Levitiko

4 Öni Iehova koi Mose ka hape: 2 “Hape jë kowe la angetre Isaraela: ‘Maine tro la ketre atr a kuca la ketre ewekë ka ngazo hna wathebon hnei Iehova nge tha hna thë kö:

3 “‘Nge maine tro la atre huuj hna iën a kuca la ngazo me nyi zöne la nöj, loi e tro angeic a tro fë koi Iehova la neköi kau ka pë engazon nyine huuj ne ngazo, matre ietrane la ngazo hna kuca. 4 Tro angeic a tro fë la kau qëmekei Iehova ngöne la hnë lö ne la itat ne icasikeu. Nge tro angeic a atë la ime i angeic hune la he ne la kau, me humuth ej qëmekei Iehova. 5 Thupene lai, tro la atre huuj hna iën a xome la sine la madra ne la kau, me tro fë kowe la itat ne icasikeu; 6 qa i angeic troa hnea la hene wanakoime i angeic ngöne la madra, me a 7 lao thathan ej qëmekei Iehova, qëmekene la imaano ne thewe hnahag ngöne la götrane gaa hmitrötr. 7 Nge qëmekei Iehova, ngöne la itat ne icasikeu, tro la atre huuj a köle hnei madra la itre jian* ne la ita ne dreu ka pui loi. Nge fene la ita ne huuj thatraqane la huuje ne dreuth asë, ka eje ngöne la hnë lö ne la itat ne icasikeu, tro angeic a neng asë la munëne madra ne la kau.

8 “‘Nge tro angeic a xom asë la girisi ne la kau thatraqane la huuj ne ngazo, memine la giris ka heetrëne la trenge xel, memin asë la igiris ka fedr ngöne la itre ixel, 9 memine la lue wene thulumat, memine la giris ka atuthe la lue wene thulumat. Nge ame hë la angeic a hule la lue wene thulumat, tro fe angeic a xome la igiris ka heetrëne la idre. 10 Celë hi itre igötranen hna xome fe qa ngöne la kau thatraqane la huuj ne tingeting. Nge tro la atre huuj a huhajine itre ej hune la ita ne huuj.

11 “‘Ngo ame la ikupeine kau memin asë la ijön, me hen, me itre wacan, me itre ixel, me agetrinen 12 ene la itre igötranene la kau ka lapa pe — qa i angeic troa tro fë tröne la lapa, ngöne la ketre götrane gaa hmitrötr, hnë triji hnatresij.* Nge tro angeic a dreuth itre ej hune la eë.

13 “‘Maine tro la angetre Isaraela a kuca la ketre ewekë ka ngazo, nge tha hna thë kö, ke hnei angatr hna kuca thatren la ewekë hna wathebon hnei Iehova, 14 nge mama ha la ngazo hna kuca, qa ne la ekalesia troa tro fë la neköi kau qëmekene la itat ne icasikeu, matre nyine huuj ne ngazo. 15 Nge qëmekei Iehova, qa ne la itre qatre thup ne la ekalesia troa ati im hune la he ne la kau. Nge tro ha humuthe la kau qëmekei Iehova.

16 “‘Thupene lai, tro la atre huuj hna iën a xome la sine la madra ne la kau, me tro fë kowe la itat ne icasikeu. 17 Qa i angeic troa hnea la hene wanakoime i angeic ngöne la madra, me a 7 lao thathan ej qëmekei Iehova, qëmekene la imaano ne thewe hnahag ngöne la götrane gaa hmitrötr. 18 Thupene lai, tro la atre huuj a köle hnei madra la itre jian ne la ita ne huuj qëmekei Iehova, ngöne la itat ne icasikeu. Tro angeic a neng asë la munëne la madra ne la kau, fene la ita ne huuj thatraqane la huuje ne dreuth asë, lo ka ej ngöne la hnë lö ne la itat ne icasikeu. 19 Nge tro angeic a xom asë la igirisin ej me huhajin hune la ita ne huuj. 20 Tro angeic a kuca kowe la kau celë, tune lo aqane kuca i angeic kowe la kau nyine huuj ne ngazo. Celë hi hna troa kuca hnene la atre huuj matre ietrane la ngazo ne la nöj, nge tro ha nue la ngazo i angeic. 21 Nge tro angeic a tro fë la kau tröne la lapa, me dreuthe tune lo aqane dreuth angeic lo pane kau. Celë hi huuj ne ngazo thatraqane la ekalesia.

22 “‘Nge e tro la ketre tan a kuca la ketre ewekë ka ngazo qa ngöne la itre wathebo hna athip hnei Iehova Akötresi angeic, nge tha hna thë kö, nge kola atre e thupen, 23 maine pena kola qaja amamane koi angeic ka hape, hnei angeic hna ena la ketre wathebo, loi e tro angeic a tro fë la neköi nani trahmanyi ka pë ethan nyine huujën. 24 Nge tro angeic a atë la ime i angeic hune la he ne la neköi nani, nge qëmeke i Iehova, tro angeic a humuth la öni nyine huuje ne dreuth asë ngöne la götran hnë humu öni. Celë hi huuj ne ngazo. 25 Nge qa ne la atre huuj troa hnea la hene wanakoime i angeic ngöne la madra ne la huuj ne ngazo, me köle hune la itre jian ne la ita ne huuj thatraqane la itre huuje ne dreuth asë, me nenge la munëne la madra fene la ita ne huuj. 26 Nge tro angeic a huhajin asë la igiris hune la ita ne huuj, tune la aqane huujëne la igiris ne huuj ne tingeting; nge tro la atre huuj a sipon matre troa senge la ngazo i angeic, nge tro ha nue la ngazo i angeic.

27 “‘Maine tro la ketre atrene la nöj a kuca la ketre ngazo qa ngöne la itre wathebo hna athip hnei Iehova, nge tha hna thë kö, nge angeic a atre e thupen, 28 maine pena kola thuemacanyi angeic ka hape, hnei angeic hna kuca la ketre ewekë ka ngazo, loi e tro angeic a huujëne la neköi nani föe, pine la ngazo hnei angeic hna kuca. 29 Tro hë angeic a atë la ime i angeic hune la he ne la öni thatraqane la huuj ne ngazo, me humuth ej ngöne la götran hna humuth la itre huuj ne dreuth asë. 30 Nge qa ne la atre huuj troa hnea la hene wanakoime i angeic ngöne la madra ne la huuj ne ngazo, me köle hune la itre jian ne la ita ne huuj thatraqane la itre huuje ne dreuth asë, me nenge la munëne la madra fene la ita ne huuj. 31 Nge tro angeic a xom asë la giris, tune la aqane hule la giris ne la huuj ne tingeting. Nge tro angeic a huhajin ej hune la ita ne huuj, nyine huuj ne eë ka pui loi koi Iehova; nge tro la atre huuj a sipon matre troa senge la ngazo i angeic, nge tro ha nue la ngazo i angeic.

32 “‘Ngo maine angeic a ajan troa huujëne la neköi mamoe nyine huuj ne ngazo, loi e tro angeic a tro fë la neköi mamoe föe ka pë engazon. 33 Nge tro angeic a atë la ime i angeic hune la he ne la öni, matre nyine huuj ne ngazo. Nge tro angeic a humuth la öni nyine huuj ne ngazo, ngöne la hnë humu öni nyine huuj ne dreuth asë. 34 Nge qa ne la atre huuj troa hnea la hene wanakoime i angeic ngöne la madra ne la huuj ne ngazo, me köle hune la itre jian ne la ita ne huuj thatraqane la itre huuje ne dreuth asë, me nenge la munëne la madra fene la ita ne huuj. 35 Nge tro angeic a xom asë la igiris, tune la aqane xome la girisi ne la neköi mamoe trahmanyi nyine huuj ne tingeting. Nge ngöne la ita ne huuj, tro angeic a huhajin ej hune la itre huuj ne eë thatraqai Iehova; nge tro la atre huuj a sipone matre senge la ngazo hnei angeic hna kuca, nge tro ha nue la ngazo i angeic.