Rutha
1 Ame ngöne la ijin ne la itre atre amekötin,* hna traqa la ketre jiin atraqatr ngöne la nöj. Matre hnene la ketre trahmany hna tro qa Bethelema e Iudra, me mele trenyiwa ngöne la nöje* Moaba. Ce angeic me ifënekö i angeic, me lue nekö i nyidro trahmany. 2 Elimelek* la ëje ne lai trahmany, nge Naomi* la föi angeic. Nge ame la ëjene la lue nekö i angeic, ke Malona* me Kiliona.* Angetre Eferatha angatr, ketre traon ne Bethelema e Iudra. Ame hë la angatr a traqa e Moaba, ke lapa ju hi angatr e cili.
3 Thupene la ijine cili, hna meci hnei Elimelek, lo föi Naomi. Matre eahlo casi pe hi me lue nekö i eahlo. 4 Hnene pë hë la lue nekö trahmanyi hna xome la lue föe ne Moaba, Orepa me Rutha. Nge hnei angatr hna mel e cili koi 10 lao macatre. 5 Thupene lai, hna meci fe hnei Malona me Kiliona. Matre patre hë la föi Naomi me lue nekö i eahlo. 6 Ame hnei eahlo me lue tresi eahlo hna mekune troa tro qa Moaba, ke drenge hë eahlo laka, Iehova hmaca a mekune la nöje i nyidrë, me thue a* i angatr.
7 Nge hnei eahlo hna trotrije la götran hnei eahlo me lue tresi eahlo hna lapa, matre bëeke hmaca a tro Iudra. Ame hë e kuhu gojeny, 8 öni Naomi koi nyidro: “Lue bëeke jë kowe la hnalapa ne la lue thine i epon. Nge epi troa mama koi epon la ihnimi nyipici Iehova, tune la aqane nyipici i epon kowe lo lue föi epon ka mec, me koi ni. 9 Nge epi tro Iehova a hamë* föi epon me hnalapa i epon.” Naomi a dremi nyidroti ju, nge angatr a ce treije jë. 10 Ngo lue tresi eahlo pala hi a catre fë ka hape: “Waea, tro nyio a ce tro me eapo kowe la nöje i eapo.” 11 Ngo öni Naomi: “Bëeke jë lue neköng. Hnauëne la tro epon a xötrethenge ni? Tha ijijinge hmaca kö troa hnaho nekö trahmany nyine föi epon. 12 Bëeke jë pe lue neköng, ke qatre föe hë ni, nge tha ijijinge hmaca kö troa faipoipo. Nge maine tro ni a faipoipo me hnahone la lue nekö trahmany, 13 atreine kö epon itreqe uti hë la tro nyidroti a tru matre faipoipo memin? Nge tro kö epon a xelen la itre xa trahmany pi nyidro? Waea lue neköng. Akötre catre la hning pi epon, ke Iehova a cile koi ni.”*
14 Nge angatr a itreijenyi hmaca jë, nge Orepa a dreme ju la treetre i angeic me tro. Ngo lapa ju pe hi Rutha. 15 Matre öni Naomi jë hi: “Goeëne la trejine me eö, bëeke hë angeic kowe la nöje i angeic, me itre haze i angeic. Hane jë fe eö tro.”
16 Ngo öni Rutha: “The upi ni kö troa trotriji eapo, nge the sewe ni kö troa xötrethenge eapo. Ke ame la nöjei jë i eapo, ke jënge fe, nge ame la hnë meköl i eapo, hnë mekölenge fe. Nge nöjenge la nöje i eapo, nge Akötresing la Akötresi eapo. 17 Nge ame la götran tro eapo a mec, tro fe ni a hane meci e cili, nge tro fe a kelemi ni e cili. Matre epi tro Iehova a eji ni, e tha meci kö la ka troa aisa nyiso.”
18 Ame hë la Naomi a öhne la aqane catre fë Rutha troa xötrethenge eahlo, tha sewe angeice hmaca kö hnei eahlo. 19 Nge nyidroti a xötrëne hmaca jë la gojeny uti hë Bethelema. Matre ame ju hi la nyidroti a traqa, hnene la traon asë hna madri nyidro. Nge önine la itre föe: “A tha Naomi kö la?” 20 Sa jë hi Naomi ka hape: “The hë ni hmaca kö Naomi,* ngo Mara,* ke haitre hë la meleng hnei Akötresie.* 21 Ka tiqa hnyawa ni lo eni a tro, ngo hnei Iehova hna abëekë ni, nge pë hë ca eloing. Matre epuni a hë ni fë nemen ka hape, Naomi, nge hnei Iehova pe hna cile koi ni, nge hnei Akötresie* hna akötrë ni?”
22 Aqane bëeke Naomi hi lai qa ngöne la itre hlapa ne Moaba. Ce eahlo me Rutha, tresi eahlo, lo föe ne Moaba. Hnei nyidroti hna traqa e Bethelema, hmekune la ijine kola nyiqaane menuë bali.