Hnaaluene Tus i Samuela
11 Ngöne la kola xejë la macatre,* hmekune lo itre joxu a tro troa isi, hnei Dravita hna upi Ioaba, me itre tane isi i nyidrë, me itre soc ne Isaraela asë, troa lep apatrenyi angetre Amona. Angatr a tro ju troa cile xötreithi Raba, ngo lapa ju pe hi Dravita e Ierusalema.
2 Ngöne la ketre hej,* Dravita a mejë jë qa ngöne la ili, nge nyidrë a tro ju troa pane ngenu ngöne la hune uma. Nge qaa lai, öhne ju hi nyidrë la ketre föe a si, nge ka mingöminge catre la föe. 3 Ame hnei Dravita hna iupi troa pane hnyingë pengöne lai föe, nge atre ju hi nyidrë ka hape, Batheseba la ëjen, nekö i Eliama, nge föi Uria, atre Heth. 4 Thupene lai, Dravita a iupi jë troa thei Batheseba, nge angeic a lö jë koi Dravita, nge nyidroti a ce meköle ju. (Hna traqa lai ngöne lo ijine Batheseba a ahmitrötrë angeic.)* Nge Batheseba a bëeke hmaca jë kowe la hnalapa i angeic.
5 Nge upune ju hi Batheseba, matre angeic a iupi fë maca pi koi Dravita, me hape: “Upune hë ni.” 6 Ame hnei Dravita hna iupi fë maca koi Ioaba me hape: “Upi Uria jë koi ni, lo atre Heth.” Matre Ioaba a upi Uria jë kowe la joxu. 7 Nge ame ju hi la Uria a traqa, Dravita a hnyingë nuvel i Ioaba jë, me itre xa soc, me aqane trongene la isi. 8 Ame hnei Dravita hna qaja koi Uria ka hape: “Bëeke jë kowe la hnalapa i eö, nge pane mano* ju.” Haawe, Uria a tro ju qa ngöne la hnalapa i joxu, nge hetre ahnahna ne ikep* i angeic qaathei joxu. 9 Ngo hnei Uria pe hna meköle ngöne la hnë lö ne la hnalapa i joxu, nge ce angeic me itre xa soce i joxu. Tha bëeke kö angeic kowe la hnalapa i angeic. 10 Hnene la ketre atr hna thuemacanyi Dravita ka hape: “Tha lö kö Uria kowe la hnalapa i angeic.” Ame hnei Dravita hna hnyingë Uria ka hape: “Qea la hnei eö hna tro, hnauëne laka tha bëeke kö eö kowe la hnalapa i eö?” 11 Öni Uria jë hi: “Fene la itre itate la Pua, memine la itre trahmanyi ne Isaraela me Iudra. Nge Ioaba tixeng me itre soce i nyidrë a meköl ngöne la itre hlapa. Tha tro kö ni a lö kowe la hnalapang me xeni, me ij, me ce meköl memine la föeng! Qëmeke i nyipë, eni a sisiny, tha tro jë kö ni a kuca lai!”
12 Öni Dravita jë hi koi Uria: “Pane lapa ju kö e celë la drai ce, nge elany, tro ni a nue eö troa tro.” Haawe, Uria a lapa ju e Ierusalema la drai cili, memine la drai thupen. 13 Dravita a hë Uria jë troa ce xen, me ce iji me nyidrë, nge Dravita a traime i Uria jë uti hë la angeic a hnaitö. Nge Uria a tro ju troa meköl me itre hlue i joxu, ngo tha lö pi kö angeic kowe la hnalapa i angeic. 14 E hmakany, Dravita a cinyanyi tusi jë koi Ioaba, me upi Uria troa tro fë. 15 Ngöne lai tus, öni Dravita: “Xomi Uria jë troa tro pa ngöne la isi, hmekune lo götrane gaa isi catr, nge nue angeice pi e cili matre troa humuthi angeic.”
16 Hnei Ioaba hna goeëne hnyawa la traon, nge öhne ju hi angeic lo hna cil hnene la itre soc ka catr. Matre angeic a ami Uria ju hmeku i angatr. 17 Nge ame hë la kola tro hnei itre atr ne la traon troa isi me Ioaba, hna humuthe la itre xa soce i Dravita, nge Uria fe hi la ketre, lo atre Heth. 18 Ame hnei Ioaba hna upe la ketre atr koi Dravita, matre qaja la aqane trongene la isi. 19 Öni Ioaba kowe lai atr: “E ase jë eö qaja kowe la joxu la nöjei ewekë ka traqa, 20 ma tro jë nyidrëti a elëhni, nge tro nyidrëti a qaja koi eö ka hape: ‘Hnauëne la epuni a easenyi catr kowe la traon? Thatre kö epuni laka, tro la ithupëjia a pehna epun qa hune la ihag? 21 Drei la ka humuthi Abimelek nekö i Ierubeseth? Tha föe ne Thebeze kö? Hnei angeice hna kuiën qa koho hune la ihag la ketre ietë ne amudromudro qitr. Matre hnauëne la epuni a easenyi catr kowe la ihag?’ Haawe, maine tro la joxu a qaja lai koi eö, hape jë: ‘Meci hë Uria hlue i nyipë, lo atre Heth.’”
22 Hnene lai atre tro fë maca, hna tro ju koi Dravita, me qaja asë la hnei Ioaba hna upi angeic troa qaja. 23 Angeic a qaja ju koi Dravita ka hape: “Ka catre kö la itre ithupëjia, nge hnei angatre hna ut troa isi me eahun ngöne la itre hlapa. Ngo hne huni hna abëekë angatr uti hë la qëhnelö ne la traon. 24 Nge hnene la itre ka huji pehna hune la ihag hna pehna hun, nge hna meci la itre xa soce i nyipëti joxu, nge meci fe hë Uria hlue i nyipë, lo atre Heth.” 25 Matre öni Dravita kowe lai atre tro fë maca: “Qaja ju koi Ioaba ka hape: ‘The hace fë kö la ewekë ka traqa, ke ngöne la isi, taua a humuthi ketre maine ketre. Ngo catre pi pe epuni isi kowe la traon, nge ngaa angatre jë.’ Ngo ame eö atre tro fë maca, thuecatrei Ioaba jë.”
26 Matre ame hë la kola atre hnene la föi Uria laka, meci hë Uria, angeic a hnëmeci ju. 27 Nge ase jë hi hnëmec, Dravita a xomi angeice jë kowe la hnalapa i nyidrë, matre troa föi nyidrë. Nge e thupen, angeic a hnahone pi la ketre nekönatr trahmany. Ngo ka ngazo catre koi Iehova la aqane ujë i Dravita.