Hnaaluene Tus i Aqane Lapa Itre Joxu
24 Traqa koi 7 lao macatre i Ioasa lo kola acili joxu nyidrë. Hnei nyidrëti hna mus e Ierusalema koi 40 lao macatre. Zibia la ëjene la thine i nyidrë, nge föe ne Bere-seba eahlo. 2 Hnei Ioasa hna kuca la loi qëmeke i Iehova, ngöne la ijine mele pala kö Iehoiada, lo atre huuj. 3 Hnei Iehoiada hna iëne koi Ioasa la lue föe, nge hnei nyidro hna hnaho itre nekö trahmany, me itre nekö jajiny.
4 Thupene lai, hnei Ioasa hna pi ahnyipixene la uma ne hmi Iehova. 5 Matre nyidrëti a hën asë jë la itre atre huuj, me angetre Levi me hape: “Tro jë kowe la itre traon ne Iudra, nge hleme jë la mani hna ithingën e Isaraela asë, matre troa kuca hnyawane la uma* ne la Akötresi epun e nöjei macatre. Nge qa i epun troa canga kuca.” Ngo tha canga kuca kö angetre Levi. 6 Ame hnene la joxu hna hë Iehoiada, tane la itre atre huuj me hape: “Hnauëne laka, tha upi angetre Levi kö hnei ö troa traqa fë qa Iudra me Ierusalema, lo hna ithingën ka hmitrötr, lo hna amekötin hnei Mose hlue i Iehova? Lo mani hna athip kowe la icasikeu ne Isaraela thatraqane la itat ne anyipicin? 7 Ke hnene la itre nekö i Athalia, lo föe ka ngazo thiina, hna lö catr hnine la uma ne la nyipi Akötresie, nge hnei angatr hna xome la nöjei ewekë ka hmitrötr ne la uma i Iehova, kowe la hmi ne la itre Baala.” 8 Thupene lai, hnene la joxu hna amekötin troa cane la neköi pua, me amë tröne la qëhnelö ne la uma ne hmi Iehova. 9 Ase jë hi, hna qaja trongën e Iudra me Ierusalema asë laka, troa traqa fë koi Iehova la hna ithingën ka hmitrötr, lo hna amekötin hnei Mose hlue ne la nyipi Akötresie, koi Isaraela ngöne la hnapapa. 10 Matre hnene la itre he ne nöj, memine la nöj asë hna madrin me isa traqa fë mani, me amë hnine la neköi pua uti hë la ej a tiqa.*
11 Matre ame hë la angetre Levi a öhne laka, tiqa catre hnei mani, hnene la sekreter i joxu, memine la qeneqaja ne la tane la itre atre huuj, hna traqa troa hleme la mani thatraqane la joxu, me amë hmaca la neköi pua ngöne la göhnen. 12 Nge hnene pë hë la joxu me Iehoiada hna xome la mani, me hamëne kowe la itre tane huliwa hnine la uma ne hmi Iehova. Nge hnei angatr hna nyithupene hmaca la itre ka thupe etë, me nöjei atr ka atreine kuca la nöjei pengöne huliwa, troa ahnyipixene la uma ne hmi Iehova. Nge hna nyithupene fe la itre ka huliwa fao me kopa, matre ahnyipixene la uma i Iehova. 13 Qa ngöne lai, hnene la itre tane huliwa, hna upe troa xejë la huliwa. Matre angatre hi la itre ka thupën troa tro loi la huliwa. Hnei angatr hna kuca hnyawan me acatren la uma ne hmi ne la nyipi Akötresie. 14 Matre ame ju hi la angatr a fenes, hnei angatr hna bëeke fë la munëne mani koi joxu me koi Iehoiada. Hna huliwane pë hë la mani cili, troa xupi ewekë thatraqane la uma ne hmi Iehova: itre ewekë nyine huliwan hnine la uma ne hmi, me itre ewekë nyine kuca la itre huuj, me itre ver, me itre xa ewekë gool me sileva. Nge hna majemine tro fë huuj ne dreuth asë hnine la uma ne hmi Iehova, lo mele pala kö Iehoiada.
15 Qatre* catre hë Iehoiada, nge angeic a meci ju. Traqa koi 130 lao macatre i angeic lo angeic a mec. 16 Hna kelemi angeic memine la itre joxu ngöne la Traon i Dravita, ke hnei angeic hna kuca la loi e Isaraela, kowe la nyipi Akötresie memine la uma ne hmi i nyidrë.
17 Thupene la kola mec hnei Iehoiada, hnene la itre he ne nöj hna lö koi joxu me sa iwatingöneca. Nge hnene la joxu hna kei thenge la mekuna i angatr. 18 Angatr a nuetrije pi la uma ne hmi Iehova, Akötresi ne la itre qaaqaa i angatr, nge angatr a nyihluene jë la itre ipoto ka hmitrötr me itre idrola. Celë hi matre, elëhni jë hi Akötresie koi Iudra me Ierusalema, pine la itre ngazo i angatr. 19 Nge Iehova pala hi a upe koi angatr la itre perofeta, matre troa abëekë angatr koi nyidrë. Nge itre perofeta a hmekë* angatr, ngo xele pala hi angatr ma dreng.
20 Ame hna uti* la uati hmitrötr i Akötresie koi Zakaria, nekö i Iehoiada atre huuj, matre angeic a cile jë ngöne la ketre gaa draië, me hape kowe la nöj: “Hane hi la hna qaja hnene la nyipi Akötresie, ‘Epuni a ena fë nemene la itre hna amekötin hnei Iehova? Ka gufa la itre huliwa i epun! ke hnei epuni hna nuetriji Iehova, nge tro fe nyidrë a nuetriji epun.’” 21 Ngo hnei angatr hna thele troa humuthi angeic, me tranyi angeic hnei etë hnine la götrane gaa pë ihakun ne la uma ne hmi Iehova, thenge lo hna amekötin hnei joxu. 22 Qa ngöne lai, thëthëhmine hë Ioasa la ihnimi nyipici Iehoiada keme i Zakaria. Hnei Ioasa hna humuthe la nekö i Iehoiada, matre öni Zakaria qëmeken tro angeic a mec: “Epi tro Iehova a ameköti ö, me të koi ö.”
23 Ngöne la kola xejë la macatre, hnene la trongene isi i angetre Suria hna isi memine la baselaia i Ioasa, me lö e Iudra me Ierusalema. Matre hnene la angetre Suria hna humuthe la nöjei he ne nöj, me iupi fë la itre mo asë kowe la joxu ne Damaseko. 24 Ngo xalaithe hi la itre sooc i angetre Suria, lo angatr a lö hnine la nöj, ke hnei Iehova hna xatua angatr troa ngaane la trongene isi ka tru. Hna traqa tun, ke hnene la nöje Iudra hna nuetriji Iehova, Akötresi ne la itre qaaqaa i angatr. Celë hi aqane eatrën angatr* lo hna eji Ioasa. 25 Matre ame lo angatr a mejë qa lai, (ke angatr a nue Ioasa a ka eatre* hnyawa) hnene la itre hlue i Ioasa hna thele troa humuthi nyidrë, ke hnei nyidrë hna anenine la madra ne la itre* nekö i Iehoiada atre huuj. Hnei angatr hna humuthi nyidrë hune la ili i nyidrë, nge celë hi aqane meci nyidrë. Ame hna kelemi nyidrë ngöne la Traon i Dravita, ngo tha ngöne la itre hua ne la itre joxu.
26 Hane hi la itre ëjene la itre ka humuthi nyidrë: Zabad nekö i Simeatha föe ne Amona, me Iehozabada nekö i Simerith föe ne Moaba. 27 Nge ame la mele ne la itre nekö i Ioasa, me nöjei trenge ithanata ne iameköti hna qaja koi nyidrë, me aqane ahnyipixene* la uma ne hmi ne la nyipi Akötresie, hna fejan asë hnine la itre hna cinyihan,* ngöne la Itusi Ne La Itre Joxu. Ame hna acili joxu Amazia nekö i nyidrë, troa nyihna i nyidrë.