Rutha
2 Hetre fami i Elimelek föi Naomi ka trene mani. Boaza la ëjen.
2 Öni Rutha qa Moaba koi Naomi ka hape: “Nue ni pi troa tro ngöne la itre hlapa, me hleme la itre munën hna nue hnei itre ka menuë hlapa. Tro ni a tro kowe la itre ka troa hnimi ni.” Matre öni Naomi: “Tro jë neköng.” 3 Angeic a tro ju kowe la ketre hlapa me nyiqaane hle munën. Nge ka loi hi, ke zi Boaza, fami i Elimelek. 4 E cili, traqa pi hi Boaza qa Bethelema, nge öni nyidrë kowe la itre ka menuë hlapa: “Epi tro Iehova a ce me epun.” Nge sa jë hi angatre ka hape: “Epi tro Iehova a amanathithi nyipë.”
5 Öni Boaza kowe la nekö trahmany lo tane huliwa ka hape: “Fami drei la föe celë?” 6 Sa jë hi lai tan ka hape: “Föe ne Moaba lai, hnei angeic hna ce bëeke me Naomi qa ngöne la itre hlapa ne Moaba. 7 Hnei angeic hna sipo ni ka hape, ‘Ka loi kö tro ni a hleme la itre munën hna sa* hnei itre ka menuë hlapa?’ Nge qane e kula lo hmakany uti hë enehila, angeic pala hi a huliwa. Angeice petre hi la a mano fene la ihmelekap.”
8 Thupene lai, öni Boaza koi Rutha ka hape: “Dreng neköng, the hle munëne kö ngöne la ketre hlapa. Nge the tro kö kowe la ketre götran. Lapa hnyawa ju memine la itre nekö jajiny ka huliwa koi ni. 9 Goeëne hnyawa ju la götran hnei angatr hna menuën, nge ce tro jë me angatr. Ase hë ni qaja kowe la itre nekö trahmany ka huliwa ka hape, tha tro kö a qenahmo eö. Nge e pi iji hë eö, tro jë kowe la itre trengene tim, nge iji jë la tim hna jöe hnei ha nekö trahmany.”
10 Ame hnei Rutha hna sa iwatingöneca, me thil me hape: “Hnauëne la nyipëti a wangatrunyi ni? Nge hnauëne laka, goeë ni jë hnei nyipë nge trenyiwa ni?” 11 Sa jë hi Boaza ka hape: “Anyimua drenge hë ni la aqane thupën eö la treetre i eö, thupene lo kola meci la föi ö, me aqane nue eö la keme me thine i eö, me zi eö, troa tro kowe la nöje trenyiwa. 12 Epi tro Iehova a amanathithin la huliwa i eö. Nge epi troa pexeje la thupei eö qaathei Iehova, Akötresi Isaraela, lo hnei eö hna zae then.” 13 Matre öni Rutha: “Epi tro nyipëti a wangaloinyi ni Joxung, ke hnei nyipëti hna akeukawanyi* ni, me ithanata amenyiken kowe la hlue i nyipë. Ngo tha atre i nyipëti pena kö ni.”
14 Ame hë la hawa ne xen, öni Boaza koi Rutha: “Trohemi ma hane xeni falawa, me trapin ngöne vinega.” Matre angeic a lapa ju ezine la itre ka menuë hlapa. Nge Boaza a liine pi koi angeic la itre wene bali hna dreudreuth. Angeic a xeni jë, nge munë ju pe kö. 15 Nge ame hë la angeic a mejë troa hle munën ngöne la hlapa, öni Boaza koi itre ka huliwa koi angeic: “Nue angeic pi troa hleme fe la itre hna sa,* nge the qanangazo angeice pi kö. 16 Nge mekune kö troa nue la itre xa bali hnei epun hna ea, matre tro angeic a hlem. Nge the sewe angeice pi kö troa hle bali.”
17 Matre hnei Rutha hna huliwa uti hë e heji lapa. Nge ame hë la angeic a lepelepe bali, ca efa* la hna menuën. 18 Angeic a hleme jë, me tro fë kowe la treetre i angeic. Nge angeic a xome pi lo munëne xen, me liine koi Naomi.
19 Öni Naomi jë hi: “Qa i eö hna hle bali ekaa? Hnei eö hna huliwa ekaa? Epi manathithe la atre hnimi eö.” Rutha a qaja jë kowe la treetre i angeic, la atre hnei angeic hna huliwa then: “Ame la ëjene lai atr hnenge hna huliwa then, ke Boaza.” 20 Matre öni Naomi kowe la tresi eahlo: “Loi e tro Iehova a hane amanathithi nyidrë. Tha patre kö la ihnimi nyipici i nyidrë kowe la itre ka mel me ka mec.” Öni Naomi hmaca: “Ame lai atre cili, tre ketre atrene la fami së. Nge ketre atre itö hnan*.” 21 Nge öni Rutha jë hi: “Öni nyidrëti fe koi ni ka hape, ‘lapa hnyawa ju me itre atreng, uti hë la angatre a ase menuëne la itre hlapang.’” 22 Sa jë hi Naomi kowe la tresi eahlo ka hape: “Ka loi kö lai neköng e tro eö a ce tro me itre jajinyi ka huliwa koi nyidrë, wanga qenahmo eö jë ngöne la ketre hlapa.”
23 Matre hnei Rutha hna xötrethenge la itre jajiny ka huliwa koi Boaza, me hle munën, uti hë fenesi la ijine menuë bali me qitr. Nge hnei angeice pala hi hna ce mel memine la treetre i angeic.