Daniela

3 Hnei Nebukaneza joxu hna xupi hnasaatr gool ka 60 kubit* la edraiën, nge 6 kubit* la eisaisan. Nge hnei nyidrë hna amë la hnasaatr ngöne la hnapapa e Dura, ngöne la provës ne Babulona. 2 Ame hnei Nebukaneza joxu hna hëne la itre tane provës,* me itre atr ka tru, me itre gavena, me itre atresi, me itre ka thupë mani, me itre ka iameköti, me itre ka isenyin,* me itre ka cilën la itre provës, matre troa feetën la hnasaatr hna hnyipi acil.

3 Nge hnene la itre tane provës, me itre atr ka tru, me itre gavena, me itre atresi, me itre ka thupë mani, me itre ka iameköti, me itre ka isenyin, me itre ka cilën la itre provës, hna ce traqa troa atrune la hnasaatre i Nebukaneza joxu, me icilenyi qëmeken ej. 4 Ame hnene la qene qaja* hna sue ka hape: “Hane hi la hna amekötin koi epun itre atr, me itre nöj, me itre ka qaja la itre xaa qene hlapa: 5 E drenge hë epuni la kola ho la trutru, me sine ihoho, me sitara, me arp, me itre nyine elo miuzik ka hetre filen, me sumefono, me itre xaa nyine elo miuzik, ke tro hë epuni a sa iwatingöneca me thil kowe la hnasaatre gool hna acil hnei Nebukaneza joxu. 6 Ame la atr ka xele ma sa iwatingöneca me thil kowe la hnasaatr, ke tro ha canga kuië angeic ngöne la fur ka idreuthi catr.” 7 Matre ame hë la itre atr, me itre nöj, me itre ka qaja la itre xaa qene hlapa a drenge la mejene trutru, me sine ihoho, me sitara, me arp, me itre nyine elo miuzik ka hetre filen, me sumefono, me itre xaa nyine elo miuzik, ke hnei angatr asë hna sa iwatingöneca me thil kowe la hnasaatre gool, lo hna acil hnei Nebukaneza joxu.

8 Ame hnene la angetre Kaledaia hna traqa troa qejeqeje* angetre Iudra. 9 Öni angatr koi Nebukaneza joxu: “Joxu fe, epi tro nyipëti a mel uti hë epine palua. 10 Ase hë nyipëti joxu amekötin laka, e ho hë la trutru, me sine ihoho, me sitara, me arp, me itre nyine elo miuzik ka hetre filen, me sumefono, me itre xaa nyine elo miuzik, tro la nöjei atr asë a sa iwatingöneca, me thil kowe la hnasaatre gool, 11 wanga troa trij la itre ka xele ma sa iwatingöneca kowe la fur ka idreuthi catr. 12 Ngazo pe, hnene la itre xaa atre Iudra, lo hnei nyipëti hna acil hune la provës ne Babulona, ene Saderaka, me Mesaka, me Abedenego, hna tha metrötrë nyipë joxu. Tha angatre fe kö a nyihluen la itre haze i nyipë, nge xele fe angatr ma thil kowe la hnasaatre gool hnei nyipëti hna acil.”

13 Ame hna elëhni hnei Nebukaneza joxu, nge hnei nyidrëti hna upe troa thei Saderaka, me Mesaka, me Abedenego. Nge hna tro sai angatr koi nyidrë. 14 Öni Nebukaneza jë hi: “Saderaka, me Mesaka, me Abedenego, nyipici kö ka hape, xele kö epuni ma nyihluene la itre hazeng, me thil kowe la hnasaatre gool hnenge hna acil? 15 Ngo ame enehila, maine tro epuni a sa iwatingöneca la epuni a drenge la trutru, me sine ihoho, me sitara, me arp, me itre nyine elo miuzik ka hetre filen, me sumefono, me itre xaa nyine elo miuzik, nge maine tro epuni a thil kowe la hnasaatreng, ke ka loi lai. Ngo maine xele pala hi epun, tro ha triji epun ngöne la fur ka idreuthi catr. Nge drei la haze ka troa atreine thepe epun qa ngöne la imeng?”

16 Matre öni Saderaka, me Mesaka, me Abedenego koi joxu: “Nebukaneza fe, tha nyipiewekë hmaca kö troa ithanatane lai. 17 Joxu, maine tro ju hë a triji hun ngöne la fur* ka idreuthi catr, ngo atreine kö la Akötresie hne huni hna nyihluen, troa amele hun me thepe hun qa ngöne la ime i nyipë! 18 Ngacama pëkö hnei nyidrëti hna troa kuca joxu, ngo lapa atre ju laka, tha tro jë kö huni a nyihluene la itre haze i nyipë, me thil kowe la hnasaatre gool hnei nyipëti hna acil.”

19 Ame hna palulu la elëhni i Nebukaneza koi Saderaka, me Mesaka, me Abedenego, nge hna aca tro saze* la aqane goeë angatr hnei nyidrë. Matre hnei nyidrëti hna iup troa a 7 lao adreuthine la fur. 20 Nge hnei nyidrëti hna upe la itre soc ka catre i nyidrë troa hnöthi Saderaka, me Mesaka, me Abedenego, me kuië angatr ngöne la fur ka idreuthi catr.

21 Hna ce othi angatr memine la itre ikotre i angatr, me itre hna heetr, me itre hna isej, me itre xaa iheetre i angatr, me kuië angatr hnine la fur hna adreuthine catrën. 22 Pine laka, catre pala ha la hna amekötin hnei joxu, nge idreuthe catre menu hë la eë, matre meci ju hi lo itre ka triji Saderaka, me Mesaka, me Abedenego ngöne la ifur. 23 Ngo ame pë hë Saderaka, me Mesaka, me Abedenego, ke hnei angatr hna mala fë la hna othi angatr hnine la fur ka idreuthi catr.

24 Ame hna traqa la xou koi Nebukaneza joxu, nge hnei nyidrë hna mejë, me hape kowe la itre ka huliwa i nyidrë: “Tha hne së kö lo hna oth me kuiën la köni trahmany hnine la eë?” Sa jë hi angatr ka hape: “Eje hi joxu!” 25 Matre öni nyidrë: “Nga eni pena la a öhne la 4 lao atr kola tro hnyawa nyipine la eë, nge pëkö ca eatre i angatr; nge ame lai hna 4, ke kösë lo neköne la itre haze.”

26 Ame hnei Nebukaneza hna easenyine la qëhnelö ne la fur me hape: “Saderaka, me Mesaka, me Abedenego, itre hlue ne la Akötresie ka draië catr, lö pi qa lai, nge trohemi!” Ame hnei angatr hna tro qa hnine la fur. 27 Nge hnene la itre tane provës, itre atr ka tru, itre gavena, me itre ka huliwa i joxu ka traqa itrony, hna öhne laka, pë fe kö ca thangane* la eë thei angatr; goi pë fe ca penehe i angatr hna dreuth, nge tha ngazo kö la itre ikotre i angatr, nge goi tha pupui eë fe angatr.

28 Matre öni Nebukaneza jë hi: “Epi troa atrune la Akötresi Saderaka, me Mesaka, me Abedenego, ka upe la angela i nyidrë troa amelene la itre hlue i nyidrë. Hnei angatre hna mejiune koi nyidrë, me cil kowe la hna amekötin hnei joxu, nge goi tha xou i angatre fe troa mec,* hune la troa thil me nyihluene la ketre haze, ngo tha Akötresi angatre pe. 29 Haawe, hane hi la hnenge hna amekötin: maine tro la ketre atr qa ngöne la itre nöj me qene hlapa, a qajangazone la Akötresi Saderaka, me Mesaka, me Abedenego, tro ha theatrij la ngönetrei i angeic, me nyi kabine* i nöjei atr la uma i angeic; ke pë hmaca ju kö ketre Akötresie ka atreine iamele tui nyidrë.”

30 Thupene lai, hnei joxu hna acili Saderaka, me Mesaka, me Abedenego ngöne la itre hnëqa ka tru* catre hmaca kö ngöne la provës ne Babulona.