Isaia
59 Goeën! Tha xoxopatre kö la ime i Iehova matre amelen,
Tha ka sime* kö la lue hnangenyë i nyidrë matre dreng.
2 Itre ngazo i epuni pe la ka ananyi epun qaathene la Akötresi epun.
Hnene la itre tria i epun, matre nyidrëti a tha semesine* epun,
Me xele ma drei epun.
3 Ke pui ngazo hë la itre hnatrapaime i epuni hnei madra
Me itre hene wanakoime i epun hnene la itre tria.
Itre ukeineqë i epuni a qaja la itre trengathoi, nge thineme i epuni a qaja acon la itre ewekë ka tha meköti kö.
4 Pëkö ka isigöline la meköt,
Pëkö ka cilëgöline la nyipici.
Angatr a lapa qal kowe la eny,* me qaja la itre ewekë ka pë alien.
Angatr a upunene la hnëjin me hnahone la ngazo.
5 Angatr a thëthë la itre wakuja i un ka ihej,
Me sili iaeng.
Tro ha meci la atre öni la itre wakujan ej,
Nge tro ha fetra la vaipa qa ngöne la wakuja ka kaqa.
6 Tha tro kö a kuci iheetre memine la itre iaenge i angatr,
Me heetrë angatr hnene la hnei angatr hna kuca.
Ngazo catr la itre huliwa i angatr,
Nge tru catre la iangazo ngöne la itre iwanakoime i angatr.
7 Kola nyinyape la itre waca i angatr troa kuca la ngazo,
Nge canga sesë hi angatr troa anenine la madra ne la itre atr ka pë engazon.
Ka ngazo la itre mekuna i angatr;
Hetrenyi la iangazo me iakötrë ngöne la itre jë i angatr.
8 Thatre kö angatr la jëne tingeting,
Nge pëkö meköt ngöne la itre tronge i angatr.
Angatr a aqaline la itre jë i angatr;
Ame thene la itre ka trongën, ke pëkö ka troa hetre tingeting.
9 Qa ngöne lai, nanyi catre la meköt qaathe hun,
Nge tha traqa kö la iameköti koi hun.
Eahuni pala hi a treqene la lai, ngo jidri pala kö;
Eahuni a treqene la hudrume ne la lai, ngo eahuni pala hi a tro ngöne la gaa mit.
10 Tune la itre timek, eahuni a etheny matre öhne la ngöne uma;
Eahuni pala hi a ethenyi trootro tune la itre atr ka pë luemek.
Ame e midi, eahuni a kei kösë hejiheji hë;
Nyipine la itre atr ka catr, kösë itre ka meci hun.
11 Tune la bea, tha mano kö huni treij
Me ho kösë itre piny.
Eahuni a lapa treqen la meköt, ngo pë pe;
Eahuni a treqene la iamele,* ngo nanyi catre qaathe hun.
12 Ke anyimua icilekeu hun me nyipë;
Kola isa qejeqeje hun hnene la itre ngazo hun.
Ke atre hnyawa hi hun la itre icilekeu hun;
Atrepengöne hnyawa hi hun la itre menu hun.
13 Hne huni hna ena la itre wathebo me nuetriji Iehova;
Hne huni hna trotrije la Akötresi hun.
Hne huni hna qeje iaxösisi me icilekeu;
Hne huni hna sili trengathoi me qaja la itre ewekë ka thoi ngöne la itre hni hun.
14 Eahuni a ahiëne la thiina ka meköt,
Nge kola nanyi la meköt;
Ke kei hë la nyipici* ngöne la gaa tru atr,
Nge thatreine kö la meköt troa hane lö hnin.
15 Patre hë la nyipici,
Nge ame la atre kötrene la ngazo, ke hna thapa la itre ewekë i angeic.
Öhne kö Iehova, nge tha madrine* kö nyidrë,
Ke patre hë la meköt.
16 Nyidrëti a sesëkötr la nyidrëti a öhne laka, pëkö ala cas,
Nge pëkö ca atr ka traqa troa ixatua,
Matre hnene la ime i nyidrë hna axulune la iamele,
Nge hna sajuë nyidrë hnene la meköti nyidrë.
17 Ame hnei nyidrëti hna heetrëne la meköt kösë iheetre ne isi
Me petrëne la itrapetr ne iamele.
Hnei nyidrëti hna heetrëne la itre iheetr ne nyithupen
Nge hnei nyidrëti hna heetrë nyidrë hnene la aja ka catr, kösë iheetr ka qea.*
18 Hane hi la aqane tro nyidrëti a ujë pine la itre huliwa i angatr:
Troa elëhni kowe la itre ithupëjia me nyidrë, me ejine la itre ka icilekeu me nyidrë.
Nge tro nyidrëti a nyithupen kowe la itre hnapet.
19 Tro la itre ka lapa ngöne la hna lö hnei jö a xouene la ëje i Iehova
Nge tro la itre ka lapa ngöne la hna fetra hnei jö a xouene la lolo i nyidrë,
Ke tro hë Iehova a neni catr tune la hneopegejë,
Hna ukun hnene la ua i nyidrë.
20 “Tro kö la Atre Itö Mel a traqa e Ziona,
Me bëeke kowe la itre matra i Iakobo ka nuetrije la ngazo,” öni Iehova.
21 “Ame ni, hane hi la isisinyikeung me angatr,” öni Iehova, “ame la uang ka të hui ö, memine la itre trengewekëng hnenge hna amë ngöne la që i ö, ke tha tro kö a patr qa ngöne la që i ö, me qa ngöne la që ne la itre nekö* i ö, me qa ngöne la që ne la itre api* ö, qaane enehila, nge uti hë epine palua,” öni Iehova.