Ieremia
39 Ame hë la kola 9 lao macatre ne musi Zedekia joxu ne Iudra, ngöne la hna 10 ne treu, hnei Nebukaneza* joxu ne Babulona memine la trongene isi i angeic hna traqa troa thepe Ierusalema.
2 Nge ngöne la hna 11 ne macatre ne musi Zedekia, ngöne la hna 9 ne drai ne la hna 4 ne treu, hnei angatr hna thë la ihag ne la traon. 3 Ame hnene la itre nekö i joxu ne Babulona hna lö hnine la traon, me lapa ngöne la qëhnelö e Nyipin. Kola lapa e cili hnei Neregale-Sareza lo samegara, me Nebo-Saresekim lo rabesarisa,* me Neregale-Sareza lo rabemag,* memine la itre xaa nekö i joxu ne Babulona.
4 Ame la Zedekia joxu ne Iudra me itre soc asë a öhnyi angatr, ke hnei angatre hna kötr e jidr: hnei angatr hna kötr qa ngöne la qëhnelö nyipine la lue ngöne uma, me thupa la zardë i joxu, matre tro qa ngöne la traon. Thupene lai, hnei angatre hna kötr a tro Araba. 5 Ngo hnene la trongene isi i angetre Kaledaia hna weji angatr, me ee Zedekia ngöne la hnapapa xötreithi Ieriko. Hnei angatr hna othi angeic me tro sai angeic koi Nebukaneza* joxu ne Babulona e Ribela, ngöne la nöje Hamath. E cili, hnene la joxu hna ameköti angeic. 6 Hnene la joxu ne Babulona hna humuth la itre nekö i Zedekia qëmekene la keme i angatr e Ribela. Nge hnene fe la joxu ne Babulona hna humuth la itre he ne nöj ne Iudra. 7 Thupene lai, hnei nyidrëti hna atimekë Zedekia, me ceinë angeic hnei ceine kopa, me xomi angeic a tro Babulona.
8 Nge hnene la angetre Kaledaia hna dreuthetrije la uma i joxu, me itre uma ne la nöj, me thëtrije la itre ihage ne Ierusalema. 9 Nge hnei Nebuzaradana, lo tane la itre ka thupë joxu, hna kötre fë a tro Babulona la itre atr ka lapa pe ngöne la traon, memine lo itre soc ka kötr koi nyidrë, me itre xane ju kö.
10 Ngo hnei Nebuzaradana, lo tane la itre ka thupë joxu, hna nue pe kö la itre atr ka pë ewekë, lo itre ka pë hnyawa ca mo ngöne la nöje Iudra. Angeic a hamë angatre ju la itre vin me itre hlapa nyine eën.*
11 Ame pe, hnei Nebukaneza* joxu ne Babulona hna ahnithi Ieremia koi Nebuzaradana, tane la itre ka thupë joxu, me hape: 12 “Thei angeice jë, nge wai angeice kö. The akötrë angeice kö, nge hamë angeice pi la hnei angeic hna sipon.”
13 Ame hnei Nebuzaradana tane la itre ka thupë joxu, me Nebusazepana lo rabesarisa,* me Neregale-Sareza lo rabemag,* memine la nöjei atr ka tru ka huliwa kowe la joxu ne Babulona hna upe la itre trahmany, 14 troa xomi Ieremia qa ngöne la kur ne la Itre Ka Thup. Angatr a ahnithi angeice jë koi Gedalia nekö i Ahikama, lo nekö i Safana, nge Gedalia a tro sai angeice jë kowe la uma i nyidrë. Celë hi matre, hnei angeic hna mel nyipine la nöj.
15 Ame lo Ieremia pala kö ngöne la kur ne la Itre Ka Thup, hnei Iehova hna ithanata koi angeic, me hape: 16 “Tro jë qaja koi Ebede-Melek qa Aithiope ka hape: ‘Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Tro ni a eatrëne la hnenge hna qaja göne la traone ce: tro ha traqa la akötr ngo tha loi kö. Nge ngöne la drai cili, tro kö eö lai a öhn.”’
17 “‘Ngo tro kö ni a amele eö ngöne la drai cili,’ öni Iehova, ‘nge tha tro kö a nue eö kowe la itre atr hnei ö hna xouen.’
18 “‘Ke tro ni a thupë eö qa ngöne la iakötrë, the luelue kö, tha tro kö a humuthi ö hnei taua. Pine eö lapaune koi ni, edrö* i ö pë hë la mele i ö,’ öni Iehova.”