Esodro
19 Ngöne la hnaakönine treu, thupene la angetre Isaraela a tro qa Aigupito, angatr a traqa ju ngöne la hnapapa ne Sinai, hmekune lo drai ne kola tro qa Aigupito. 2 Nge hnei angatr hna tro qa Refidima, me traqa ngöne la hnapapa ne Sinai. Nge hnei angatr hna acili itat ngöne la hnapapa, me lapa qëmekene la wetr.
3 Ame hnei Mose hna elë kowe la nyipi Akötresie, nge Iehova a hë angeice jë qa hune la wetr, me hape: “Hane hi la nyine tro eö a qaja kowe la itre matra i Iakobo, itre nekö i Isaraela. 4 ‘Öhne hë epuni la hnenge hna kuca koi angetre Aigupito, matre troa ati epun hune la itre iape ne aeto koi ni. 5 Enehila, e tro epuni a drei ni hnyawa, nge e tro epuni a metrötrëne la isisinyikeung, tro hë epuni a atu ka cong* hune la itre xa nöj, ke ewekëng asë hi la ihnadro. 6 Tro hë epuni a baselaia ne itre atre huuj, me nöje ka hmitrötre koi ni.’ Hane hi la nyine tro eö a qaja koi angetre Isaraela.”
7 Nge hnei Mose hna tro troa hëne la itre qatr ne la nöj, me qaja la nöjei trengewekë hnei Iehova hna upi angeice troa qaja. 8 Thupene lai, hnene la nöj asë hna ce sa ka hape: “Ame asë hi la hna qaja hnei Iehova, tro huni a kuca.” Matre Mose a canga tro ju troa qaja koi Iehova la aqane sa ne la nöj. 9 Nge öni Iehova koi Mose: “Tro ni a uti koi eö nyipine la iaw ka mit, matre tro la nöj a dreng la eni a ithanata me eö, nge matre tro pala hi angatr a mejiune koi eö.” Ame hnei Mose hna qaja koi Iehova la aqane sa ne la nöj.
10 Öni Iehova jë hi koi Mose ka hape: “Tro jë kowe la nöj, nge ahmitrötrë angatre jë enehila, me elany. Nge qa i angatr troa wasine la itre iheetre i angatr. 11 Loi e tro angatr a hnëkë kowe la hnaakönine drai, ke ngöne la drai cili, tro Iehova a uti kowe la wetre Sinai, qëmekene la nöj asë. 12 Qa i eö troa ami ifego kowe la nöj, me hape: ‘Wange kö ke elëne jë epuni la wetr, nge wange kö ke ketre pi epuni la ezin, ke e tro ketre a ketr, tro ha humuthi angeic. 13 Nge pëkö iwanakoime ka troa ketr la atre eni wathebo, ke tro ha tranyi angeic hnei etë, maine jaqa* angeic. Ceitune hi la atr me öni, tro angeic a mec.’ Ngo e ho hë la trutru,* ijiji angatre hë troa elëne la wetr.”
14 Ame hnei Mose hna uti qa hune la wetr kowe la nöj, me ahmitrötrë angatr, nge angatr a wasine ju la itre iheetre i angatr. 15 Öni angeice kowe la nöj: “Hnëkë jë kowe la hnaakönine drai, nge tha tro kö a ce meköle* la lue trefën.”
16 Ame la hnaakönine drai e hmakany, hna keciqa la hedreng me samek, nge hetre iaw ka mit hune la wetr, me mejene trutru ka catr. Nge itre atrene la nöj a isa hmengöhmengön ngöne la lapa. 17 Matre hnei Mose hna tro fë la nöj troa ixelë memine la nyipi Akötresie. Nge angatr a cile ju fene la wetr. 18 Kola so menu la wetre Sinai, ke hnei Iehova hna uti kow ej ngöne la eë. Nge kola elë la hajine eë, tune la hajine la hnasaihnyi, nge kola enienije catre la wetr. 19 Kolo pala hi a ho catre draië la trutru, nge Mose a ithanata, nge kola sa* koi angeic hnene la nyipi Akötresie.
20 Celë hi aqane uti Iehova kowe la wetre Sinai, hune la hene la wetr. Nge Iehova a hë Mose jë qa hune la wetr, nge Mose a elë jë. 21 Öni Iehova jë hi koi Mose ka hape: “Uti pi, nge qaja jë kowe la nöje ka hape, the tupathe kö troa traqa ngöne la itre ifego troa goeë Iehova, wanga nyimu ka meci jë qaathei epun. 22 Nge loi e tro la itre atre huuj ka tro lapa koi Iehova a ahmitrötrë angatr, matre tha tro kö Iehova a lepi angatr.” 23 Öni Mose jë hi koi Iehova ka hape: “Thatreine kö la nöj troa elë hune la wetre Sinai, ke ase hë nyipë qaja koi huni ka hape, ‘ami ifego jë xötreithe la wetr, me ahmitrötrën.’” 24 Ngo Iehova a sa ju ka hape: “Tro jë, uti pi nge elë hmaca jë, eö me Arona. Ngo the tro kö la itre atre huuj, memine la nöj a sasaithe la itre ifego troa elë koi Iehova, matre tha tro kö nyidrëti a lepi angatr.” 25 Ame hnei Mose hna uti kowe la nöj, me qaja la itre trengewekë cili.