Rutha
4 Ame hnei Boaza hna elë kowe la qëhnelö ne la traon, me lapa e cili. Nge fetra pi hi lo atre itö hnan hnei Boaza hna qaja. Öni Boaza jë hi: “Eö, pane trohemi, nge lapa ju e celë.” Angeic a traqa pi me lapa. 2 Boaza a hëne jë la 10 lao qatr ne la nöj me hape, “Pane lapa ju e celë.” Matre angatr a lapa ju.
3 Nge öni Boaza jë hi kowe la ka itö hnan: “Bëeke hë Naomi qa Moaba, nge angeic a pi salemëne la hlapa ne la trejin me nyiso, Elimelek. 4 Matre öning, ka loi e tro ni a pane thuemacanyi eö, me hape: ‘Itöne jë qëmekene la nöj me itre qatr ne la nöj. Maine eö a pi itön, ke itöne jë. Ngo maine xele kö eö, qaja jë koi ni. Ke eö la hna pane aijijën troa itö hnan, nge pinge pë hë.’” Matre önine lai atr: “Ka loi, nga tro hë ni a itön.” 5 Ngo canga öni Boaza jë hi: “E traqa jë eö itöne la hlapa i Naomi, mekune fe kö itön qaathei Rutha, lo atre Moaba, föene lo ka mec. Matre tro pala kö a hetre ëjene lai ka mec ngöne la hlapa cili.” 6 Önine jë hi la atre itö hnan ka hape: “Waea, nga tha ijijinge kö troa itön, wanga luzi pi la edröng. Eni a nue la götrane qange koi eö, itöne jë eö. Tha ijijinge kö troa itö hnan.”
7 Ame ekö e Isaraela, hane hi la aqane kuca e troa itö hnan, maine tro pena a nue la götrane qa cili: qa i ketre troa uni butr me hamë ketre. Aqane isisinyikeu* lai e Isaraela. 8 Matre ame lo kola qaja hnene la atre itö hnan koi Boaza ka hape: “Itöne jë eö,” hnei angeic hna uni butr. 9 Matre öni Boaza jë hi kowe la itre qatr me kowe la nöj ka hape: “Öhne hi epun enehila laka, eni a itön qaathei Naomi la nöjei ewekë i Elimelek, me nöjei ewekë i Malona me Kiliona. 10 Eni fe a xomi Rutha atre Moaba, lo föi Malona, matre tro pala kö a hetre ëjene lai ka mec ngöne la zi angeic, me thene la itre matra i angeic. Nge matre tha tro kö a thëthëhmine la ëje i angeic hnei itre trejin me angeic, me itre atrene la traone i angeic. Hane hi la kola anyipicin qëmeke i epun.”
11 Önine jë hi la itre ka cil ngöne la qëhnelö ne la traon, me itre qatr ne la nöj ka hape: “Eahuni a anyipicin! Epi tro Iehova a aijijëne la föe ka lö kowe la hnalapa i eö, troa tui Rakela me Lea, lue thine i Isaraela. Epi troa tro loi la mele i eö e Eferatha, nge loi e tro eö a hlemu* loi e Bethelema. 12 Nge epi tro la itre nekönatr hnei Iehova hna troa hamë eö jëne la föe celë, a tune la fami i Farez, lo hnei Tamara hna ce hnahon me Iudra.”
13 Ame hnei Boaza hna xomi Rutha troa föi nyidrë, nge nyidroti a ce meköle ju. Ame hnei Iehova hna amanathithi Rutha, ene pe, upune pi hi Rutha, nge angeic a hnahone pi la ketre nekönatr trahmany. 14 Matre önine la itre föe koi Naomi ka hape: “Epi atrunyi Iehova jë, ke enehila, hnei nyidrëti hna thue atre itö hnan koi eö. Epi troa qaja ngöne la nöje Isaraela asë la ëje i nyidrë! 15 Mele* hë* eö hnene la nekönatr.* Nge tro nyën elany a thupë eö e qatre föe hë eö, ke hnene la tresi eö hna hnaho nyën. Föe lai ka hnimi eö, nge ka sisitria koi eö hune la 7 lao nekönatr trahmany.” 16 Ame hnei Naomi hna xepe* la nekönatr, me thupë* nyën. 17 Matre hnene la itre föe ka lapa ezin hna ati ëje i nyën. Öni angatr: “Hna hnahon la nekönatr trahmany koi Naomi.” Nge angatr a ati ëje i nyën, Obeda. Angeice hi lo keme Iese, lo keme i Dravita.
18 Hane hi la itre xötre matra i Farez: Farez la keme i Ezerona; 19 Ezerona la keme i Ram, nge Ram la keme i Aminadaba; 20 Aminadaba la keme i Nasona, nge Nasona la keme i Salemona; 21 Salemona la keme i Boaza, nge Boaza la keme i Obeda; 22 Obeda la keme i Iese, nge Iese la keme i Dravita.