Pane Tus Samuela
30 Köni drai ne pane tro Dravita me itre atre i angeic, matre traqa pi e Zikelag. Ngo ngöne la itre drai cili, hnei angetre Amaleka hna lepe la götrane kolojë,* me Zikelag. Hnei angatr hna lepe me manith la traon. 2 Hnei angatre hna othe la itre föe me nöjei atrene la traon, qaane la ka co uti hë la ka tru. Ngo pëkö ala casi hnei angatre hna humuth. Matre, thupene la hna oth me xome la itre atr, angatr a tro hmaca pi. 3 Matre ame hë la Dravita me itre atre i angeic a traqa ngöne la traon, traqa ju hi angatr a öhne laka, ase hë manith, nge patre hë la itre föi angatr, me itre nekö i angatr, trahmanyi me jajiny. 4 Angatr a treije catre jë, uti hë la thatrein angatr treij. 5 Nge hnene la angetre Amaleka hna hane xome la lue föi Dravita, Ahinoam qa Iezerela, me Abigaila lo hna mecitrij hnei Nabala, lo atre Karemela. 6 Atraqatre la trenge xou i Dravita, ke itre atre i angeic a pi humuthi angeic. Angatr a isa elëhni ke patre hë lo itre nekö i angatr, trahmanyi me jajiny. Ngo hnei Dravita hna xomi trengecatre thei Iehova, Akötresi angeic.
7 Öni Dravita jë hi koi Abiathara lo atre huuj, nekö i Ahimelek, ka hape: “Traqa fë pi la iefoda e ce.”* Matre Abiathara a traqa fë pi lai iefoda. 8 Dravita a hnyinge jë koi Iehova me hape: “Tro kö ni a huzune la itre atrekënö? Tro kö ni a atreine weji angatr?” Nge öni Akötresie: “Huzu angatre jë, ke tro eö a ee angatr, me amelene la itre hna oth.”
9 Ame hnei Dravita hna canga tro memine la 600 lao atre i angeic, nge angatr a tro ju kowe la hneopegejë* Besor. Nge hnene la itre xan e angatr hna cil e cili. 10 Matre hnei Dravita pë hë memine la ala 400 hna tro, nge lapa ju pe hi la ala 200, ke kucakuca catre hë angatr troa sasaithe la hneopegejë.
11 Nge ngöne la itre hlapa, hnene la itre soc hna öhne la ketre atre Aigupito. Matre angatr a tro sai angeice pi koi Dravita. Nge angatr a thue falawa i angeice jë me tim, 12 me ca sine gato wacua ka qaqacil, me lue gato rezë ka qaqacil. Angeic a xeni ju nge hetre trengecatre i angeice pi hi, ke köni drai hë ne tha xeni angeic me ij. 13 Öni Dravita jë hi: “Hlue i drei eö? Nge atre kaa eö?” Sa jë hi lai atre ka hape: “Thupëtresij ne Aigupito ni, nge eni la hlue ne la ketre atre Amaleka. Ngo hnene la masetang hna nuetriji ni, ke hnenge hna wezipo a köni drai hë la. 14 Hne huni hna lepe la götrane kolojë* ne la nöje i angetre Kerethi, memine la nöje Iudra, me götrane kolojë* ne la nöje i angetre Kaleba. Nge hne huni fe hna manithe la traon ne Zikelag.” 15 Ame hnei Dravita hna sipo angeice ka hape: “Tro kö eö a tro sai ni kowe la itre atrekënö?” Sa jë hi lai atre ka hape: “Tro ni a tro sai nyipë koi angatr, e tro nyipë a pane sisinyi qëmekei Akötresie laka, tha tro kö nyipëti a humuthi ni, maine nue ni kowe la masetang.”
16 Nge hnene lai atr hna tro sai Dravita kowe la itre atrekënö ka lapane la nöj. Itre atrekënö a xen, me ij, me feet, ke tru catr hnei ewekë hnei angatre hna atrekënö qa Filisiti me Iudra. 17 Dravita a isi jë me angatr, qaan e kaqa ne lai uti hë jidr. Nge hnei angeice hna humuthi angatr asë, ngo mele pe kö la ala 400 hune la itre kamela. 18 Dravita a eöthe jë la nöjei ewekë hna atrekënö hnei angetre Amaleka, me amelene la lue föi angeic. 19 Nge tha patre kö la ketre ewekë i Dravita me itre atre i angeic, ka co ju hë maine ka tru. Hnei angatr asë hna iöhnyi me itre nekö i angatr, trahmanyi me jajiny, me itre ewekë hna atrekënö. Haawe, Dravita a eöth asë jë la itre ewekë hna xom hnei itre atrekënö. 20 Nge Dravita a xome ju fe la itre mamoe me kau ne la itre atrekënö, nge itre atre i angeic a engëne panëne jë itre ej, nge pine pë hë la itre si i angatr. Nge angatr a qaja ka hape: “Itre ewekë i Dravita la.”
21 Thupene lai, Dravita me itre sinatronge i angeic a traqa ju kowe la hneopegejë Besor. Matre hnene lo 200 lao trahmanyi ka kucakuca, hna traqa troa itronyi me angeic. Nge Dravita a tro ju koi angatr, me hnyingë pengö i angatr. 22 Ngo hnene la itre xa soc ka ce tro me Dravita, itre ka ngazo thiina nge ka pë hnënyöngön, hna qaja ka hape: “Tha hnei angatre kö hna ce tro me easë, matre tha tro kö sa hane thue ewekë i angatr. Tro hi a hamë angatr la itre föi angatr me ha nekö i angatr, nge isa tro pi.” 23 Ngo sa jë hi Dravita ka hape: “Ange trejin, tha meköti kö lai, ke Iehova la ka hamën. Nyidrëti la ka thupë së, me nue koi së la itre atrekënö ka lepe la traone së. 24 Hmitrötr la hnei epuni hna qaja, ke casi hi la thupen kowe la atre isi, me atre thupë trengetreng. Tro asë hi sa kepe thupen, nge casi hi la aqane troa thawa la hna thapa.” 25 Matre qaane ju hi lai, ketre wathebo hna amekötine hë la hna qaja hnei Dravita, nge hna tune pala hi enehila e Isaraela.
26 Ame hë la Dravita a traqa e Zikelag, angeic a thawa pi la hna thapa, me iupi fë kowe la itre xa qatr ne Iudra, itre sinee i angeic, me hape: “Hane hi la ketre ahnahna* koi epun, ketre edrö hne huni hna thapa qaathene la itre ithupëjia me Iehova.” 27 Dravita a iupi fë pi la itre ahnahna kowe la itre ka lapa e Bethela, e Ramoth götrane kolojë,* me Iatira, 28 me Aroera, me Sifemo, me Esetemoa, 29 me kowe la itre ka lapa e Rakal, me Ieramela, me Keni, 30 me itre ka lapa e Horema, me Koreasan, me Athak, 31 me Heberona, me nöjei götran hna tro kow hnei Dravita, me itre atre i angeic.