Hnaaluene Tus i Aqane Lapa Itre Joxu
33 Traqa koi 12 lao macatre i Manase lo kola acili joxu nyidrë. Hnei nyidrë hna musi koi 55 lao macatre e Ierusalema.
2 Hnei nyidrëti hna kuca la ngazo qëmeke i Iehova, me xome la itre thiina ka sis ne la itre xa nöj, lo hnei Iehova hna helën matre hamëne la zi angatr kowe la angetre Isaraela. 3 Hnei nyidrëti hna xupe hmaca la itre hnë hmi gaa hmitrötr hna apatren hnei Hezekia keme i nyidrë. Nge hnei nyidrëti hna acile fe la itre ita ne huuj kowe la itre Baala, me itre ipoto ka hmitrötr. Nge nyidrëti a thili ju qëmekene la nöjei aliene la hnengödrai, me nyihluen itre ej. 4 Hnei nyidrëti fe hna xupe la itre xa ita ne huuj hnine la uma ne hmi i Iehova, lo hnei Iehova hna qaja ka hape: “Tro ni a amë la ëjeng e Ierusalema uti hë epin.” 5 Nge ngöne la lue götrane gaa pë ihakun hnine la uma ne hmi i Iehova, hnei Manase hna xupe la itre ita ne huuj thatraqane la itre hna xup e hnengödrai. 6 Hnei nyidrëti fe hna dreuthe la itre sipu nekö i nyidrë trahmany, ngöne la Hnathup Ne La Nekö i Hinom, me kuci haze, me wai itre trene iöni, me kuci iöni, me acil la itre ka ithanata me itre ka mec, me itre ka qajaqaja la drai elany. Nyimutre catre la itre ngazo hnei Manase hna kuca qëmeke i Iehova, nyine amejëne la trenge hni i nyidrë. 7 Hnei Manase hna amë la idrola hnei nyidrëti hna kuca, hnine la uma ne hmi ne la nyipi Akötresie. Ngo ame göne la uma ne hmi, hnei Akötresieti lo hna qaja koi Dravita, me koi Solomona nekö i Dravita ka hape: “Tro pala hi ni a amë la ëjeng hune la uma celë, me e Ierusalema, traon hnenge hna iën nyipine la nöjei tribu ne Isaraela. 8 Nge e tro pala hi angatr a metrötrëne hnyawa la hnenge hna upi angatr troa kuca, ene la nöjei Wathebo, me itre hna amekötin, lo hna hamë angatr jëne Mose, tha tro hmaca kö ni a helë angetre Isaraela qa ngöne la nöj hnenge hna hamën kowe la itre qaaqaa i angatr.” 9 Ngo hnei Manase pala hi hna huli angetre Iudra, me Ierusalema troa kuca catrëne la ngazo, matre co pë hë la ngazo ne la itre nöj hnei Iehova hna apatren qëmekei angetre Isaraela, lo angatr a thapa la nöj.
10 Nge Iehova pala hi a ithanata koi Manase me nöje i nyidrë, ngo tha pi drenge kö angatr. 11 Iehova a ukune jë la itre tane isi ne la joxu ne Asuria troa isi me angatr. Nge hnei angetre Asuria hna jeli Manase hnei itre iahletr, me othi nyidrë hnei lue ceine kopa, nge angatr a xomi nyidrëti jë a tro Babulona. 12 Nge hnine la akötr, hnei Manase hna xëwe koi Iehova Akötresi nyidrë, me ipië catr qëmekene la Akötresi ne la itre qaaqaa i nyidrë. 13 Hnei Manase hna thithi koi Iehova, matre hna ketr la hni nyidrë hnene la xëwe i angeic. Hnei Akötresieti hna drenge la sipo i Manase me bëeke sai angeic a tro Ierusalema, me nue la mus koi angeic. Qane ju hi lai, Manase a trotrohnine hnyawa laka, Iehova la nyipi Akötresie.
14 Thupene lai, hnei Manase hna xup la ketre ihag atraqatr tröne la Traone i Dravita, ngöne la götrane kuë ne Gihona, hmekune la hnathup. Hna acil ej qa ngöne la Qëhnelö Ne La Itre Ie, nge kano jë hi uti hë Ofela. Ketre, hnei nyidrë hna acili tane isi ngöne la nöjei traon hna eköhagen e Iudra. 15 Nge nyidrëti a apatrene ju fe la itre haze trenyiwa, memine la idrola hnine la uma ne hmi Iehova, me nöjei ita ne huuj hnei nyidrëti hna xup ngöne la wetr ne la uma ne hmi Iehova, me e Ierusalema, me upe troa trije la itre ewekë cili tröne la traon. 16 Nge nyidrëti a kuca hnyawane jë la ita ne huuje i Iehova, me huujën e cili la itre huuj ne tingeting, me itre huuj ne ole. Thupene lai, hnei nyidrëti hna sipon kowe la angetre Iudra troa nyihlue i Iehova, Akötresi Isaraela. 17 Ngo ame pe, itre atre pala hi a tro fë huuj hune la itre hnë hmi gaa hmitrötr, ngo angatre hë a huuj koi Iehova Akötresi angatr.
18 Nge ame la mele i Manase, memine la thithi nyidrë kowe la Akötresi nyidrë, me itre trengewekë ne la itre ka qeje pu, itre ka tro fë maca i Iehova Akötresi Isaraela, hna fejan asë hnine la itusi ne la mele ne la itre joxu ne Isaraela. 19 Nge hna fejane fe hnine la itre itusi ne la itre ka qeje pu, la aqane sa la thithi nyidrë, me itre ngazo i nyidrë, me aqane tha mele nyipici i nyidrë, me itre götran hnei nyidrëti hna xup la itre hnë hmi gaa hmitrötr, me itre ipoto ka hmitrötr, me itre idrola, me nöjei ewekë hnei nyidrë hna kuca qëmekene la nyidrëti a ipië. 20 Ame hnei Manase hna meköl ngöne la mec me itre qaaqaa i nyidrë. Hna kelemi nyidrë ezine la hnalapa i nyidrë. Nge hna acili joxu Amona nekö i nyidrë, troa nyihna i nyidrë.
21 Traqa koi 22 lao macatre i Amona lo kola acili joxu nyidrë. Hnei nyidrëti hna musi koi lue macatre e Ierusalema. 22 Hnei Amona hna kuca la ngazo qëmeke i Iehova, tune lo aqane ujë i Manase keme i nyidrë. Amona a tro fë huuj me nyihluene la nöjei idrola hnei Manase keme i nyidrë hna kuca. 23 Ngo tha hnei Amona pe hna ipië qëmeke i Iehova, tune lo aqane ipië i Manase keme i nyidrë. Qa ngöne lai, tru catre kö la ngazo i Amona. 24 Ngöne la ketre drai, hnene la itre hlue i Amona hna thele troa humuthi nyidrë, matre angatr a humuthi nyidrëti pi hnine la hnalapa i nyidrë. 25 Ngo hnene la itre atrene la nöj hna humuthe la itre ka humuthi Amona joxu, me acili joxu Iosea nekö i nyidrë, troa nyihna i nyidrë.