Levitiko

22 Öni Iehova hmaca jë hi koi Mose: 2 “Qaja jë koi Arona me itre nekö i angeic ka hape, loi tro angatr a thupëne* la aqane tro angatr a huliwane la itre ewekë ka hmitrötr ne la angetre Isaraela. Nge tha tro kö angatr a pë metrötr kowe la ëjeng ka hmitrötr ngöne la angatr a ahmitrötrëne* la itre ewekë koi ni. Iehova ni. 3 Qaja jë koi angatr ka hape: ‘Ame ngöne la nöjei xötr atr, maine tro la ketre matra i epun ka pui ngazo a easenyine la itre ewekë hna ahmitrötrëne hnene la angetre Isaraela thatraqai Iehova, ke tro ha apatrenyi* angeic qaatheng. Iehova ni. 4 Tha tro kö la ketre matra i Arona ka lepera maine ka neni la zane qa ngöne la kahmitrötr, a hane xeni la itre ewekë ka hmitrötr, ke tha ka pui loi petre kö angeic. Ketre tune fe kowe la atr ka ketr la ketre atr ka pui ngazo qa ngöne la hna ketr la ka mec, memine la atr ka neni la zane ngönetrei, 5 me ka ketr la ketre neköi öni ka pui ngazo, me ka ketr la ketre atr ka pui ngazo, ke tro ha apuingazonyi angeic. 6 Ame la atre ketr itre ej, tro hë angeic a pui ngazo uti hë e hej, nge tha tro kö angeic a xeni la itre ewekë ka hmitrötr. Ngo tro pe angeic a siëne la ngönetrei i angeic ngöne la tim. 7 Nge e lö hë la jö, tro hë angeic a pui loi, nge thupene lai, ijiji angeice hmaca ha troa xeni la itre ewekë ka hmitrötr, ke celë hi a i angeic. 8 Ame la öni ka mec maine hna heje thaitrëne hnene la ketre öni wael, ke tha tro kö angeic a öni, wanga pui ngazo jë angeic. Iehova ni.

9 “‘Tro angatr a thupëne la itre hnëqa i angatr thatraqai ni, matre tha tro kö angatr a ngazo me mec, pine angatr tha metrötrëne la itre ewekë ka hmitrötr. Iehova ni, atre ahmitrötrë angatr.

10 Ame la atr ka tha sine kö la fami ne la atre huuj, tha tro kö angeic a xen la ewekë ka hmitrötr. Nge tha tro kö a xeni la ewekë ka hmitrötr hnene la trenyiwa, memine la atr hna nyithupen ka lapa memine la atre huuj. 11 Ngo maine tro la atre huuj a itöne la ketre atr memine la mani i angeic, ijije hi tro la atre cili a hane xen. Nge ijije fe tro la itre hlu hna hnahon ngöne la hnalapa i angeic, a hane xeni la a i angeic. 12 Maine tro la neköne la atre huuje jajiny a faipoipo memine la ketre trahmany, nge tha atre huuje kö, tha tro kö angeic a xeni la itre ewekë ka hmitrötr hna huujën. 13 Ngo maine ketre sine föe* la neköne la atre huuj, maine ka sei hna cil pena, nge pëkö matra i angeic, nge angeic a bëeke hmaca kowe la hnalapa ne la keme i angeic, ijiji angeic troa xeni hmaca la a ne la keme i angeic; ngo ame la atr ka tha sine la fami ne la atre huuj, ke tha tro kö angeic a xen la ewekë ka hmitrötr.

14 “‘Maine tro la ketre atr a xeni menu la ewekë ka hmitrötr, qa i angeic troa nyixane hmaca hnene la hna 5 ne la thupene ej, me tro fë kowe la atre huuj. 15 Tha tro kö la itre atre huuj a pë metrötr kowe la itre ewekë ka hmitrötr, hna huujëne thatraqai Iehova hnene la angetre Isaraela, 16 me nyizöne la nöj hnene la menu i angatr, ngöne la angatr a nue la nöj troa xeni la itre ewekë ka hmitrötr; ke Iehova ni, atre ahmitrötrëne la nöj.’”

17 Öni Iehova hmaca jë hi koi Mose: 18 “Qaja jë koi Arona me itre nekö i angeic, memine la nöje Isaraela, ka hape: “Ame la atre Isaraela maine ketre trenyiwa thei angatr ka tro fë huuje koi Iehova, matre eatrëne la hnei angeice hna sisiny, maine huuje hna tro fë xanën, 19 loi e tro angeic a tro fë la ketre öni trahmanyi ka pë ethan hna xome qa ngöne la itre öni ka tru, itre neköi mamoe trahmany, maine itre nani, matre troa kepe angeic. 20 Tha tro kö epuni a tro fë la ketre öni ka hetre ethan, ke tha tro kö a kepe epun.

21 “‘Maine tro la ketre atr a tro fë koi Iehova la huuj ne tingeting, matre eatrëne la hnei angeice hna sisiny, maine huuje hna tro fë xanën, loi e tro angeic a tro fë la ketre öni ka pë ethan, hna xome qa ngöne la itre öni ka tru maine itre öni ka co, matre troa kepe angeic. Nge tha tro kö a hetre ethane la öni. 22 Tha tro kö epuni a huujëne la ketre öni ka timek, maine ka xecie waca, maine ka eatr, maine ka si xumutr, maine ka kuthony, maine ka si ixelek; tha tro kö epuni a tro fë koi Iehova la itre öni cili, me dreuth itre ej hune la ita ne huuj thatraqai Iehova. 23 Ngo ijiji epun troa tro fë nyine huuj hna tro fë xanën, la ketre kau maine ketre mamoe ka hetre hnepe ngönetrei ka qea maine ka co; ngo ame göne la huuje hna sisiny, ke tha tro kö a kepe ej. 24 Tha tro kö epuni a tro fë koi Iehova la ketre öni ka eatr, maine hna tranetran, maine hna huletrij, maine hna xöje pena la ekön. Tha tro kö epuni a huujëne la itre öni cili ngöne la nöje i epun. 25 Nge tha tro kö epuni a kapa la ketre öni cili qaathene la trenyiwa, matre tro fë la falawa ne la Akötresi epun, ke ka hetre engazon maine ethan. Tha tro kö a kapa la itre öni cili.’”

26 Öni Iehova hmaca jë hi koi Mose: 27 “Ame ngöne la ijine kola hnahone la kau, maine la mamoe trahmany, maine la nani föe, tro nyën a pane lapa me thine i nyën koi 7 lao drai. Ngo ame ngöne la hna 8 ne drai, ke tro ha kepe nyën nyine huuj ne eë thatraqai Iehova. 28 Ame göne la kau maine mamoe, tha tro kö epuni a ce humuth la öni memine la nekön ngöne la ca drai.

29 “Maine tro epuni a huuj thatraqai Iehova la huuje ne ole, qa i epuni troa huujën ej, matre tro nyidrëti a kepe epun. 30 Tro ha öni ngöne la ca drai. Tha tro kö epuni a ami munëne uti hë elanyi hmakany. Iehova ni.

31 “Qa i epun troa thupëne la itre wathebong me trongëne itre ej. Iehova ni. 32 Tha tro kö epuni a pë metrötr kowe la ëjeng ka hmitrötr, nge tro ha ahmitrötrë ni nyipine la angetre Isaraela. Iehova ni, atre ahmitrötrë epun, 33 nge atre thepe epuni qa Aigupito, matre tro epuni a atre laka, Akötresieti ni. Iehova ni.