Iosua
2 Ame hnei Iosua nekö i Nuna hna upe juetrëne la lue trahmanyi qa Sitima troa waipengöne la nöj. Öni angeice jë hi koi nyidro: “Tro jë troa waipengöne la nöj, nge wange hnyawane ju la traon ne Ieriko.” Ame hnei nyidro hna tro, me traqa kowe la hnalapa ne la ketre föe ne gojeny, Rahaba la ëjen. Nge nyidroti a lapa ju e cili. 2 Ame hnene la joxu ne Ieriko hna drei mejene laka: “Hnene la angetre Isaraela hna traqa e jidr troa waipengöne la nöj.” 3 Matre hnene la joxu ne Ieriko hna upe la itre trahmanyi troa qaja koi Rahaba ka hape: “Upe pi la lue trahmanyi ka lapa thei ö, ke nyidroti a traqa troa waipengöne la nöj asë.”
4 Ngo hnene la föe hna juetrë nyidro, me sa koi angatr ka hape: “Nyipici qa i nyidroti hi la, ngo thatre kö ni ka hape, nyidroti a traqa qa kaa. 5 Nge ame hë la kola hejihej, lo kola thinge la qëhnelö ne la traon, ke hnei nyidroti hna tro. Thatre kö ni ka hape, nyidroti a tro ië. Ngo maine tro epuni a canga huzu nyidro, ke canga tro hi epuni a e nyidro.” 6 (Hnei angeice pe hna elë sai nyidro hune la uma, me juetrë nyidro fene la itre zine lino hna amë wengën.) 7 Ame hnene la itre trahmanyi hna canga weje huzu nyidro, uti hë la gaa tëtë ne la hneopegejë Ioridrano. Nge hna thinge la qëhnelö ne la traon thupei angatr.
8 Ngo qëmekene tro la lue trahmany a meköl, hnei Rahaba hna elë hune la uma. 9 Öni angeice jë hi: “Atre hi ni ka hape, tro kö Iehova a hamë epun la nöj. Itre atren la nöj asë hi a xoue epun. 10 Ke drenge hë huni la aqane aqaqacilëne Iehova la tim qëmekei epun ngöne la Hnagejë Ka Palulu, lo epuni a tro qa Aigupito, memine lo epuni a humuthi* Sihona me Oga lo lue joxu ne Amora, ngöne la ketre götrane* la hneopegejë Ioridrano. 11 Matre ame hë la eahuni a drenge lai, ke jole pi hi la mekuna hun, nge pë hë trengecatren la nöj hnei epun. Ke ame Iehova Akötresi epun, Akötresie ka draië e koho hnengödrai me e celë fen. 12 Ngo enehila, ase hë ni amamane la ihnimi nyipicinge koi epon, matre pane sisinyi jë koi ni qëmekei Iehova laka, tro fe epon a hane amamane la ihnimi nyipici epon kowe la fami ne la kemeng; nge tro fe epon a hamëne la ketre hatren nyine anyipicine lai. 13 Qa i epon troa thupëne la mele ne la kemeng, me thineng, me itre xang, me itre trejin me eni, me nöjei atrene la hnalapa i angatr; qa i epon troa thepe hun qa ngöne la mec.”
14 Ame hnei nyidro hna sa ka hape: “Tro nyio a nue mel koi epun! Maine tha tro kö eö a qaja la tronge i nyio, tro hë nyio a amamane la ihnimi nyipici i nyio koi ö, me eatrëne la hnei nyio hna sisiny ngöne la Iehova a troa hamë hun la nöj.” 15 Thupene lai, hnei Rahaba hna autinyi nyidro qa ngöne la ketre mamala, jëne la ketre eno. Ke ame la hnalapa i angeic, eje ngöne la ketre götranen la ihag. Angeic a lapa hune la ihag ne la traon. 16 Nge öni angeice jë hi koi nyidro: “Tro jë kowe la itre wetr, nge pane zae ju e cili koi köni drai, matre tha tro kö la itre ka huzu epon a öhnyi epon. Ame hë la angatr a bëek, ijiji epone hmaca ha troa xome la gojenyi epon.”
17 Matre sa jë hi la lue trahmanyi koi angeic ka hape: “Tro nyio a metrötrëne la hnei nyio hna sisiny,* 18 e tro eö a pane kuca la ewekë celë: Ngöne la ijine tro huni a lö kowe la nöj, qa i ö troa hnöthe la ketre eno ka madra ngöne la mamala hnei ö hna autinyi nyio qa ngön. Nge tro eö a hën kowe la hnalapa i ö la kem me thine i ö, me itre trejin me eö, me itre atren asë ne la hnalapa ne la keme i ö. 19 E tro la ketre e angatr a tro qa ngöne la hnalapa i ö, ke zö i angeice kö la meci angeic,* ngo tha zö i nyio kö. Ngo maine troa traqa la ketre ewekë kowe la atre ka lapa ngöne la uma i ö, ke nyio hi la atrekë zön. 20 Ketre, e tro eö a qaja la tronge i nyio, ke e cili tro ha apëne lo hnei nyio hna sisinyi koi ö.” 21 Matre sa jë hi angeice ka hape: “Aqane ithanata i easë hi lai!”
Nge angeice pë hë a upi nyidroti jë. E thupen, hnei angeice hna hnöthe la eno ka madra ngöne la mamala. 22 Ame hnene la lue trahmanyi hna elë kowe la itre wetr, me pane zae e cili koi köni drai, uti hë la troa isa bëeke koi hnalapa hnene la itre ka huzu nyidro. Ke hnei angatr hna thel agö nyidro, ngo tha öhnyi nyidroti ju kö. 23 Ame hnei nyidroti hna uti qa ngöne la itre wetr, me sasaithe la hneopegejë. Hnei nyidroti hna tro troa wai Iosua nekö i Nuna, me qaja koi angeice la nöjei ewekë ka traqa koi nyidro. 24 Öni nyidroti jë hi koi Iosua: “Ase hë Iehova nue la nöje koi së. Eje hi, pëhë trengecatrene la itre atrene la nöj, hnei easë.”