Salamo
Thatraqane la atre jumi traem. Nyima. Salamo.
66 Epuni asë, itretre lapane la ihnadro, sue madrine jë koi Akötresie.
2 Atrune jë la ëje i nyidrë ka lolo jëne la itre nyima.*
Qaja alolone jë la kola atrunyi nyidrë.
3 Qaja jë koi Akötresieti ka hape: “Nyine xouen la itre huliwa i nyipë!
Pine la ecatrene la mene i nyipë,
Tro hë la itre ithupëjia me nyipë a ithanata hnihni koi nyipë.
4 Tro la fene hnengödrai asë a thil qëmekei nyipë;
Tro ej a atrunyi nyipë jëne la itre nyima;
Tro ej a nyima nyine atrune la ëje i nyipë.” (Sela)
5 Traqa pi troa goeëne la itre huliwa i Akötresie.
Hna xouene la itre huliwa i nyidrë thatraqane la itre nekö i atr.
6 Hnei nyidrëti hna saze la hnagejë koi dro ka weliwel;
Hnei angatr hna tro nyipine la hneopegejë.
Hne huni hna madrin la hnei nyidrëti hna kuca koi hun.
7 Nyidrëti la ka mus epine palua hnene la mene i nyidrë.
Luemeke i nyidrë a thupëne la nöjei nöj.
Tha tro pi kö a draië hnene la itre ka pi hun. (Sela)
8 Epuni fe nöjei atr, atrune jë la Akötresi së,
Nge loi e troa dreng hnene la nöjei atr asë.
9 Nyidrëti a thupëne la mele së;
Tha nyidrëti kö a nue la lue ca së troa ucic.*
10 Ke eje hi Akötresieti fe, hnei nyipëti hna waipengö hun;
Hnei nyipëti hna nyidrawa hun, tune la aqane nyidrawane la sileva hnene la eë.
11 Hnei nyipëti hna engë huni matre troa jötr ngöne la ifile;
Hnei nyipëti hna amë the hun* la ketre ehnef ka hace catr.
12 Hnei nyipëti hna nue la atr ka troa mec, troa waja tranyi* hun;
Hne huni hna tro hune la eë me tim;
Thupene lai, hnei nyipëti hna xomi huni kowe la gaa tingeting.
13 Tro ni a lö ngöne la uma i nyipë memine la itre huuj ne dreuth asë;
Tro ni a eatrën lo itre hnenge hna sisinyi koi nyipë
14 Lo hna qaja hnene la ukeineqëng
Nge hna qaja hnene la qëng ngöne lo eni a akötr.
15 Tro ni a tro fë koi nyipë la itre huuje ne dreuth asë ka giris
Me huhajine la huuj ne mamoe trahmany.
Tro ni a huujëne la itre kau trahmany me itre nani trahmany. (Sela)
16 Trohemi ma dreng, epuni asë itre ka xoue Akötresie,
Nge tro ni a qaja koi epuni la hnei nyidrëti hna kuca koi ni.
17 Hnenge hna hë nyidrë hnene la qëng
Nge hnenge hna atrunyi nyidrë hnene la thinemeng.
18 Maine hnenge ju hna lapa fë e kuhu hning la ketre ewekë ka ngazo,
Tha tro kö Iehova a drei ni.
19 Ngo hnei Akötresieti hna drei ni;
Hnei nyidrëti hna wangatrune la thithing.
20 Epi atrunyi Akötresie, ke tha hnei nyidrëti kö hna xelen la thithing
Nge tha hnei nyidrëti kö hna cipane la ihnimi nyipici i nyidrë.