Itre Falawa Ka Pë Levenen, me Feet Ne La Itre Wiik, me Feet Ne Ihmelekap. 14 Nge nyidrëti a trongëne jë la hna amekötin hnei Dravita keme i nyidrë, troa acile la itre lapa ne la itre atre huuj kowe la huliwa hnine la uma ne hmi, me angetre Levi ngöne la isa götrane qa i angatr troa atrunyi Akötresie, me xatuane la itre atre huuj, thenge la program hna acil e nöjei drai. Nge ngöne la itre lapa ne la itre ka thupë qëhnelö, nyidrëti a acile ju la itre xan kowe la itre qëhnelö, ke celë hi hna amekötin hnei Dravita, atre ne la nyipi Akötresie. 15 Tha hna jea kö qa ngöne la aqane ameköti huliwa i joxu kowe la itre atre huuj, me angetre Levi, göne la nöjei ewekë, me itre hnë ami ewekë. 16 Qa ngöne lai, hna eköthe hnyawa* la nöjei huliwa i Solomona, qane lo kola ami trepene la uma ne hmi Iehova, uti hë la drai ne afenesin. Hane hi la aqane afenesine la uma ne hmi Iehova.

17 Thupene lai, Solomona a tro ju a tro Eziona-gebera me Elath,* ezine la hnagejë ngöne la nöje Edoma.

18 Nge hnei Hirama hna upe la itre ka huliwa koi angeic troa tro fë la itre he koi Solomona, me itre atre ka atrepengöne la hnagejë. Matre angatr a ce tro ju me itre hlue i Solomona a tro Ofira, nge hnei angatr hna bëeke fë koi Solomona joxu, la 450 lao talane* gool.