Hnaaluene Tus i Samuela

3 Kolo pala hi a isi la itre sinexöle i Dravita me itre sinexöle i Saulo. Nge catre hë la lapa i Dravita, nge puje hë la lapa i Saulo.

2 Nge ame la ijine Dravita a mel e Heberona, hnei angeic hna hnaho trahmany. Aminona la ka tru, hna hnahon hnei Ahinoam qa Iezerela. 3 Kileaba la hnaaluen, hna hnahon hnei Abigaila, lo hna mecitrij hnei Nabala, atre Karemela. Nge Abasaloma la hnaakönin, hna hnahon hnei Maaka, nekö i Talemai joxu ne Gesuri. 4 Nge Adonia la hna 4, nekö i Hagitha. Nge Sefatia la hna 5, nekö i Abitala. 5 Nge Itherama la hna 6, nekö i Egela ketre föi Dravita. Hane hi la ëjene la itre nekö i Dravita hna hnahon e Heberona.

6 Ngöne la ijine kola isi la itre sinexöle i Saulo me itre sinexöle i Dravita, kolo pala hi a hlemu hnei Abinera hnine la lapa i Saulo. 7 Hetre ketre föi Saulo ekö, Rizepa la ëjen, nekö i Aia. Matre ngöne la ketre drai, hnei Ieseboseth hna qaja koi Abinera ka hape: “Hnauëne la eö a ce meköl memine la ketre föi kaka?” 8 Elëhni ju hi Abinera, matre öni angeic: “Ketre kuli ne Iudra ni! Hnenge pala hi hna nyipici kowe la fami i Saulo keme i eö, me kowe la itre trejin me angeic, me itre sinee i angeic. Nge tha hnenge kö hna salemë eö koi Dravita. Nge enehila, eö a nyizö ni pine eni tria me ketre föe! 9 Loi e tro Akötresie a të koi ni, e tha eatrëne kö ni la hnei Iehova hna sisinyi koi Dravita. 10 Ke hnei nyidrëti hna sisinyi troa thapa la mus qaathene la lapa i Saulo, me acili joxu Dravita troa mus hui Isaraela me Iudra, qaane Dana uti hë Bere-Seba.” 11 Haawe, lapa thaupu ju hi Ieseboseth, ke angeic a xoue Abinera.

12 Abinera a canga iupi fë maca jë koi Dravita, me hape: “Thatre kö eö ka hape, ewekë i drei la nöj?” Nge öni angeic hmaca jë: “Sisinyi jë me eni, nge tro ni a isin* matre tro la nöje Isaraela a cas fene la musi nyipë.” 13 Öni Dravita jë hi: “Ka loi, tro nyiso a isisinyikeu, ngo casi hi, e traqa pi eö, tro eö a traqa sai Mikala, lo nekö i Saulo. Ke e patre kö angeic, the traqa kö koi ni.” 14 Thupene lai, Dravita a iupi fë maca jë koi Ieseboseth nekö i Saulo, nge öni angeic: “Hamë Mikala hmaca pi föeng, lo hnenge hna oth hnene la 100 lao kupeine ka hmitrötr i angetre Filisiti.” 15 Ieseboseth a iupi jë troa thei Mikala thene la föi angeic, Paletiela nekö i Laisi. 16 Ame hnei Paletiela hna xötrethenge la föi angeic, me treije trootro uti hë Bahurim. Nge öni Abinera jë hi: “Tro pi, bëeke hmaca jë kowe la hnalapa i eö!” Nge angeic a bëeke hmaca jë kowe la hnalapa i angeic.

17 Nge ngöne la ijine cili, hnei Abinera hna iupi fë maca koi itre qatr ne Isaraela, me hape: “Ekö hë epun aja Dravita troa joxu. 18 Nge enehila, enije jë, ke ase hë Iehova qaja koi Dravita ka hape, ‘Jëne eö Dravita hlueng, tro ni a amelene la nöjeng Isaraela, qaathei angetre Filisiti, me itre ithupëjia xötreith.’” 19 Abinera a ithanata ju me angetre Beniamina, nge angeic a tro ju a tro Heberona troa ithanata acony me Dravita. Nge angeic a qaja ju la ewekë hna ce axeciën me angetre Isaraela, memine la tribu ne Beniamina.

20 Ame hë la kola traqa e Heberona hnei Abinera, me 20 lao sinatronge i angeic, Dravita a hnëkë xeni ju koi angatr, me feet. 21 Ame hnei Abinera hna qaja koi Dravita ka hape: “Joxunge fe, nue ni pi troa tro, me acasine la nöjei atre Isaraela fene la musi nyipë, matre tro angatr a isisinyikeu me nyipë. Nge tro hë nyipëti a joxu hun asë.” Dravita a nue angeice pi troa tro ngöne la tingeting.

22 Nge e cili hi la kola bëeke hnei Ioaba me itre soce i Dravita qa hna isi. Tru pi hë la hnei angatre hna thapa. Ngo patre hë Abinera e Heberona, ke ase hë Dravita nue angeic troa tro memine la tingeting. 23 Matre ame hë la Ioaba me itre soc a traqa, hnene la ketre atr hna canga thuemacanyi angeic ka hape: “Qa i Abinera hi la hna wai joxu, nge koilo hmaca ha, ke hna nue angeice hnyawa hnei joxu.” 24 Nge Ioaba a lö ju koi joxu me hape: “Nemene la hnei nyipëti hna kuca? Qa i Abinera hi la, nge hnei nyipëti hna nue angeice hnyawa! Hnauën? 25 Atre hi nyipë la pengöi Abinera nekö i Neri, qa i angeice la hna amenu nyipë, me goeëne la hnei nyipëti hna kuca.”

26 Ioaba a tro ju qaathei Dravita, me iup troa hë Abinera. Angatr a traqa ju koi Abinera ezine la sima ne Sira, ngo thatre pe Dravita. 27 Matre ame hë la Abinera a traqa e Heberona, Ioaba a xom aconyi angeice ju ngöne la hnë lö, me ithanata casi me angeic. Ngo Ioaba a thine ju la hni i Abinera hnei taua, matre meci ju hi angeic. Celë hi aqane të Ioaba lo meci* ne la jini angeic, Asael. 28 Nge ame hë la Dravita a drenge lai, öni Dravita jë hi: “Loi e tha tro kö Iehova a nyizö ni me baselaiang, la madra i Abinera nekö i Neri. 29 Loi e tro Ioaba me fami i keme i angeic a xeni pune la ihumuthi celë. Tro pala hi a hetreny ngöne la lapa i Ioaba la itre trahmany ka neni itrein, nge ka lepera, nge ka genyi itrei,* me itre hna humuth hnei taua, me itre ka mecijiin!” 30 Ngöne la drai cili, hnei Ioaba me Abisai mama i angeic, hna humuthi Abinera, ke hnei Abinera hna humuthi Asael jini nyidro, ngöne lo isi e Gibeona.

31 Thupene lai, öni Dravita koi Ioaba me itre ka ce me angeic ka hape: “Kuie zezene pi la itre iheetre i epun, nge heetrë ibëeke jë ka tru thenyin, nge treije pi Abinera jë.” Nge Dravita a xötrethengene jë la tronge ne kele wezipo. 32 Angatr a kelemi Abinera jë e Heberona. Nge qëmekene la hua, hnene la joxu hna treije me sue, ene pe, treije ju fe hi la nöj asë. 33 Nge hnene la joxu hna nyimane la nyima ne kele wezipo koi Abinera:

“Tro kö Abinera a mec tune la hmo?

Ngo meci hë eö kösë hna lepe hnei atre ihumuth.”*

Matre ame hë la nöj a drenge la nyima celë, treije hmaca jë hi angatr.

35 Nge e thupen, lo lai pala kö, hnene la nöj hna traqa fë falawa ne iakeukawanyi* koi Dravita. Ngo hnei Dravita pe hna sisinyi me hape: “Epi tro Akötresie a nyithupen koi ni, e xeni jë ni la falawa maine ketre ewekë, nge tha lö pala kö la jö.” 36 Öhne hi la nöj la aqane ujë i joxu, nge angatr a madrin. Nge hna tune pala hi kowe la nöjei ewekë hna kuca hnei joxu. 37 Matre ngöne la drai cili, hnene la itre soce i Dravita, me nöjei atre Isaraela hna atrehmekune laka, tha zö i joxu kö la mec i Abinera nekö i Neri. 38 Önine jë hi la joxu kowe la itre soc: “Thatre kö epun laka, nekö i joxu, me atre ka tru la atre ka mec enehila e Isaraela? 39 Hna ië ni troa joxu, ngo enehila, kucakuca ha ni. Nge ame la itre atre celë, itre nekö i Zeruia, eni a mekun laka, itre ka iakötrë catre angatr. Epi tro Iehova a të kowe la atre ihumuth, thenge la ngazo i angeic!”