Iosua
1 Thupene lo mec i Mose hlue i Iehova, hnei Iehova hna qaja koi Iosua* nekö i Nuna, lo hlue i Mose ka hape: 2 “Meci hë Mose lo hlueng. Matre enehila, tro sasaithe jë la hneopegejë Ioridrano memine la nöje Isaraela asë, nge lö jë hë kowe la nöj hnenge hna hamë angatr. 3 Ame asë hi la itre götran hnei epuni hna troa trongën, ke tro ni a hamë epun, tune lo hnenge hna sisinyi koi Mose. 4 Ame la götrane i epun, ke troa tro qa ngöne la hnapapa a tro Lebanona, uti hë la Hneopegejë ka tru ene la Hneopegejë Euferata, me lapan asë la nöj i angetre Heth, uti hë la Hnagejë Ka Tru* e kuë.* 5 Ngöne la ijine mele eö, pëkö ka troa cile koi ö, ke tro ni a ce me eö tune lo eni a ce me Mose. Tha tro jë kö ni a nue eö, me nuaxöji ö. 6 Haawe, catre pi nge hni ne trahmanyi jë!* Ke eö la ka troa xatuane la angetre Isaraela troa kapa la nöj hnenge hna sisinyi kowe lo itre qaaqaa i angatr.
7 “Eje hi, catre pi nge hni ne trahmanyi jë!* Trongëne hnyawane jë la nöjei Wathebo hnenge hna hamë Mose hlueng. The jea pi kö kowe la götrane maca me götrane mi, matre tro pala hi a inamacane la aqane ujë i ö ngöne la nöjei gojenyi ö. 8 The mano kö ithanatane la itre hna cinyianyin ngöne la itusi Wathebo celë; loi e tro eö a e thaupun* me lapa mekun ej e lai me jidr, matre tro eö a trongëne hnyawa la itre hna cinyianyin; qa ngöne lai, tro ha tro loi la mele i ö, me inamacan la aqane ujë i ö. 9 Hapeu, tha hnenge kö lo hna upi ka hape, catre pi nge hni ne trahmanyi jë? The xou kö nge the hmengöhmengöne kö, ke tro pala hi Iehova Akötresi ö, a ce me eö ngöne la nöjei jë i ö.”
10 Ame hnei Iosua hna qaja kowe la itre tane la nöj ka hape: 11 “Tro jë ngöne la lapa, nge amekötine jë kowe la nöj ka hape: ‘Hnëkë kemeji jë, ke köni drai pe hi qëmekene tro epuni a sasaithe la hneopegejë Ioridrano, matre thapa la nöj hnei Iehova Akötresi epun hna troa hamë epun.’”
12 Matre hnei Iosua hna qaja kowe la angetre Reubena, me angetre Gada, me kowe la sine la tribu i Manase ka hape: 13 “Mekune kö lo hnei Mose hlue i Iehova hna upi epun troa kuca: ‘Iehova Akötresi epun a hamë epun la tingeting, memine la nöje ce. 14 Tro kö la itre föi epun, me itre nekö i epun, me itre si i epun, a lapane la nöj hnei Mose hna hamë epun ngöne la götrane celë* ne la hneopegejë Ioridrano. Ngo ame epun itre atr ka catr, tro epuni a tro qëmekene la itre trejin me epun, tune la ketre trongene isi. Qa i epun troa xatuane la itre trejin me epun, 15 uti hë la tro Iehova a hamë angatr la tingeting, tune lo aqane kuca i nyidrë koi epun, nge uti hë la tro angatr a thapa la nöj hnei Iehova Akötresi epun hna troa hamë angatr. Thupene lai, tro hmaca epuni a bëek ngöne lo götran hnei epuni hna kapa ha, lo nöj hnei Mose hlue i Iehova hna hamë epun ngöne la götrane koië ne la hneopegejë Ioridrano, nge tro hë epuni a lapa e cili.’”
16 Sa jë hi angatr koi Iosua ka hape: “Tro huni a kuca asë la hnei ö hna upi hun troa kuca, me tro kowe la nöjei götran hnei ö hna upi hun troa tro kow. 17 Tro huni a drei ö tune lo aqane drei Mose hne hun. Epi tro Iehova Akötresi ö a ce me eö, tune lo nyidrëti a ce me Mose. 18 Ame asë hi la nöjei trahmanyi ka troa icilekeu memine la hnei ö hna amekötin, nge ka xele ma dreng la hnei ö hna qaja, ke tro ha humuthi angatr. Eje hi, catre pi, nge hni ne trahmanyi jë!”*