Deuteronomi

34 Ame hnei Mose hna tro qa ngöne la hnapapa ne Moaba, me elëne la Wetre Nebo, ngöne la he ne Pisega, qëmeken e Ieriko. Thupene lai, hnei Iehova hna amamai angeic la nöj asë: qaane ju hi e Gileada uti hë e Dana, 2 me Nafatali asë, memine la nöje Eferaima me Manase, memine la nöje Iudra asë uti hë la hnagejë e koië,* 3 memine la Negeb, memine la gaa paapa ne Ioridrano, memine la gaa paapa ne Ieriko (traon ne la itre pama) uti hë e Zoara.

4 Nge öni Iehova jë hi koi angeic: “Hane hi la nöj hnenge hna sisinyi koi Aberahama, me Isaaka, me Iakobo ka hape: ‘Tro ni a hamën kowe la itre matra i ö.’ Eni hi la a amamai ö, ngo tha tro kö eö a hane tro kow.”

5 Thupene lai, hnei Mose hlue i Iehova hna meci e cili ngöne la nöje Moaba, tune lo hnei Iehova hna qaja. 6 Hnei nyidrëti hna kelemi angeic ngöne la hnathup e Moaba, qëmeken e Bethe-Peora, nge uti pala hi enehila, pë pala kö ka öhne la hua i angeic. 7 Traqa koi 120 lao macatre i Mose, lo angeic a mec. Tha hajihaji kö la luemeke i angeic, nge tha patre kö la trengecatre i angeic. 8 Hnene la nöje Isaraela hna treije pi Mose ngöne la hnapapa ne Moaba koi 30 lao drai. Ame hna fenesi pi la itre ijine treij me hnëmec i Mose.

9 Tiqa ha Iosua nekö i Nuna hnene la u ka inamacan, ke hnei Mose hna ati im hui angeic. Nge hnene la angetre Isaraela hna drei angeic, me kuca thenge la hnei Iehova hna ahnithe koi Mose. 10 Ngo pë pala kö e Isaraela la ketre perofeta ka tui Mose, lo hnei Iehova hna atre hnyawa.* 11 Hnei angeic hna kuca asë la itre hatren, me itre iamamanyikeu hnei Iehova hna upi angeice troa kuca e Aigupito koi Farao, me kowe la itre hlue i angeic, me nöje i angeic asë. 12 Hnei Mose hna kuca la itre ewekë cili qëmekene la angetre Isaraela asë, hnene la ime ka catr me mene ka catr.