Ieremia
31 “Ngöne la ijine cili,” öni Iehova, “tro ni a Akötresi ne la nöjei fami ne Isaraela, nge tro angatr a nöjeng.”
2 Hane hi la hna qaja hnei Iehova:
“Ame la nöje ka mel qa ngöne la isi,* ke hna kepe angatr hnei Akötresie ngöne la hnapapa
Lo Isaraela a tro kowe la hnë mano i angeic.”
3 Hnei Iehova hna mama koi ni qa gaa nanyi me hape:
“Hnenge hna hnimi ö hnene la ihnim ka epine palua.
Celë hi matre, hnenge hna huli ö koi ni hnene la ihnimi nyipicing.*
4 Tro ni a xupi ö hmaca, nge tro ha acili ö.
Jajinyi* ne Isaraela fe, tro hmaca eö a xome la itre itrapë i ö
Me fiafia madrine trootro.
5 Tro hmaca eö a traa vin hune la itre wetr e Samaria;
Tro la itre ka traa vin a eëny, me isa iji wene rezën.
6 Ke tro ha traqa la ijine tro la itre ka thup hune la itre wetr ne Eferaima a sue me hape:
‘Cile jë! Elë jë së a tro Ziona koi Iehova Akötresi së.’”
7 Ke hane hi la hna qaja hnei Iehova:
“Sue madrine jë koi Iakobo.
Sue madrine jë, ke epuni la ka sisitria nyipine la itre nöj.
Tro fë jë lai; atrunyi Akötresieti jë me hape:
‘Iehova fe, amelene jë la nöje i nyipë, lo itre ka lapa pe e Isaraela.’
8 Tro ni a abëekë angatr qa ngöne la nöje kolopi.
Tro ni a acasi angatr qa ngöne la itre götran gaa nanyi ne la fen.
Thei angatr la ka timek me ka peje ca,
Memine la föe ka upune me ka hnaho, angatr asë hi.
E tro hë angatr a bëeke hmaca kowe la, tro hë angatr a ala nyim.
9 Tro angatr a traqa me treije trootro.
Tro angatr a xëwe koi ni, nge tro ni a eatrongë angatr.
Tro ni a tro sai angatr kowe la itre jë i tim,
Ngöne la gojenyi ka meköt, matre tha tro kö angatr a kei.
Ke eni la Keme i Isaraela, nge Eferaima la pane neköng.”
10 Drenge ju la hna qaja hnei Iehova, epun itre nöj,
Nge tro fë jë la trengewekë i nyidrë kowe la itre hnapeti gaa nany, me hape:
“Tro la atre aije Isaraela a acasi angatre hmaca.
Tro nyidrëti a thupë angatr tune la atr ka thupën la itre mamoe i angeic.
11 Ke tro hmaca Iehova a itö Iakobo
Nge tro nyidrëti a thepe* angeic qa ngöne la ime ne la atr ka catre kö hui angeic.
12 Tro angatr a bëek me sue madrin hune la wetre Ziona
Nge tro ha elitrauje la madrine i angatr hnene la itre manathith qaathei Iehova,
Ene la itre wene feja, me waina ka hnyipixe, me oel,
Me itre neköi mamoe, me itre neköi kau.
Tro hë angatr a tune la ketre djardë hna fiie hnyawan,
Nge tha tro hmaca kö angatr a kucakuca.”
13 “Ngöne la ijine cili, tro hë la jajinyi* a fia madrin,
Memine la itre nekö trahmanyi me itre qatr, angatr asë hi.
Tro ni a saze la hnëmeci angatr koi madrin.
Tro ni a aupun me amadrinë angatr, matre thëthëhmine pi angatre la hleuhleu.
14 Tro ni a amejine la itre atre huuj hnene la itre xeni ka nyimutre,*
Nge tro la nöjeng a ngaa hnene la itre manathith qaatheng,”* öni Iehova.
15 “Hane hi la hna qaja hnei Iehova:
‘E Rama, kola dreng la ketre nin, kola awe me treije latresi:
Rakela la ka treije pine la itre nekö i eahlo trahmany.*
Tha ajane kö eahlo troa aupunyi eahlo pine la itre nekö i eahlo,
Ke patre hë angatr.’”
16 Hane hi la hna qaja hnei Iehova:
“‘The nue kö la nine i ö troa ho, me luemeke i ö troa treij,
Ke tro ni a amanathithine la itre huliwa i ö,’ öni Iehova.
‘Tro hmaca kö angatr a bëek qa ngöne la nöje ne la ithupëjia.’
17 ‘Ijije hi tro eö a mejiun kowe la drai elany,’ öni Iehova.
‘Tro hmaca kö la itre nekö i ö trahmanyi a bëek kowe la zi i angatr.’”
18 “Hnenge hna drenge la kola awe hnei Eferaima:
‘Hnei nyipëti hna haji ni, nge hnenge hna kapa la ihaji,
Tune la neköi kau hna tha amemëne kö.
Bëeke sai ni jë koi nyipë, matre tro ni a canga nuetrije la ngazo,
Ke nyipëti hi Iehova la Akötresing.
19 Eje hi, thupene la eni a nuetrije la ngazo, hnenge hna hace fë la hnenge hna kuca;
Thupene la hna atrotrohninë ni, hnenge hna lep la itrepëng hnei akötr.
Hnenge hna hmahma nge hna thaipië ni,
Pine la itre ngazo hnenge hna kuca lo eni a co.’”
20 “Hapeu, tha Eferaima kö la neköng ka sisitria, lo nekönge hniminang?
Ke ame mina la eni a wesitrë angeic, eni hmaca a meku angeic.
Hane hi lai kepin matre, eni a akötr* la eni a meku angeic.
Nge tro ni a utipi angeice hnyawa,” öni Iehova.
21 “Acile jë la itre sine etë nyine hatren ngöne la gojenyi ö,
Acile jë la itre poto nyine köja gojeny.
The jea kö qa ngöne la gojenyi ka tru, lo jë ne tro eö a trongën.
Bëeke jë jajinyi* ne Isaraela, bëeke jë kowe la itre traone i ö celë.
22 Uti hë eu la tro eö a luelu, jajinyi ka mele thoi?
Ke hnei Iehova hna xupe la ketre ewekë ka hnyipixe hune la ihnadro:
Tro la föe a canga huzune la trahmany.”
23 Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Ame la eni a troa acasine la itre hna kötre fë, tro ha qaja hmaca la itre trengewekë celë ngöne la nöj me itre traon e Iudra: ‘Epi tro Iehova a amanathithi ö, eö hnë lapa ka meköt, eö wetr ka hmitrötr!’ 24 Eje hi, tro ha ce mel e cili la itre atr qa Iudra me qa ngöne la itre traon ej, ene la itre ka eëny me itre ka axö öni. 25 Ke tro ni a amejine la nöjei atr ka kucakuca, nge tro ni a aegöcatrene* la itre ka pë trengecatr.”
26 Tha hmitre ju kö, nge hnenge hna hlë me fe la luemekeng. Ase petre hi ni meköle hnyawa.
27 “Dreng!” öni Iehova. “Tro ha traqa la drai ne tro ni a traan ngöne la nöje Isaraela me Iudra, la itre matra i atr me öni.”
28 “Eje hi, tune lo eni a goeë angatr matre fejetrij, me akein, me thëtrij, me apatren, me akötrë angatr, ketre tun, tro ni a goeë angatr matre xup me traan,” öni Iehova. 29 “Ngöne la ijine cili, tha tro hmaca kö a qaja ka hape: ‘Hnene la itre keme hna iji wene rezë ka ija,* ngo itre neköne pë hë la ka megi inyö.’ 30 Waea, tro kö sa isa meci pine la itre sipu ngazo së. Ame la atr ka iji wene rezë ka ija, angeice kö la ka troa megi inyö.”
31 “Dreng!,” öni Iehova. “Tro ha traqa la drai ne tro ni a kuca la isisinyikeu ka hnyipixe memine la nöje Isaraela me Iudra. 32 Tha tro kö la isisinyikeu celë a ceitu memine lo hnenge hna kuca me itre qaaqaa i angatr, ngöne lo eni a ea la ime i angatr matre thepe angatr qa Aigupito, ‘lo isisinyikeung hnei angatr hna nuetrij, ngacama eni hi lo nyipi maseta* i angatr,’ öni Iehova.”
33 “Ke hane hi la isisinyikeu hnenge hna troa kuca memine la nöje Isaraela thupene la itre drai cili,” öni Iehova: “Tro ni a amë la wathebong ngöne la mekuna i angatr me cinyanyin e kuhu hni i angatr. Eje hi, tro ni a Akötresi angatr, nge tro angatr a nöjeng.”
34 “Nge tha tro hmaca kö angatr a inine la atre lapa easenyi angatr me itre trejin me angatr ka hape: ‘Loi e tro epuni a atrepengöi Iehova!,’ ke tro asë hi angatr a atre ni, qaane ju hi la ka co uti hë la ka tru,” öni Iehova. “Tro ni a nue la ngazo i angatr, nge tha tro hmaca kö ni a mekun la itre tria i angatr.”
35 Hane hi la hna qaja hnei Iehova,
Lo atre hamëne la jö matre mel e lai,
Me itre wathebo* ne la treu me itre wëtresij matre thina e jidr,
Lo atre kapa draiëne la hnagejë me enijëne la itre hoke ne gejë,
Lo hna hën ka hape, Iehova joxu ne la itre trongene isi e hnengödrai:
36 “‘Hapeu, ijije kö troa triane la itre wathebo cili?,’ öni Iehova,
‘Ketre tun, tro pala hi la itre matra i Isaraela a ketre nöje qëmekeng.’”
37 Hane hi la hna qaja hnei Iehova: “‘Atreine kö së troa tuluthe la hnengödrai e koho, me waipengöne la itre trepene la fen e kuhu? Waea! Ketre tun, thatreine kö ni troa nuetrije la itre matra i Isaraela asë, pine la itre hnei angatr hna kuca,’ öni Iehova.”
38 “Dreng!,” öni Iehova. “Tro ha traqa la drai ne tro hmaca a xupe la traon thatraqai Iehova, qa ngöne la ita i Hananel uti hë la qëhnelö ne la Kona. 39 Eje hi, tro ha hule mekötine la eno nyine tulu uti hë la wetre Gareb, nge tro ej a ujë a tro Goatha. 40 Nge tro ha hmitrötre koi Iehova la hnathup asë ne la itre ka meci me itre hnatresij,* memine la nöjei hlapa asë uti hë la hnathup e Kederon, uti hë la kona ne la qëhnelö ne la itre hos e koië. Tha tro hmaca kö a fejetrije me thëtriji ej.”