Esodro

12 Öni Iehova jë hi koi Mose me Arona e Aigupito ka hape: 2 “Tro la treu ce a nyiqane la macatre,* tro ej a pane treu ne la macatre koi epun. 3 Qaja jë kowe la nöje Isaraela asë ka hape, ‘Ngöne la drai hna 10 ne la treu ce, tro angatr a isa xome la ca mamoe e ca fami,* ca mamoe e ca hnalapa. 4 Ngo maine tha tru kö la fami epun troa öni la ca mamoe trahmany ka pexej, tro hë epuni* a ce thawa memine la itre ka lapa ezi epun, hnine la uma i epun. Tro epuni a isa wang thenge la etrune la itre atr, me thenge la sine mitr nyine troa isa öni. 5 Nge ame la mamoe trahmanyi tro ej a ca macatre, me pë ethan. Ijiji epuni troa iëne la ca neköi mamoe trahmany, maine ca neköi nani trahmany. 6 Nge qa i epuni troa thupën ej uti hë la hna 14 ne drai ne la treu, nge tro la itre fami ne Isaraela a isa humuth ej ngöne la kola lö la jö.* 7 Nge tro ha xome la sine la madra, me thathane hune la lue götran ne la itre hune qëhnelö ne la itre uma, lo hnei epuni hna troa xeni ngön.

8 “‘Nge tro ha öni la mitre ngöne la jidri cili, nge tro ha atron ngöne eë, me ce xen memine la falawa hna tha levenën, me itre dröne hnitre ka haitr. 9 Nge tha tro kö epuni a öni la ketre götran ne la mitr ka hatr ne la mamoe trahmany, maine hna boelën, ngo tro pe a atron hune eë, troa ce atrone la he me itre wacan, me itre sine göni qa kuhu hni.* 10 Nge tha tro kö epuni a ami munën uti hë hmakany, ngo maine hetre munën, tro hë epuni a dreuthetrij. 11 Nge hane hi la aqane tro epuni a öni: tro epuni a othe la beletre i epun ngöne la gö,* me otrëne la lue ibutr ngöne la lue ca i epun, me xome la sine tö i epun ngöne iwanakoim. Nge tro epuni a xeni nyimenyim, celë hi Paseka* i Iehova. 12 Nge tro ni a trongëne la nöje Aigupito ngöne la jidri cili. Nge tro ni a lepe la nöjei pane nekönatr ne la nöj, ene la atr me öni. Nge tro ni a nyithupen kowe la nöjei haze ne Aigupito, ke Iehova ni. 13 Nge ame la madra, ke nyine hatrene kowe la itre uma hnei epuni hna lapan: e öhne hë ni la madra, tro ni a tro sasaithi epun. Nge tha tro kö la akötr a ketri epun, me humuthi epuni la eni a troa lepi Aigupito.

14 “‘Hnëqa i epuni troa amekunën me atrune la drai celë koi Iehova. Nge tro fe la nöjei xötr atr a atrune la drai cili, ke wathebo ka cile huti lai. 15 Ngöne la 7 lao drai, tro epuni a xeni falawa hna tha levenën. Nge ngöne la pane drai, tro epuni a xometrije la leven qa ngöne la itre hnalapa i epun, ke qaane la pane drai uti hë la hna 7 ne drai, ame la atr ka troa xeni la hna nyi levenën, tro ha apatrenyi* angeic qa Isaraela. 16 Ame ngöne la pane drai troa hetre icasikeu ka hmitrötr, nge ame ngöne la hna 7 ne drai, tro hmaca a hetre icasikeu ka hmitrötr. Ngöne la lue drai cili, tha tro kö a kuca la ketre huliwa, ngo tro hi a hnëkëne la xen ka ijij kowe la isa ala cas.

17 “‘Ame ngöne la ijine la itre Falawa Ka Pë Levenen, hnëqa i epun troa atrun, ke ngöne la drai cili, tro ni a thapa la nöje i epuni ka ala nyimu* qa Aigupito. Nge tro hë epuni a atrune la drai cili, ngöne la nöjei xötr atr i epun. Wathebo ka cile huti lai. 18 Qaane la hej ne la hna 14 ne drai ne la pane treu, uti hë la heji ne la hna 21 ne drai, tro epuni a xeni falawa ka pë levenen. 19 Tha tro kö a hetre leven ngöne la itre hnalapa i epun koi 7 lao drai. Ke maine tro ketre atr a xen la ka hetre levenen, trenyiwa ju hë maine atre Isaraela, tro ha apatrenyi angeic qa ngöne la nöje Isaraela. 20 The tro kö epuni a xeni la ketre xen hna levenën. Nge ngöne la nöjei hnalapa, tro hi a xeni falawa hna tha levenën.’”

21 Nge hnei Mose hna canga hëne la nöjei qatr ne Isaraela me hape: “Isa iëne jë la itre neköi öni* kowe la itre fami epun, nge huujëne jë nyine Paseka. 22 Nge tro epuni a hnea la uke hisop* ngöne la madra hna amë ngöne la ketre trap. Nge tro ha thathane la lue götrane lai hune qëhnelö, nge pëkö ala casi ka troa tro qa ngöne la hnalapa i angeic uti hë e hmakany. 23 Nge ame hë la Iehova a traqa troa lepe la angetre Aigupito, me öhne la madra ngöne la lue götrane la hune qëhnelö, tro Iehova a sasaithe la hnë lö, nge tha tro kö nyidrëti a nue la mec* troa lö hnine la itre hnalapa i epun.

24 “Nge tro pala hi epun a trongëne lai, ke wathebo ka cile hut koi epun, me itre nekö i epun. 25 Nge ame hë la epuni a lö ngöne la nöj hnei Iehova hna hamë epun, tune lo hnei nyidrëti hna qaja, qa i epuni troa kuca lapane la ewekë cili. 26 Nge e tro jë la nekö i epuni a hnyingë epun ka hape, ‘Nemene la aliene la huliwa cili?’ 27 Tro hë epuni a sa ka hape, ‘Huuj ne Paseka koi Iehova, lo ka tro sasaithe la itre hnalapa i angetre Isaraela e Aigupito. Hnei nyidrëti hna lepe la angetre Aigupito, me nuamelene la itre hnalapa së.’”

Ame hnene la nöj hna sa iwatingöneca me thil. 28 Nge hnene la angetre Isaraela hna tro, me kuca thenge la hna amekötin hnei Iehova koi Mose me Arona. Ame hnei angatr hna trongëne hnyawan.

29 E hnenyipajidr, hnei Iehova hna humuthe la itre pane nekö i angetre Aigupito, qaane la pane nekö i Farao ka lapane la theron, uti hë la pane neköne la atre hna akalabusin,* memine la itre pane neköi öni asë. 30 Farao a mejë jë la jidri cili, me nöjei hlue i nyidrë, me nöjei atre Aigupito. Ame hna sue me hokötr la angetre Aigupito, ke hetre ka mec asë hi ngöne la nöjei hnalapa. 31 Nge ame ngöne la jidr, hnei nyidrëti hna canga hë Mose me Arona me hape: “Öi, tro pi hë epon qa ngöne la nöjeng, epon me angetre Isaraela. Tro jë troa nyihlue i Iehova tune lo hnei epuni hna qaja. 32 Xome jë fe la itre mamoe trahmany i epun, me itre kau trahmany i epun, nge tro jë hë, tune lo hnei epuni hna qaja. Ngo tro pe epun a amanathithi ni.”

33 Nge hnene la angetre Aigupito hna upe la nöje Isaraela troa canga tro qa ngöne la nöj, ke öni angatr: “Kösë meci asë hë së.” 34 Ame hnene la nöj hna xome la falawa i angatr nyine san nge tha hna levenën, me atuthe hnei iheetr la nyine xupi falawa, me atë hune la iape i angatr. 35 Nge hnene la angetre Isaraela hna kuca la hnei Mose hna upi angatr. Angatr a sipo angetre Aigupito jë la itre ewekë sileva me gool, me itre iheetr. 36 Nge hnei Iehova hna acian la ihnimi angetre Aigupito kowe la nöj, me hamë angetre Isaraela la hnei angatre hna sipon. Matre hnene la angetre Isaraela hna eöth asë la itre mo i angetre Aigupito.

37 Thupene lai, hnene la angetre Isaraela hna tro qa Ramese uti hë Sukotha. Ala 600 000 lao trahmany, nge tha hna e kö la itre nekönatr. 38 Ala nyimu* fe la itre xa atr, ka hane xötrethenge angatr. Hnei angatr hna xometrongëne la itre mamoe trahmany me kau trahmany, nge nyimutre catr la itre öni angatr. 39 Nge angatr a atrone jë la falawa, lo hnei angatr hna xome qa Aigupito. Hna kuci gato ka raon, ka pë levenen. Tha hna levenëne kö, ke hna helëne triji angatr qa Aigupito, matre pë ju kö ijin tro angatr a hnëkë kemej.

40 Traqa koi 430 lao macatre ne lapa angetre Isaraela e Aigupito. 41 Ame la kola traqa koi 430 lao macatre, hnene la nöje* i Iehova hna mejë qa Aigupito. 42 Ketre jidri lai nyine tro angatr a atrun, pine laka, hnei Iehova hna thepe angatr qa Aigupito. Tro la nöje Isaraela a atrunyi Iehova ngöne la jidri cili, nge tro la nöjei xötre atr e thupen a hane kuca tun.

43 Nge öni Iehova jë hi koi Mose me Arona ka hape: “Hane hi la hna amekötin göne la Paseka, tha tro kö la trenyiwa a hane xeni la Paseka. 44 Nge maine hetre hlue* hna itön hnene la ketre atr, tro angeic a xötrehatrene lai hlu. Matre troa aijijën lai hlu troa xen. 45 Ngo ame la itre trenyiwa ka traqa xan, me itre ka huliwa, tha hna aijijë angatre kö troa xen. 46 Isa ca mamoe trahmany hi la nyine troa öni ngöne la ca uma, nge tha tro kö a xome la sine mitr tröne lai uma. Tha tro kö epuni a axeciëne la ketre junene lai neköi mamoe trahmany. 47 Nge qa ne la nöje Isaraela asë troa atrune la Paseka. 48 Maine kola ajan hnene la ketre trenyiwa ka lapa thei epun troa sine la Paseka koi Iehova, loi e tro angeic a xötrehatrene la nöjei trahmanyi thei angeic. Nge e ase hë, ijiji angeice hë troa sine la Paseka, nge tro ha xome ceitunë angeic me ketre atre Isaraela. Ngo ame kowe la atre hna tha xötrehatren, hna wathebo angeice troa xeni la Paseka. 49 Casi hi la wathebo kowe la angetre Isaraela, me kowe la itre trenyiwa ka lapa thei epun.”

50 Ame hnene la nöjei atre Isaraela hna kuca thenge la hna amekötin hnei Iehova koi Mose me Arona. Ame hnei angatr hna trongëne hnyawa. 51 Drai cili hi, la Iehova a thepe angetre Isaraela* qa Aigupito.