Pane Tus i Aqane Lapa Itre Joxu

22 Nge öni Dravita jë hi: “E celë la hna troa acile la uma i Iehova la nyipi Akötresie. Nge celë hi la göhnene la ita ne huuj koi Isaraela.”

2 Haawe, Dravita a iupi jë troa hëne la itre ka lapa trenyiwa ngöne la nöje Isaraela. Nyidrëti a acili angatre jë troa thupe etë, tro angatr a jel me thupe etë nyine xupe la uma ne hmi ne la nyipi Akötresie. 3 Dravita a hnëkë fao atrunyi jë, nyine jei faone la itre hune qëhnelö, me kuca la itre nyine acatren, me hnëkë kopa matre thatreine kö troa tuluthe la etrun ej, 4 me itre ngöne sinöe arasi hna thatreine e. Ke hnei angetre Sidona me Turo, hna traqa fë arasi atrunyi koi Dravita. 5 Nge öni Dravita: “Nekönatr pala kö Solomona neköng, nge thatre kö nyëne koilo,* ngo nyipiewekë tro la uma hna troa xupe koi Iehova a mingöminge catr, matre tro ej a hlemu, nge troa qaja la emingömingön ngöne la nöjei nöj. Haawe, tro ni a hnëkë ewekë koi nyën.” Matre qëmekene tro Dravita a mec, hnei nyidrëti hna pane hnëkën atrune la itre jia ne huliwa.

6 Nge Dravita a hë Solomona nekö i nyidrë, me upi angeic troa xupe la uma ne hmi koi Iehova Akötresi Isaraela. 7 Öni Dravita jë hi koi Solomona nekö i nyidrë: “Hnenge hna pi xupe la uma kowe* la ëje i Iehova Akötresing. 8 Ngo öni Iehova koi ni, ‘Hnei ö hna anenin atrune la madra, nge hnei ö hna sine la itre isi ka tru. Matre tha eö kö la ka troa xupi uma kowe la ëjeng, ke hnei ö hna anenin atrune la madra qëmekeng hune la ihnadro. 9 Ngo dreng! Tro eö a hnaho nekö trahmany. Tro angeic a ketre atrene la tingeting,* nge tro angeic a mano, ke tro ni a amano angeic me amele angeic qaathene la nöjei ithupëjia xötreith. Celë hi matre troa ati ëje i angeic, Solomona,* nge tro ni a kuca matre tingetinge pi Isaraela me pë mejen, ngöne la ijine mus i angeic. 10 Angeice hi la ka troa xupe la uma kowe la ëjeng. Tro angeic a neköng, nge tro ni a keme i angeic, tro ni a nyipi acatrene la mus i angeic hui Isaraela, uti hë epin.’

11 “Ngo enehila neköng, epi tro Iehova a ce me eö. Epi tro eö a eatrëne la huliwa i ö qaathei Iehova. Xupe jë la uma i Iehova Akötresi ö, tune lo hnei nyidrë hna qaja. 12 Nge e traqa ha la ijine Iehova a acili ö troa mus hui Isaraela, epi tro nyidrëti a hamëne koi ö la atreine troa tuluewekë, me inamacan, matre tro eö a atreine drenge la wathebo i Iehova Akötresi ö. 13 Nge e tro eö a trongëne hnyawa la itre wathebo, me itre hna amekötin hnei Iehova hna hamë Isaraela jëne Mose, tro hë eö a tro loi. Haawe, hni ne trahmanyi jë, nge catre pi, the xou kö, nge the hmengöhmengöne kö. 14 Ase hë ni isine troa hnëkë ewekë kowe la uma i Iehova, ene la 100000 lao talane* gool, me 1000000 lao talane sileva, me kopa me fao hna thatreine e, ke tiqa pala ha. Nge hnenge fe hna hnëkë sinöe me etë, ngo loi e tro fe eö a nyixan. 15 Ala nyimu fe la itre ka troa huliwa koi ö, itre ka thupe etë, me itre ka xupi uma, me itre ka tratrau sinöe, me itre ka atreine kuca la nöjei pengöne huliwa. 16 Nge thatreine kö e me tuluthe la etrune la gool, me sileva, me kopa, me fao. Haawe enehila, huliwa jë hë, nge epi tro Iehova a ce me eö.”

17 Thupene lai, Dravita a amekötine jë kowe la nöjei he ne nöj troa xatua Solomona nekö i nyidrë, me hape: 18 “Hapeu, tha ce epuni kö me Iehova Akötresi epun? Nge tha hnei nyidrëti kö hna hamë tingeting xötreithi epun? Eje hi, hnei nyidrëti hna acili ni troa mus hune la nöj, nge ewekë i Iehova me nöje i nyidrë la itre zi së. 19 Enehila, isine jë troa thele Iehova Akötresi epun, hnene la hni epuni ka pexej, me mele* i epuni ka pexej. Nyiqane xupe jë hë la uma ne hmi i Iehova lo nyipi Akötresie, matre troa traqa fë la pua ne isisinyikeu i Iehova, me alöne la itre ewekë hna ahmitrötrën hnine la uma hna xup, thatraqane la ëje i Iehova lo nyipi Akötresie.”