Hnaaluene Tusi Itre Joxu
11 Nge ame hë la Athalia, thine i Ahazia a atre laka, meci hë la nekö i eahlo, hnei eahlo hna amekötine troa humuth asë la nöjei atr ka troa të hune la theron. 2 Ngo hnei Ioseba, nekö i Iorama joxu, xa i Ahazia, hna xome juetrë Ioasa nekö i Ahazia. Nge ce nyëne me itre xa nekö i joxu trahmany hna troa humuth. Hnei Ioseba hna juetrë nyën memine la föe ka thupë nyën hnine la ketre hnahag, matre tha tro kö Athalia a öhnyi nyën. Celë hi matre, mele ju kö Ioasa. 3 Nge ame Ioasa memine la ka thupë nyën, hnei nyidroti hna zae hnine la uma ne hmi Iehova, koi 6 lao macatre, ngöne la ijine Athalia a musi kowe la nöj.
4 Ngo ame ngöne la hna 7 ne macatre, hnei Iehoiada hna up troa hëne la itre tane la ala 100 ka thupëne la joxu, me itre ka thupëne la uma i joxu. Hnei Iehoiada hna hë angatre asë, matre tro angatr a itronyi hnine la uma ne hmi Iehova. Nge angeic a qaja jë koi angatr troa sisiny hnine la uma ne hmi Iehova, me nyipici kowe la hna sisiny. Thupene lai, hnei Iehoiada hna amamane la nekö i joxu koi angatr. 5 Nge angeic a amekötine jë ka hape: “Hane hi la nyine tro epuni a kuca: Ame thene la itre atre thup ka troa huliwa e Sabath, tro ha xome la ketre hnepe sin matre thupëne hnyawa la uma i joxu. 6 Nge tro la ketre hnepe sin a cile ngöne la Hnë Lö hna hape, Trepen. Nge tro la hnepe sine munën, a cile ngöne la qëhnelö hutrö ne la itre ka thupëne la uma i joxu. Nge tro epuni a isa atrën troa thupëne la uma ne hmi, ase jë hi ketre matre ketre. 7 Nge ame fe lo lue xa hnepe sin ka mano la drai sabath, ke tro angatr a alamekëne la uma ne hmi Iehova, matre thupëne la joxu. 8 Nge tro epun a cile kanothe la joxu, me cile fë jia ne isi. Tro epun a humuth la itre ka thele troa lö hnine la itre xötre sooc. Ce tro jë memine la joxu ngöne la nöjei jë* i nyidrë.”
9 Ame hnene la itre tane la ala 100 hna kuca asë la hna amekötin hnei Iehoiada atre huuj. Nge hnei angatr hna isa xome la itre atre i angatr, ene la itre ka huliwa la drai Sabath, me itre ka mano la drai cili. Angatr a isa cile ju qëmekei Iehoiada atre huuj. 10 Matre, hnene la atre huuj hna isa hamëne kowe la itre tane la ala 100 la itre jo, me itre ipetr ka raon i Dravita joxu, lo ka lapa hnine la uma i Iehova. 11 Nge hnene la itre ka thup hna isa cile fë jia ne isi. Hnei angatr hna isa cil qaane la götrane maca ne la uma ne hmi, uti hë la götrane mi, nge ezine la ita ne huuj, me ezine la uma ne hmi xötreithe la joxu. 12 Thupene lai, hnei Iehoiada hna lö fë la neköne la joxu, me atë hune la he i nyën la korona, memine la Nyine Anyipicin.* Matre angatr a sië nyëne ju, me acili nyën troa joxu. Ame hnei angatr hna xexe, me suene ka hape: “Epi manathithe la joxu!”
13 Matre ame hë la Athalia a dreng la kola nyinyape la itre atr, eahlo a canga tro ju kowe la ka ala nyimu ngöne la uma ne hmi Iehova. 14 Nge öhne ju hi eahlo e cili la joxu, kola cile ezine la ipoto, thenge lo hna majemin. Nge kola ce cil memine la joxu hnene la itre tan, me itre ka ufi trutru. Nge itre atrene la nöj a madrine me ufi trutru. Ame hnei Athalia hna tha zezene la iheetr i eahlo, me sue ka hape: “Ka pi joxu! Ka pi joxu!” 15 Matre, hnei Iehoiada atre huuj, hna amekötin kowe la tane la ala 100, itre ka elemekene la trongene isi ka hape: “Xome pi la föe celë qa la. Nge maine hetre ka xötrethenge eahlo, humuthe pi hnei taua!” Eje hi, hnei angeice lo hna qaja ka hape, tha tro kö a humuthi eahlo hnine la uma ne hmi Iehova. 16 Matre, angatr a xolouthi eahlo ju, me tro sai eahlo kowe la uma i joxu, ngöne la hnë lö ne la itre hos. Nge angatr a humuthi eahlo pi.
17 Thupene lai, hnei Iehova hna jëne Iehoiada, matre tro la joxu memine la nöj a isisinyikeu me nyidrë laka, tro pala hi angatr a nöje i Iehova. Nge hnene fe la joxu hna isisinyikeu memine la nöj. 18 Ame hnene la itre atrene la nöj hna tro kowe la uma ne hmi Baala, me thëtrije la itre ita ne huuje i Baala, me apatrene trije la itre idrola i Baala. Angatr a humuthi Mathana jë, lo atre huuje i Baala qëmekene la itre ita ne huuj.
Ase jë hi, hnene la atre huuj hna acile la itre atre thup ngöne la uma ne hmi Iehova. 19 Hnei angeic hna ce tro me itre tane la ala 100, itre ka thup thei joxu, me itre ka thup ngöne la uma i joxu, me itre atrene la nöj. Nge hnei angatr hna ce tro memine la joxu, qaane la uma ne hmi Iehova uti hë la uma i joxu, me trongëne la gojenyi kowe la qëhnelö ne la itre ka thupëne la uma i joxu. Nge e cili, hnei Ioasa hna lapane la theron ne la itre joxu. 20 Ame hnene la itre atrene la nöj asë hna madrin, nge tha gomegome hë la nöj, ke ase hë humuthi* Athalia ezine la uma i joxu.
21 Matre traqa koi 7 lao macatre i Ioasa lo kola acili nyën troa joxu.