Hnaaluene Tus i Aqane Lapa Itre Joxu

16 Ngöne la kola 36 lao macatre ne mus i Asa, hnei Baasa joxu ne Isaraela hna tro troa isi me Iudra. Nge nyidrëti a eköhagene* jë la traon ne Rama, matre tha tro kö la itre atr a kötre maine lö* kowe la nöje i Asa joxu ne Iudra. 2 Ame hnei Asa hna xome la sileva me gool, qa hnine la itre hnahag ne trengamo ne la uma ne hmi Iehova me hnalapa i joxu. Thupene lai, hnei nyidrëti hna upe asë koi Benadada joxu ne Suria ka lapa e Damaseko, me hape: 3 “Hetre isisinyikeu i nyiso, me isisinyikeu i kaka me keme i nyipë. Eni a iupi fë sileva me gool, haawe, apëne pi la isisinyikeu i nyipë me Baasa joxu ne Isaraela, matre tro angeic a mejë qa ngöne la nöjeng.”

4 Ame hnei Benadada hna drei Asa joxu, me upe la itre tane isi i nyidrë troa lepe la itre traon ne Isaraela. Matre hnei angatr hna thepe Ion, me Dana, me Abela-maima, me nöjei traon ne ami ewekë e Nafatali. 5 Matre ame hë la Baasa a drenge lai, tha eköhagene* ju hi nyidrë la traon ne Rama, nyidrë a nuetrij pi. 6 Ame hnei Asa joxu hna hëne la nöje Iudra asë troa kapa la itre etë, me itre agö hnei Baasa hna xome troa eköhagenyi* Rama. Nge Asa a huliwane jë la itre etë cili, troa eköhagenyi Geba, me Mizepa.

7 Ngöne la ijine cili, hnei Hanani atre qeje pu,* hna tro koi Asa joxu ne Iudra me hape: “Hnei ö hna mejiune kowe la joxu ne Suria, ngo tha mejiune* pe eö koi Iehova Akötresi ö, qa ngöne lai, tha tro kö la joxu ne Suria a kei hnene la lue ime i ö. 8 Hapeu, tha trongene isi ka tru kö lo angetre Aithiope me Libua, me itre ikatr me itre ka ti hos thei angatr? Ngo hnene laka, hnei ö hna mejiune koi Iehova, matre hnei nyidrë hna nue angatre koi ö. 9 Ke eje hi, kola kanothe la fen hnene la luemeke i Iehova, ke aja i nyidrë troa amamane la mene* i nyidrë kowe la itre ka nyihlue i nyidrë hnene la hni ka pexej.* Hmo catre la aqane ujë i ö, matre qane enehila, tro pala hi a hetre ka troa isi me eö.”

10 Ngo elëhni jë hi Asa kowe la atre qeje pu,* nge nyidrë a akalabusi* angeice jë, ke hnei nyidrëti hna dreng akötrëne la maca hna tro fë. Ngöne la ijine cili, hnei Asa fe hna nyiqaane qanangazone la itre xa atrene la nöj. 11 Hna fejan asë la mele i Asa, qane la qan uti hë la pun, hnine la Itusi ne la mele ne la itre joxu ne Iudra me Isaraela.

12 Ngöne la kola 39 lao macatre ne mus i Asa, hna tithe la lue waca i nyidrë hnei mec. Nge ngazo pi hë la mec i nyidrë, ngo e cili fe, tha hnei Asa kö hna thele ixatua thei Iehova, ngo thene la itre trene drösinö. 13 Ame hnei Asa hna meköl me itre qaaqaa i nyidrë ngöne la mec. Meci ju hi nyidrë ngöne la kola 41 lao macatre ne mus i nyidrë. 14 Hna kelemi nyidrëti pë hë hnine la hua atraqatr hnei nyidrë hna sin, ngöne la Traon i Dravita. Nge hna ameköle nyidrë hune la ili ne wezipo, ili hna köle oelë götin, me oel ka pui lolo hna ami nöjei pengöne ewekë thatraqai nyidrë. Nge hna amelene fe la ketre eë atraqatr* nyine atrunyi nyidrë.