Levitiko

20 Öni Iehova hmaca jë hi koi Mose: 2 “Hape jë kowe la angetre Isaraela: “Ame la atre Isaraela maine trenyiwa ka lapa thei epun ka huujëne la nekö i angeic koi Moleka, ke tro ha humuthi angeic. Nge qa ne la itre atrene la nöje troa tranyi angeic. 3 Nge tro ni a thipetrije la atre cili, me apatrenyi angeic qa ngöne la nöje i angeic, pine angeic huujëne la ketre nekö i angeic koi Moleka, me apuingazone la götraneng gaa hmitrötr, me tha metrötrëne la ëjenge ka hmitrötr. 4 Nge maine tro la itre atrene la nöj a thinge la luemeke i angatr ngöne la angeic a huujëne la nekö i angeic koi Moleka, me tha humuthi angeic, 5 tro hë ni a thipetrije la atre cili memine la fami i angeic, nge tro hë ni a apatrenyi* angeic, memine la itre ka xötrethenge angeic troa kuci ngazo me Moleka.

6 “‘Nge ame la atr ka tha mele nyipici,* nge ka tro troa wange la itre ka ithanata me itre ka mec, memine la itre ka qajaqaja la itre drai elany, tro hë ni a thipetrije la atre cili, me apatrenyi angeic qa ngöne la nöje i angeic.

7 “‘Ahmitrötrë epuni jë nge tro hë epuni a hmitrötr, Iehova ni Akötresi epun. 8 Nge qa i epun troa thupëne la itre wathebong me trongëne itre ej. Iehova ni, atre ahmitrötrë epun.

9 “‘Maine tro la ketre atr a ejine la keme i angeic, maine thine i angeic, tro ha humuthi angeic. Pine laka, hnei angeic hna ejine la keme i angeic, maine thine i angeic, tro ha zö* i angeice kö la mec i angeic.

10 “‘Ame la trahmanyi ka nyixetë memine la föe ne la ketre trahmany, ene la ka nyixetë memine la föe ne la atre lapa easenyi angeic, tro ha humuthi nyidro, ene la trahmanyi ka nyixetë, memine la föe ka nyixetë. 11 Ame la trahmanyi ka ce meköl memine la föe ne la keme i angeic, angeice hi lai a ahmahmane* la keme i angeic. Tro ha humuthi nyidro, nge zö i nyidroti kö la mec i nyidro. 12 Maine tro la ketre trahmanyi a ce meköl memine la tresi angeic, tro ha humuthi nyidro, ke ewekë ka tha meköti kö koi Akötresie, nge tro ha zö i nyidro la mec i nyidro.

13 “‘Maine tro la trahmanyi a ce meköl memine la ketre trahmany, tune la aqane ce meköl me föe, ke nyidroti lai a kuca la ewekë ka sis. Haawe, tro ha humuthi nyidro, nge tro ha zö i nyidro la mec i nyidro.

14 “‘Maine tro la trahmanyi a xome la föe memine la thine i nyën, ke ewekë lai ka sisi* catr, nge tro ha dreuthetriji angatr asë, matre tha tro kö a kuca la itre huliwa ka sis thei epun.

15 “‘Maine tro la trahmanyi a ce meköl memine la ketre öni, tro ha humuthi angeic, nge qa i epuni fe troa humuthe la öni. 16 Maine tro la ketre föe a easenyine la öni me ce meköle memin, nyipiewekë troa humuthe la föe memine la öni, nge zö i nyidroti kö la mec i nyidro.

17 “‘Maine tro la trahmanyi a ce meköl memine la xa i angeic, lo neköne la keme i angeic maine thine i angeic, nyidroti hi lai a kuca la ewekë nyine hmahman. Troa humuthi nyidro qëmekene la nöje i nyidro. Hnei angeic hna ahmahmane la xa i angeic, nge tro hë angeic a xeni pune la ngazo i angeic.

18 “‘Maine tro la ketre trahmany a ce meköl memine la föe ngöne la kola traqa la meci föe, tha nyidroti kö lai a metrötrëne la madra, matre tro ha apatrenyi nyidro qa ngöne la nöje i nyidro.

19 “‘Tha tro kö eö a ce meköl memine la trejin me thine i ö, maine pena la xa ne la keme i ö, ke tro hë eö lai a ahmahmane la sipu fami i ö. Tro hë nyidroti a xeni pune la ngazo i nyidro. 20 Ame la trahmanyi ka ce meköl memine la föene la trejin me keme i angeic, ke angeice lai a ahmahmane la trejin me keme i angeic. Tro hë nyidroti a xeni pune la ngazo i nyidro, me mec, me pë matran. 21 Maine tro la trahmanyi a xome la föene la trejin me angeic, ke ewekë ka sisi catre lai. Ase hë angeic ahmahmane la trejin me angeic, nge tro hë nyidroti a mec me pë matran.

22 “‘Qa i epun troa thupën asë la itre wathebong me itre hnenge hna amekötin, me trongën itre ej, matre tha tro kö a hmitranetriji epun hnene la nöj hnenge hna tro sai epun troa lapan. 23 Tha tro kö epuni a xötrethengen la itre hna majemine kuca hnene la itre nöj hnenge hna helëne qëmekei epun, ke hnei angatr hna kuca la nöjei ewekë cili, matre hnenge hna methinë angatr. 24 Celë hi matre hnenge hna qaja koi epun ka hape: ‘Tro hë epuni a xome la nöje i angatr, lo nöje gaa neni gala hnei melek me miel, nge tro ni a hamën ej koi epuni matre troa lapan. Iehova ni Akötresi epun, atre aisa* epun memine la itre xaa nöj.’ 25 Tha tro kö epuni a xome ceitune la öni ka pui loi me öni ka pui ngazo, maine pena la waco ka pui ngazo me waco ka pui loi; tha tro kö epuni a pui ngazo hnene la ketre öni, maine ketre waco, maine nöjei pengöne öni ka wewë, lo hnenge hna isa amë, matre tro epuni a goeëne itre ej kösë ka pui ngazo. 26 Tro epuni a hmitrötre koi ni, ke ame ni Iehova, hmitrötre ni. Nge hnenge hna ië epun qa ngöne la itre nöj, matre tro epuni a nöjeng.

27 “Ame la itre trahmanyi me itre föe ka ithanata me itre ka mec, maine ka qajaqaja la itre drai elany, ke loi e troa canga tranyi angatr hnei etë uti hë la tro angatr a mec. Nge zö i angatre kö la mec i angatr.’”