Iosua
23 Nyimu drai thupene la Iehova a ase atingetingë Isaraela, ngöne la nyidrëti a amele angatr qaathene la itre ithupëjia xötreith, nge qatre catre hë Iosua, 2 hnei Iosua hna hëne la angetre Isaraela asë: itre qatr, me itre tan, me itre atre amekötin, me itre tane huliwa. Öni nyidrë: “Qatre catre hë ni la. 3 Öhn asë hi epun la itre ewekë hnei Iehova Akötresi epun hna kuca kowe la itre nöj thatraqai epun, ke Iehova Akötresi epun lo ka isigöli epun. 4 Goeën: jëne la hna uthidrönegöti,* hnenge hna hamë epun la itre götran ne la itre nöj ka eje pala kö e cili, me itre nöj hnenge hna apatren, qa Ioridrano uti hë la Hnagejë Ka Tru* e kuë.* Celë hi edrö thatraqane la itre tribu i epun. 5 Ke Iehova Akötresi epun la ka helë angatr qëmekei epun, me apatrenyi angatr qa ngöne la nöj thatraqai epun. Nge hnei epuni hna thapa la nöje i angatr, tune lo hnei Iehova Akötresi epun hna sisinyi koi epun.
6 “Enehila, catre pi troa metrötrën me trongën asë la itre hna cinyianyin ngöne la itusi Wathebo i Mose, nge the jea pi kö kowe la götrane maca maine mi, 7 maine epe pena kowe la itre nöj ka mele pala kö nyipi epun. Goi tha tro fe epuni a hane qaja la ëjene la itre haze i angatr, maine sisinyi ngöne la ëje i angatr. Tha tro pi kö epuni a nyihlue i angatr, maine thili qëmekei angatr. 8 Ngo loi e tro pe epuni a qale koi Iehova Akötresi epun, tune lo hnei epuni hna kuca uti hë enehila. 9 Tro hë Iehova e cili a helën qëmekei epun la itre nöje ka tru me ka catr. Eje hi, pë fe kö ca atr ka atreine cil koi epun uti hë enehila. 10 Tro hi la ala cas thei epun a huzun la ala 1 000, ke Iehova Akötresi epun la ka isigöli epun, tune lo hnei nyidrëti hna sisiny. 11 Haawe, isine jë tro pala hi a hnimi Iehova Akötresi epun.
12 “Ngo maine tro epuni a nuetriji Akötresie, matre qale kowe la itre ewekë ka lapa pe ne la itre nöje cili, lo ka eje pala kö thei epun, nge maine tro epuni a faipoipo me angatr, me ce tro lapa* me angatr, 13 lapa atre ju laka: tha tro hmaca kö Iehova Akötresi epun a helën la itre nöje cili qëmekei epun. Tro hë angatr a tune la ifile me itheth,* me wameuc* ngöne la wengesisila i epun, me ka ithinyi ngöne la luemeke i epun, uti hë la tro epuni a patr qa ngöne la nöj ka lolo hnei Iehova Akötresi epun hna hamën koi epun.
14 “Ame enehila, drenge ju! Ka tro hë ni la a mec. Atre hë epun hnene la hni i epuni ka pexej, me mele i epuni ka pexej laka, qa ngöne la nöjei ewekë ka mingöming hnei Iehova hna sisinyi koi epun, tha tria kö la ketre. Ngo hna eatrën asë hi. Tha tria kö la ketre. 15 Ame pe, tune la aqane eatrëne Iehova Akötresi epun la nöjei ewekë ka lolo hnei nyidrëti hna qaja, ketre tun, tro fe Iehova a axulun koi epun la itre akötr hnei nyidrëti hna sisiny.* Nge tro hë nyidrëti a apatrenyi epun qa ngöne la nöje celë ka lolo, lo hnei Iehova Akötresi epun hna hamë epun. 16 Maine tro epuni a nuetrij lo isisinyikeu hnei Iehova Akötresi epun hna upi epun troa metrötrën, matre nyihluene pena la itre xaa haze me thili koi angatr, haawe, tro ha palulu la elëhni i Iehova koi epun, nge tro hë epuni a canga patr qa ngöne la nöj ka lolo hnei nyidrëti hna hamë epun.”