Ieremia
38 Ngo drenge hi Sefana nekö i Matana, me Gedalia nekö i Pasur, me Iukala nekö i Selemia, me Pasur nekö i Malekia, la Ieremia a qaja kowe la nöj asë, ka hape: 2 “Hane hi la hna qaja hnei Iehova: ‘Ame la atr ka lapa ngöne la traone ce, ke tro angeic a meci hnei isi,* me jiin, me meci ka ixötrekeu. Ngo ame la atr ka tro koi angetre Kaledaia, ke tro angeic a mel; edrö* i angeic pë hë la mele i angeic.’ 3 Hane hi la hna qaja hnei Iehova: ‘Thatreine kö la traone celë troa cile kowe la trongene isi ne la joxu ne Babulona: tro kö angeic a thapa la traon.’”
4 Ame hnene la itre nekö i joxu hna qaja kowe la joxu, ka hape: “Humuthi angeice pi, ke hnene la itre trengewekë i angeic hna akucakucane* la itre soc ka lapa ngöne la traon memine la nöj. Eje hi, tha angeice kö a thele tro la nöj a tingeting, ngo tro pe a hnëjin.” 5 Matre öni Zedekia joxu jë hi: “Nga ka loi hö! Kuca jë hë la hnei epuni hna ajan koi angeic, ke thatreine kö la joxu troa sewe epun.”
6 Ame hnei angatr hna xomi Ieremia a tro kowe la kur ne la Itre Ka Thup, me kuië angeic ngöne la sima i Maleka neköne la joxu.* Hnei angatr hna autinyi Ieremia hnei eno. Nge pëhë tim ngöne la hnaop ngo trëtre pe hi, matre Ieremia ha nyiqaane lö hnine la trëtr.
7 Ame hnei Ebede-Melek, ketre eunuka* qa Aithiope ka huliwa ngöne la hnalapa i joxu hna drenge ka hape, ase hë angatr kuië Ieremia hnine la sima. Nge ame joxu, ke nyidrëti a lapa ngöne la qëhnelö i Beniamina. 8 Matre hnei Ebede-Melek hna tro qa ngöne la uma i joxu troa qaja koi nyidrë ka hape: 9 “Joxu fe, ka ngazo la hnei angatr hna kuca koi Ieremia perofeta! Hnei angatr hna kuië angeic hnine la sima, nge tro hë angeice lai a mec hnei mecijiin, ke pëhë falawa ngöne la traon.”
10 Ame hnei joxu hna upi Ebede-Melek qa Aithiope, ka hape: “Hëne jë la 30 lao trahmanyi qa ce, nge tro jë a canga aelë Ieremia perofeta qa kuhu hnine la sima, wanga meci pi angeic.” 11 Ame hnei Ebede-Melek hna ce tro memine la itre trahmanyi kowe la uma i joxu, ngöne la hnahag fene la götran hnë ami manie. Angatr a xome pi e cili la itre sine mano me itre iheetre ka zezeny, me autin koi Ieremia jëne eno. 12 Nge öni Ebede-Melek qa Aithiope koi Ieremia: “Pane amë ju la itre sine mano me iheetre ka zezenyi memine la itre eno fene la lue hnapinyi ö.” Nge celë hi hna kuca hnei Ieremia. 13 Thupene lai, hnei angatr hna aelë Ieremia qa kuhu jëne la itre eno. Matre Ieremia a lapa ju ngöne la kur ne la Itre Ka Thup.
14 Ame hnei Zedekia joxu hna iup troa traqa sai Ieremia perofeta kowe la hnaakönine qëhnelö hnine la uma ne hmi i Iehova. Öni joxu jë hi koi Ieremia: “Tro ni a hnyinge koi ö, nge the juetrëne kö la ketre ewekë.” 15 Matre öni Ieremia jë hi: “Maine tro ni a sa, tro hë nyipëti lai a humuthi ni. Nge maine tro ni a hamë eamo, tha tro jë kö nyipëti lai a dreng.” 16 Celë hi matre, hnei Zedekia joxu hna sisinyi juetrë koi Ieremia me hape: “Qëmekei Iehova Akötresieti ka mel nge atre xupi nyiso, tha tro jë kö ni a humuthi ö, nge tha tro kö ni a nue eö kowe la ime ne la itre ka thele troa humuthi ö.”
17 Ame hnei Ieremia hna sa ka hape: “Hane hi la hna qaja hnei Iehova Akötresie ne la itre trongene isi e hnengödrai, Akötresi Isaraela: ‘Maine tro nyipëti a nue nyipë kowe la itre nekö i joxu ne Babulona, tro hë nyipëti a mel. Tha tro kö a dreuthetrije la traone ce, nge tro hë nyipë me fami i nyipëti a mel. 18 Ngo maine tha tro kö nyipëti a nue nyipë kowe la itre nekö i joxu ne Babulona, tro la traone celë a kei kowe la ime ne la angetre Kaledaia, nge tro angatr a dreuthetrij ej. Nge pëkö jë ne kötre i nyipë.’”
19 Öni Zedekia joxu jë hi koi Ieremia: “Xounge fe la angetre Iudra ka kötr kowe la angetre Kaledaia. Ke maine troa nue ni koi angatr, tro hë angatre lai a axösisi ni.” 20 Ngo sa jë hi Ieremia ka hape: “Tha tro kö a nue nyipëti koi angatr. Haawe, eni a sipo nyipë, drei Iehova ju: kuca jë la hnenge hna qaja. Tha tro kö a traqa la ketre ewekë koi nyipë, nge tro hë nyipëti a mel. 21 Ngo e xele nyipëti ma nue nyipë koi angatr, tro ha traqa koi nyipëti la nöjei ewekë hna amamane koi ni hnei Iehova: 22 Dreng! Ame asë hi la itre föe ka lapa pe ngöne la uma ne la joxu ne Iudra, ke kolo ha tro sai angatr kowe la itre nekö i joxu ne Babulona, nge öni angatr:
‘Ase hë iaö eö me ngaa eö hnene lo itre atr hnei ö hna mejiune kow.*
Hnei angatr hna kuca matre lö jë la waca i ö hnine la trëtr.
Nge enehila, angatre ha kötre bëek.’
23 Kola kötre fë la itre föi nyipë me itre nekö i nyipë trahmanyi kowe la angetre Kaledaia. Thatreine kö nyipë troa kötren la angetre Kaledaia. Tro ha xolouthi nyipë hnene la joxu ne Babulona, nge zöi nyipë e troa dreuthetrij la traone ce.”
24 Ame hnei Zedekia hna qaja koi Ieremia ka hape: “The qaja pi kö kowe la ketre atr, wanga meci pi ö. 25 Ngo maine tro la itre nekö i joxu a dreng laka, hnei nyiso hna ce ithanata, me hnying ka hape: ‘Hnei ö hna qeje nemene koi joxu. Qaja asë jë koi hun matre tro eö a mel. Öni joxu ka hape u?’ 26 Tro hë eö a sa ka hape: ‘Hnenge hna sipone kowe la joxu matre tha tro kö a bëeke sai ni kowe la uma i Ionathana, wanga tro ni a meci e cili.’”
27 Ame hë e thupen, hnene la itre nekö i joxu hna traqa troa hnyinge koi Ieremia. Nge hnei Ieremia hna sa koi angatr thenge la hna upi angeic hnei joxu. Matre pëhë nyine tro angatr a qaja, ke pëkö ka atre la ithanata i nyidro. 28 Nge hnei Ieremia hna lapa ngöne la kur ne la Itre Ka Thup uti hë la kola thapa la traon e Ierusalema. Nge angeice pala hi e cili ngöne la kola thapa la traon.